[1] Yesus Ala bake yori feyahafungguka, Égé Éné murid Égé kotoféyahana yoho kumu kotoféri uré Kidron ékému tinggeméri onuguna. Ékému giyong debahae-zaitun kuhunsumahana de égena. Damu Yesus kumu Éné murid Égé kotoféyahana yoho kumu giyong ékému osuguna.
[2] Yesus kumu Éné murid yoho kumu kotoféri ogori bahasumahana, emohoni Yudas Yesus Égéki éné kufe yoho bake séséni yohoné moho égé hate giyong égéki mése nafamoho.
[3] Damu Yudas égé ahu gogo hafuyeri ékému hohona: Égé Roma nahu yohona tentara gogo kamisige damu ahu-tentara Ala Éné Afahang etori bahana yoho kotoféri hafuyeri hohona. Ahu-tentara yoho ahu-imam yohona ahuhabang yoho damu Farisi nahu yohosé yohonani hohona. Damu ahu énéyuhuwoho hohona égéki, dibisi kemeyeri hohona damu siya-pelita kumu siya hayang kumu ememere yeri hohona.
[4] Yesus Égé ukukuwoho Égé wokumu awe ifiyo-tifiyomenané mahana égéki mése nafamohoni, Égé méséri ogori yohoki takenaméri yoho bake abamu yoho, "Gugute ahu mekenoho niye yagugunae?"
[5] Yoho dagenaka, utuhu haméri emiyohona, "Yesus Nazaret nahu Égé néré," emiyohona. Damu Yesus utuhu haméri emiyoho, "Ahu Égéki Nu séré." Ememere yoho égéki, Yudas, uku Yesus Égéki Éné kufe yoho bake kurohoné moho, égé de yoho kotoféri égena.
[6] Damu Yesus yoho bake "Ahu Égé Nu séré" ememere yoho égéki, yoho dakamu gigimu mo negemoho ékému ogori pisanggiféri soho teyo ékému ogusuguna.
[7] Damu Yesus tafe yoho bake abamu yoho, "Gugute ahu mekenoho niye yagugunae?" Ememere abamu yohoni, yoho utuhu hamahana, "Yesus Nazaret nahu Égé néré," emiyohona.
[8] Damu Yesus emiyoho, "Nu mése yoré Nuki Yesus kéré. Gugu Nanini yagufunangkumaka, Nané murid yoho meneféyané kusumu ahanané," emiyoho.
[9] Damu Yesus Éné murid yoho niye u ememere yoho égéki Égé mumangge Ala bake u yoho yaki u égéki hamu hanéri katugo haiyangmu égé. Égé mumangge Ala bake u yoho yaki, "Nabo, Gu ahu Nu bake kuraki égéki ahu fe fani modini égé anigiyon deyoho," emiyoho yaki.
[10] Damu Simon Petrus tahae piyaha yeri égéni, égé éné sabo ékému adibimoho dahaka, damu ahu fe éné fi Malkus éné sunto afi auwa mene égéki inggemohoni, peroho migi. Ahu fe égé ahu-imam yohona ahuhabang esumu asuféri baha éné furubo yahate aneséyang fani yaha de égé kéré.
[11] Damu Yesus Petrus égé bake yori emiyoho, "Gané tahae piyaha égé dakumu éné sabo ékému kusunu oguwoné. Nu kugutoméré égéki Nabo mése Nu bake kuroho. Emohote, gu fimohoni Nu awe fani kugutome deyohoe? Karawoho. Nu esemu kugutome méré," emiyoho.
[12] Ememere emohoka, Roma nahu yohona tentara gogo kamisige damu yohona ahuhabang damu Yahudi nahu yohona tentara Ala Éné Afahang etori bahana yoho Yesus Égéki berahae yeri damu Éné bero yuhu féri aragena.
[13] Ememere damu ahu Yesus berahae yahana yoho Égé yeri Hanas bake hohona. Hanas égé uku Kayafas énahamo énabo kéré. Damu Kayafas égéki sufébégé baha égéki ahu-imam yohona ahuhabang esumu asuféri baha égé séré.
