[1] Tatitusti Job chacharux mä jach'a thaya taypitpach parlanïna:
[2] ¿Khitïtas jumax nayan yatiñ kankañaxat pächasiri, pachpa arunakamamp jan yatitamsa uñacht'ayañatakixa?
[3] Jichhax jan axsarirïtam uñacht'ayita, aka jiskt'anakar arusxatarakita.
[4] Nayax aka uraqi utt'aykäyäta ukapachasti ¿kawkinkarakïyätasti? ¡Jumatix chiqpacha sum yatsta ukapachax sitaya!
[5] ¿Khitirak aka uraqin ukch'äñapatak arsusti, khitis aka uraqi ukham lurixa?
[6] ¿Kunxar utt'ayatas taqpach uraqixa? ¿Khitis thurxäsir qala uchantixa?
[7] ¡Jumax janiw ukankkäyätati, qhanjtanir warawaranakan q'uchuñapkama, alaxpacha angelanakaxan kusisiñapkamaxa!
[8] Jach'a qutax uraqi manqhat mistunkän ukapachax, ¿khitis uka umanak jark'añatak punkunak uchantixa?
[9] Nayaw ukarux mä isimpjam qinayanak muyuntayta, wawa isimpjamaw urpumpi llawuntarakta.
[10] Nayaw jach'a qutarux qurpa uskta, punkunakapsa jist'añampiw jist'antarakta.
[11] Ukatsti qutarux saraktwa: “Akakamakiw purinïta, ukat khursarusti janiw makhatätati; akkharuw jach'a mathapinakamas t'unasirakini” sasa.
[12] Jan ukax ¿kunapachach jumax uru qhanjtaytaxa, intirusa mistuniñapatak mayiraktaxa?
[13] ¿Kunapachach jakañaman aka uraqir sista, ñanqha lurir jaqinakar jaqunukuñapatakixa?
[14] Kunapachatix machaq urun qhanapax, qullu qhipäxanakat uñstaniwayi ukapachasti;
[15] ñanqha lurir jaqinakax janiw urun qhanapamp walt'asipkiti; ukapachaw ch'aman kankañapax tukusiwayxi.
[16] ¿Jumax jach'a quta manqhanakkam manttati, kawkhattix jach'a qutanakax sartanki uk uñjtati?
[17] ¿Kawkhankis axsarkay jiwañan punkupaxa, uk yattati?
[18] ¿Aka uraqin jach'ätapsa amuytati? ¡Chiqpachan taqi kun yatsta ukax, sitaya!
[19] ¿Kawkin imatäskis qhanampi, ch'amakanakampixa?
[20] ¿Jumasti ukanakar mä thiyakam puriyañ yattati, ukat utjäwipar kuttayaniñsa?
[21] ¡Walja maranakanïxatam laykux jumax yatpachätawa, uka pachatakix niy yurpachätawa!
[22] ¿Jumax purtati kawkharutix nayax khunumpi, chhijchhimp imkta uk uñjirixa?
[23] Nayaw llaki pachanakatak taqi ukanak imta, jan walt'añ urunakan apayaniñataki, ch'axwäwi urunakan apayaniñatakisa.
[24] ¿Qhixu qhixunakan kawsaru saratapsa yattati? ¿Inti jalsu thayan uraqir kunjäm thayt'atapsa yattati?
[25] ¿Khitin jallu purxatayatapsa, jach'a thayarus thakhip uñacht'ayatap yattati?;
[26] ¿Khitin wasar uraqin jallu puriyatapsa, kawkhantix jan khitis jakki,
[27] uka waña uraqinak qarpatapsa, ukan quranak ch'ichtayatapsa yattati?
[28] ¿Khitirak jallumpiru, sullampiru utjayisti?
[29] ¿Khitirak chhullunkhayampiru, qaqawarampiru utjayarakisti?
[30] ¿Khitirak umanak chhullunkt'ayisti, jach'a qutanaksa luxt'ayarakisti?
[31] ¿Jumätati Pléyades warawaranakar tantachirixa, Orión warawaranakar willitatirisa?
[32] ¿Jumätati qhantati warawarar wakisitapar mistuyirixa? ¿Jumätati Osa Mayor, Osa Menor, sat warawaranakar irpirixa?
[33] ¿Yattati jumax alaxpach apnaqäwi kamachinakxa? ¿Jumati uka kamachinakarjam aka uraqin apnaqaraktaxa?
[34] ¿Jumasti qinayanakan ist'añapkam art'asismati jumaru umampi chhaqtayañapatakisti?
[35] ¿Jumati qhixu qhixunakar sarañap uñacht'aytaxa? ¿Qhixu qhixusti “Akäsktwa” sasati jaysaraktamsti?
[36] ¿Khitirak ibis jamach'ir yatiñ churi, wallparus amuyt'a churarakisti?
[37] ¿Khitirak wali ch'ikhi kankañani qinayanak jakht'añatakisti? ¿Khitirak uka qinayanakat jalluyanirakispa,
[38] laq'ax ñiq'ir tukuñapataki, khulanakas mayaruk tukuñapatakisti?
[39] ¿Jumat qachu leonanakatak manq'añ thaqharaptaxa, qallunakapan sist'asiñkam manq'apxañapataki,
[40] putunakapar imantasipki ukapacha, jan ukax, qura taypin qhamisiyasipki ukapachasti?
[41] ¿Khitirak allqamarinakar manq'ayisti, chhiwchhinakapax manq'a thaqhas aywinaqapki jach'at ch'isiqis manq'añ mayipkitu ukapachasti?