[1] Jumax wali yatiñan jaqïskasmawa, ukasti Diosatakix janiw kuna askïkisa.
[3] ¿Taqi ch'aman Diosasti kunarak jikxati juman chiqa aski jaqïtamatsti?
[4] Jumatix chiqpachapun Diosar jaysasmaxa, jupax janiw kunatsa wayt'kiristamti.
[5] ¡Ukampis jan wali luratanakamax sintipuniwa, juchanakamasti jan jakht'kayawa!
[6] Jumaxa, juk'a manunakatsa, isinakap katuntastaxa jan kunan jaqirux q'alalpach apanuktaxa.
[7] Janiw umat pharjat jaqir uma churktati; manq'at awtjat jaqirusti janiw manq'a churktati.
[8] ¡Jumax ch'amani, axsarat jaqïyätawa, uraqix jumankkaspas ukham amuyasïyätaxa!
[9] Ijma warminakarux uksak khithanukurïtaxa, wajcha wawanakarusti t'aqhisiyirïtawa.
[10] Ukatpï jichhax jan walt'añax jumar muyunttamxa, akatjamat axsarañampi phuqhantat uñjastaxa,
[11] ch'amakanakan sarnaqkasmas ukhama, ch'amampi jalir uman jawiras qatatkiristam ukhama.
[12] Diosax alaxpachankiwa, juk'ampi alayana; juk'amp alayankir warawaranakas kayu takt'äwipankiwa.
[13] ¿Kamisarak sätasti: “Diosax janiw amuyaskiti, jach'a qinayanakaw taripañatak juparux jan uñjaykiti” sasasti? ¿Kamisarak sätasti: “Diosax janiw uñjkiti, alaxpachan mä thiyat mä thiy saranaqaski” sasasti?
[15] ¿Ñanqha lurir jaqinakax arkapkäna uka ch'amak thakhinjamti jumax arkañ munarakta?
[16] Jupanakax jank'akiw jiwarxapxi, jawirat phuqharir uman apatjama.
[17] Jupanakax Diosar sapxänwa: “¡Jan arxayapxistati! ¿Kunarak taqi ch'aman Diosasti jiwasatak luraspasti?” sasa.
[18] Ukampis Diosaw jupanakan utap taqi suma yänakampi phuqhantäna. ¡Ñanqha lurir jaqinakjam amtañax nayat jayankpan!
[19] Aski, jan juchani jaqinakax ñanqha lurir jaqinakat larusipxi, jan walt'añankapxatap uñjasax sapxiwa:
[20] “¡Ninaw uñisirinakasan qamir yänakap t'unji!” sasa.
[21] Job, Diosamp sumar mantxam; jupasti wasitat qamiriptayxätam.
[22] Jupamp yatichayasim, arunakap p'iqimar katuqam.
[23] Jumatix alt'at chuyman tukxäta, taqi ch'amani Diosar makhatxarakïta, utamatsa uka ñanqhanak apanukxarakïta,
[24] wali suma qursa, laq'äkaspa ukham uñjarakïta, jawir qalanakäkaspas ukham uñjarakïta ukapachasti,
[25] taqi ch'aman Diosaw jumatak walja qurimänisa, walja qullqimänisa.
[26] Jupaw jumar kusisiyätam, taqi iyawsañampiw jupar uñtarakïta.
[27] Jupax mayisitanakam ist'ätam, jumasti arsutanakam phuqharakïta.
[28] Taqi luräwinakaman walt'askakïta; qhanasti sarnaqäwiman k'ajani.
[29] Diosax jach'a jach'a tukurirux jisk'achiwa, alt'at chuymanirusti jach'añcharakiwa.
[30] Diosax jan juchanirux qhispiyiwa, jumatix jan juchanïksta ukaxa, qhispiyarakïtamwa.