[1] Job chachax janiw amukïrjamäkxänti ukat arsusxäna, yuritap uru ñanqhacharakïna akham sasa:
[3] ¡Nayax jakañ qalltkäyät uka arumax ñanqhachatäpan! ¡Nayax yurkta uka urus ñanqhachatarakïpan!
[4] ¡Uka urux ch'amakar tukukisapäna, Tatitus uka urut armasikisapäna, janirak qhanjtankasapänti!
[5] ¡Khä arumax ch'iyär qinay ch'amakan chhaqtakisapäna, jan ukax, mä ch'iyar ch'amakax chhaqtayakisapäna, jan ukax, intin ch'amakt'atapas axsarañ phuqhantayasapäna!
[6] ¡Uka arumax ch'amakanak taypir chhaqtakisapäna, uka urusti janirak phaxsinak taypinsa, maranak taypinsa jakhutäkasapänti!
[7] ¡Uka arumax janik khitis yurisapänti, kusisiñat arnaqasiñas janirak utjkasapänti!
[8] ¡Uka arumar layqanaka ñanqhachasapäna, Leviatán sat jach'a animalxar munañanïpki ukanaka!
[9] ¡Ukärmanthina, qhantati warawaranakax jan k'ajasapänti, wali suyt'ata qhanas janirak purinkasapänti, qhantati qhanan k'ajatapas janirak uñjatäkasapänti!
[10] ¡Yuriykitu uka arumax ñanqhachatäpan, janiw ukataq t'aqhisiñanak uñjkiriskäyätti!
[11] ¿Kunatarak taykaxan purakapan jan jiwpachätsti, jan ukax, yuris ukspacha jan tukuspachätsti?
[12] ¿Kunatarak nayarusti yuriñax horasan katuqapxpachïtänsti? ¿Kunatarak nayar ñuñuyapxpachïtänsti?
[13] Nayatix ukapach jiwxiriskäyäta ukaxa, jichhax samaratakiw ikt'asiskiriskäyäta, sumakirakiw samart'asiskiriskäyäta,
[14] samarañatak jach'a utanak utachasir reyinakamp chika,
[15] jan ukax, jach'a utanakapsa qurimpi, qullqimp phuqhantir marka apnaqirinakamp chika.
[16] ¿Kunatarak nayarusti sullunukut wawarjam jan imantxapxpachïtusti, jan ukax, qhana jan uñjas jiwxir wawanakarjamasti?
[17] Qhuru jaqinakan jan wali lurañanakapax sepulturan tukusxi, qaritanakasti samarañ jikxatxapxaraki;
[18] katuntat jaqinakas ukan samarañ jikxatapxaraki, janiw ukan t'aqhisiyir jaqin arnaqasitapas ist'askxiti;
[19] ukan jisk'a jaqisa, jach'a jaqis mayakiw ukankapxi, t'aqhisiyat jaqisa, uywiripat qhispitaw jikxatasxaraki.
[20] ¿Kunatarak Diosasti llakit jaqir qhana uñjayaskakisti? ¿Kunatarak t'aqhisirirusti jakayaskaki,
[21] jiwañ wali muniritakis, jiwas janirak jupatak purinkiti, wali suma imantat yänakarjam thaqkchi ukasa?
[22] Jiwa jikxatasaw uka jaqin kusisiñapax purini, amay imäwin jikxatasxi ukapacha.
[23] Diosax juykhurjamaw sarnaqayi, taqi tuqit saräwip jist'anti.
[24] Ayquñampi, jachampiw nayan manq'axaxa.
[25] Kunarutix nayax axsarkta, kunatix nayar axsaraykitu, ukaw jichhax nayar katuntitu.
[26] Janiw nayatak samarañax utjkiti; janiw sumankañsa, samarañsa jikxatkti, t'aqhisiñakiw katuntxitu.