[1] Job, art'asim, inach khitis ist'askiristam. ¿Kawkïr angelarurak jichhasti art'asïta?
[2] Chuyma usuyasiñasa, uñisisiñasa jiwañarukiw jaqirux apxi.
[3] Pisi amuyt'an jaqin qamiriptatap uñjta, ukampis utapax jank'akiw t'unjtawayxi.
[4] Wawanakapax janiw khiti yanapt'irsa jikxataskiti; taripañ utanakansti janiw jupanakarux chiqapar uñjapkiti, janirakiw khiti arxatiris jupanakatak utjkiti.
[5] Manq'at awtjat jaqinakaw yapu apthapitanakapsa manq'antxi, ch'aphi taypinakatpach apsusa, umat pharjatanakasti qamir yänakap munapayapxaraki.
[6] Ñanqha lurañax janiw uraqit sartkiti; llakir puriñax janiw akapachat mistkiti.
[7] Pachpa jaqiw llakir puriñ thaqhasiski, kamisatix pachpa nina taypit sank'anakax mistki ukhama.
[8] Jumäsinxa, nayax Diosaruw makhatxirista, jan walt'añanakaxsti amparaparuw uchxirista;
[9] ¡jupax muspharkañ jach'a luräwinak luri, uka luräwinaksti janiw khitis amuyt'irjamäkiti!
[10] Jupaw akapachar jallu apayani, ukampiw yapunak qarpanti;
[11] jupaw jisk'achatanakar jach'ar apti, jupaw llakitanakarus imaskaraki;
[12] jupaw ñanqha jaqinakan amtatanakap t'unatati, jupanakarus aynacht'ayaraki.
[13] Jupaw ñanqha chuyman jaqirux, pachpa ñanqha amtatanakapar jalantayi, uka ñanqha amtatanakapsa aynacht'ayaraki.
[14] ¡Urunpach jupanakax juykhur uñtat payinaqapxi, ch'amakanakan muyuntata, arumäkaspas ukhama!
[15] Diosaw qhispiyi, jan kunan jaqirusa, t'aqhisiyat jaqirusa, ñanqha jaqinakan amparapata;
[16] jupaw t'ukhanakan suyt'äwipaxa, ¡jupaw ñanqha jaqinakan lakanakap lluphantaraki!
[17] Khitirutix Diosax chiqachki uka jaqix kusisiñaniwa. Taqi ch'aman Tatitun chiqachäwiparux jan jisk'achamti.
[18] Jupatix chhuxriñchjchixa, uka chhuxriñchjatarux qullxatarakiwa, Diosatix nuwantchixa, uka usuchjatarux juyartayarakiwa.
[19] Mayamp, mayamp chijir puriñat qhispiyätam, ñanqhan jumxar jutañapsa janiw munkaniti.
[20] Manq'at awtjat sarnaqañ urunakan, jiwañat qhispiyätam, ch'axwañ urunakansti jiwañat qhispiyarakïtam.
[21] Jupaw jaqin jan wali parlatanakapat imätam, aynacht'añ purinkan ukasa, janiw axsarkätati.
[22] Mach'anakatsa, chijinakatsa larusïtawa, janiw qhuru animalanakar axsarkätati.
[23] Qalanakax janiw yapuman jan walt'aykätamti, qhuru animalanakasti jumampix sumankaniwa.
[24] Utaman taqi phuqt'ataw sarnaqasïta, uywanakam tumpasïta ukkhasti, phuqhatpachäskaniwa.
[25] Wawanakamax pampan utjir qurar uñtatäniwa.
[26] Chuyman jaqïñarusti ch'amaniw puriskäta, suma puqt'ata trigo pichur uñtata.
[27] Pachpa sarnaqäwisaw ukanakan ukhamätap yatichistu; ukanak ist'am, juma kipkaw ukhamätap yatïta.