[14] Damu Kayafas égé sufébégé feki Yahudi nahu asuféri bahana yoho bake ememere mése yohona akiya kuraki égé séré: "Nugu Yahudi nahu gogoyaha kamisigemu beriya nugu niye ahu kamisige akumongkumaki, manggohokigi."
[15] Simon Petrus kumu Yesus Éné murid fe égé kumu kotoféri Yesus Éné mo kumu hohona. Yesus Éné murid fe égé mése ahu-imam yohona ahuhabang esumu asuféri baha énohogi kiri baha. Emohoni, égé ahu-imam yohona ahuhabang esumu asuféri baha éné afahang pama kumu osuguna.
[16] Emohote, Petrus égé damu pama hai siri afite gumahana ékému égé. Emohoni, Yesus Éné murid fe, ahu-imam yohona ahuhabang esumu asuféri baha énohogi kiri baha égé dakamu musuri hai siri afiteto gumahana ékému deri yang fe afite etori baha égéki gebuuri kotoféri sisi yohonaka, damu égé Petruski yeri hai womu kumu osuguna.
[17] Damu yang égé afahang ékému furubo yeri égé égésé Petrus bake abamu yoho, "Gute hate Yesus Éné murid Égé kotoféyahana feki rahamohoe?" Ememere abamu yohoni, Petrus utuhu haméri emiyoho, "Karawoho," emiyoho.
[18] Asu égéki esemu toukigi. Emohoni, ahu yohonabo Hanas éné furubo yeri bahana nahu yoho damu ahu-tentara yoho indo kunggunaka, damu méséri tingaumukuni tousiri égena. Petrus hate ékému ogori yoho kotoféri méséri tousiri égena.
[19] Petrus égé ememere damu emoho égéki, anggo feki ahu-imam yohona ahuhabang esumu asuféri baki Hanas égé Yesus bake abamu yoho, "Ahu mekenoho yohosé Gané murid Gu kotoféyahanae? Damu Gu u makerahae yoho bake yori yokukubumohoe?"
[20] Emiyohoni, damu Yesus ahu égé bake utuhu hamoho, "Nu mése ahu emu-hori-daha yohona sama kumu haharemu yosuméréni, dagena. Nu mése Yahudi nahu Nuguna sunafahang ékému damu Ala Éné afahang pama ékému osuri yokukubuméré. Nu u fe fani fake-fakemu yoré deyoho.
[21] Emohoni, u égéki gu Nu bake fani abamu yohon deyoho. Damu u makerahae Nu yoré égéki ahu yohosé esemu nafamahana. Emohoni ahu Nané u dagena yoho bake abamu nou," emiyoho.
[22] Damu ahu-tentara fe Ala Éné Afahang etori baha égé Yesus ita kumu méséri égé. Damu égé Yesus u yoho égéki dagika, damu égé bero tahaeméri Yesus ifiyori yori emiyoho, "Gu fani mokigi de ahu-imam yohona ahuhabang esemu asuféri baha égé bake utuhu ememere haméri yohoe?" emiyoho.
[23] Damu Yesus utuhu haméri yori emiyoho, "Kageto Nu u yoré ékému poréyahamu de éyongkumaki, Nu bake kubumu nou. Emohote, Nu u makerahae yoré égéki haiyangkumaki, gu makemohore Nu ifiyohoe?" emiyoho.
[24] Damu Hanas yohoni, ahu-tentara yoho Yesus Éné bero yuhu aragenaka, damu yeri ahu-imam yohona ahuhabang esumu asuféri baha éné fi Kayafas bake yeri hohona.
[25] Emohote, Simon Petrus uku hate ékému uku damu éri tousiri égena. Damu ahu ékému égena yoho Simon Petrus bake abamu yohona, "Gu hate Yesus Éné murid Égé kotoféyahana fe kere?" Ememere abamu yohonate, Petrus égé amageiméri yori emiyoho, "Nu karawoho," ememere yoho.
