[1] Taqi llakisiñanakaxasa, aynacht'atanakaxasa mä tupur waytatäspa ukaxa,
[3] quta iranankir ch'allat sipan juk'amp jathïspawa. Ukatpï ukham parlasktxa.
[4] Taqi ch'aman Tatitux mich'inakapampiw nayar usuchjitu, jiwayiri qullapasti janchixanjam saratati. Diosax usuchjatapampiw axsarayañapampi phuqhantitu.
[5] ¿Asnosti qura utjkipan qanchisiskakispati? ¿Jan ukax, urqu vacax qura patxankasin warariskakispacha?
[6] ¿Khitirak jan jayunchat ch'aphaq manq'a manq'aspasti? ¿Kuna sumarak mä ch'aphaq manq'asti?
[7] Kuntix nayax janipun manq'añ munirïkta ukaw jichhax manq'axaxa.
[8] ¡Diosax mayitaxar churakitaspa; kuntix nayax munkta uksa phuqhakitaspa!
[9] ¡Diosax mäpit nayar t'unjxitaspa, mäpit jiwayxitaspa!
[10] Ukasa nayatak chuymachasiñaxäspawa, jan amuykaya t'aqhisiñax taypin kusisirista, qullan Diosan kamachinakap imas sarnaqatax layku.
[11] Janiw ch'amax utjkxituti juk'amp jakaskañataki, nayan jakañaxax janiw kunatakis wakiskxiti.
[12] Janiw ch'amaxax qarqar uñtat ch'ullqhïkiti, janirakiw janchixas broncer uñtat ch'ullqhïkisa.
[13] Janiw nayapach sayt'asirjamäkxti, janirakiw khiti yanapt'irsa jikxataskxti.
[14] T'aqhisiskir jaqi masirux munañawa, taqi ch'aman Tatitutak janis taqi chuymäkchi ukasa.
[15] Ukampisa, jumanaka, jaqi masinakaxaxa, janiw yanapt'apkistati, waña jawirar uñtataw nayatak tukupxtaxa.
[16] Umax qunchuw saraqani, chhullunkhayampi, khunumpi kituntata,
[17] ukampis chhullunkhayax chullurawayxiwa, jawiranakasti wañsuwayxiwa; lupiw lupintxi, umasti wañsuwayxarakiwa.
[18] Saririnakarus thakhipat maysaruw saranukuyi, wasar tuqir sarasin ukan jiwarxapxaraki.
[19] Temá, Sabá markankir saririnakax wali suyt'añampiw uka jawiranak thaqhapxi.
[20] Ukawjar purisinsti, mayjt'ataw uñjasipxi, suyt'añapasti ina ch'usaruw tukuwayxaraki.
[21] Jumanakax nayatak ukhamäpxaraktawa: nayan t'aqhisitax uñjasin, axsarxapxaktawa.
[22] Ukampis nayax janiw kunsa mayipksmati, nayar qhispiyañ layku qullqi churapxañamsa mayipksmati,
[23] uñisirit nayar qhispiyapxañamsa mayipksmati, lunthatanakan amparapat nayar antutayapxañamsa mayipkaraksmati.
[24] Jumanakay yatichapxita, nayasti amukïskäwa; pantjasitax uñachayapxita.
[25] Jumanakatix arsutanakaman chiqätap uñachayapxasmaxa, janiw nayax ñanqhaskiristti; ukampis jumanakax jan kuna juchat juchañchapxistaxa.
[26] Jumanakax arsusitanakaxat k'umipxistaxa, luqhi jaqin arsusitanakapjam thayax apasxaraki.
[27] ¡Jumanakax wajcharus jiwayirjamäpxtawa, pachpa jaqi masimarus jumanakax aljantirjamäpxtawa!
[28] Uñkatapxitaya, k'arisir jaqïtcha, sapxita.
[29] Amuyt'asipxam, jan kunsa ina ch'usat parlapxamti; nayan chiqapar arsutax jaysapxam.
[30] ¿Jumanakasti k'ari jaqïkirista ukhamti amuyapxista? Jan ukax, ¿jan amuyt'asakich parlpachätxa?