[1] Ukataqi arunakxarusti ¿janit arusxatañ wakiskaspasti?, ¿aka jaqix ukataqi parlatap laykukiti jan juchanïkaspa?
[3] ¿Jumasti amuytati ukataqi parlatamamp nanakar amukt'ayañxa? ¿Janis khitis sawkasitanakamar arusxatirjamäkaspa ukti amuyta?
[4] Jumax saraktawa: “Nayan yatichäwixax chiqapawa; Tatitun nayraqatapan q'umätwa” sasa.
[5] ¡Diosax jumar arusxatañatak arsunispa!
[6] Jupaw yatiñ kankañan imantatanakap yatichiristam, ukanak amuyt'añax wali ch'amawa. Ukapachaw yatirakisma luratamatjam Diosan jumar jan mutuyatapa.
[7] ¿Jumasti amuytati Tatitun amtäwinakap uñt'aña, taqi munañ kankañap yatiñkam puriñsa?
[8] ¿Kuns lurasma?, ukax alaxpachat sipan juk'amp amstawa. ¿Kunarak jumast yattasti?, ukax mik'ayat sipan juk'amp manqhawa.
[9] Uraqit sipan juk'amp jach'awa, jach'a qutat sipan juk'amp jach'arakiwa.
[10] Diosatix jutasin katuntiristam, ukatsti taripäwir jawsiristam, ¿khitirak jupar jark'aspasti?
[11] Khititix k'arïki uk jupax yati, jupax ñanqha lurir uñjaraki, ¿jan ukax amuytacha Diosan jan ukanak amuyatapxa?
[12] Kunürutix ch'uminkir asnox suma asnor tukxani, uküruw pisi chuyma jaqix amuythapisini.
[13] Jichhax taqi kunsa chiqapar lurañ amtasim, Diosat mayisirakim.
[14] Jumatix juchamp phuqhantatäsksta ukkhasti, uka jucham apanukum; utamansti ñanqha lurañax jan utjkpati.
[15] Ukapachaw jan khitinsa kun sata sayt'asïta, janiw kuna axsarañamas utjkxarakiniti;
[16] t'aqhisitanakamsa armasxätawa, jalir umax jalakipki ukar uñtataw ukanak armasxäta.
[17] Jakañamax chika uru k'ajir intit sipan juk'ampiw k'ajani; wali ch'amaka urunakamasti willjta qhantatir uñtatäxaniwa.
[18] Suyt'añamas utjaskaniwa jan kuna axsarasaw jakasïta, Diosan uñjataw jan kun axsaras ikt'asirakïta.
[19] Khitir jan axsarasaw samart'äta, waljaniw juman yanapam thaqhir jutapxani.
[20] Ukampis ñanqha lurir jaqinakax, inamayakiw yanap thaqhani; janiw kawkhar imantasiñsa jikxatapkaniti, suyt'añapasti jiwañakïxaniwa.