[26] Damu Petrus ahu éné sunto inggemoho éné yahagisi fe ahu-imam yohona ahuhabang esumu asuféri baha éné furubo yeri baha égé ékému de baha. Égé Petrus bake yori emiyoho, "Kageto Yesus kotoféri giyong ékému égena égéki guki rahamohoe? Nu guki etoré," emiyoho.
[27] Emiyohoni, Petrus dagika, damu hate tafe amageiméri ememere yoho, "Nu deyoho." Damu ememere u yohoto ékému ayamu u yoho.
[28] Damu Yahudi nahu asuféri bahana yoho yohonani, ahu-tentara yoho Kayafas éné afahang ékému Yesus yeri hori ahuhabang-gubernur éné afahang esumu fikokigi ékému ogahana. Ogahana égéki mimi asituhu sawa mataha. Damu Roma nahu yohona ahuhabang-gubernur égé Yahudi nahu deyoho, damu fani Ala Éné u dari baha deyoho. Emohoni, Yahudi nahu yoho fani ahuhabang-gubernur éné afahang osuguna deyoho. Yoho yohona yahae akiya yohonani, yoho Yahudi nahu de yohona afahang atunangkumaka, Ala fimohoni yoho poréyahakigi. Damu yoho fani Sawa-Paskah éné ohoru arenan deyoho. Emohoni, yoho fani afahang ékému osuguna deyoho.
[29] Yoho ememere pama kumu bahanani, ahuhabang-gubernur Pilatus égé pama kumu musuri hori yohoki gebuuri yoho bake yori emiyoho, "Ahu nogo u makerahae keiyongmu emohoni, gugu égéki kubuméri ditini yohonae?" emiyoho
[30] Damu yoho utuhu haméri yori emiyohona, "Égé ukukuwoho fe fani keiyongmu emon dekumaka, Nugu Égé fani yeri nabo ahuhabang-gubernur gu bake fani defeyan deyoho," emiyohona.
[31] Damu Pilatus égé yoho bake yori emiyoho, "Guku fake Égé yeri hori efefeméri Égé ukukuwoho fe poréyahamu emoho égéki guguna yahae hukum yohona hamu hanéri yori inggenané." Emiyohoni, damu Yahudi nahu asuféri bahana yoho utuhu haméri yori emiyahana, "Nugu nuguna na karawe. Ahu fe fani poréyahamu emowané akumon deyoho," emiyahana.
[32] Damu yoho Yesus esumu akumoné ememere katugo u yohona égéki mumangge Yesus Égé Uku akumoné moho éné u yori yoho yaki égéki hamu hanéri katugo haiyangmu égé.
[33] Damu ahuhabang-gubernur Pilatus dakamu éné afahang fikoyaha osugu. Damu égé ahu yoho bake yohoni, yohote hori Yesus yeri Pilatus bake deri sama kumu kufiyahana. Damu Pilatus Yesus bake abamu yori emiyoho, "Haiyangre? Gu Yahudi nahu yohona Ahuhabang re?"
[34] Damu Yesus utuhu hamoho, "U yoho égéki guku gané sifingmu fimiri yoho rahamohoe? Hate ahu fe yoho Nané sisi égéki gu bake yohonare?" emiyoho.
[35] Damu Pilatus égé yori emiyoho, "Nu éré nogoki Yahudi nahu ré gu ememere fimohoe? Nu fani Yahudi nahu deyoho. Guku u emoho égéki Gané go yoho damu ahu-imam yohona ahuhabang esemu asuféri baha égé kotoféri Gu yeri nu bake dahana. Gu u makerahare poréyahamu emohoe?" emiyoho.
[36] Damu Yesus utuhu hamoho, "Ahu fe soho nokumu baha égé Nu bake Nané na kurohoni, Ahuhabang kiri soho nokumu Nanahu yohoki hafuféri bere deyoho. Ahu yoho Nuki kubumu yohoni ahuhabang-raja kiri soho nokumu bahana yoho gahakumu bahaekumaki, Nané murid Nu kotoféyahana yoho Nané niye awe takini arufonan kiyoho, damu Nuki fani Yahudi nahu asuféri bahana yoho bake kurohonan de kiyoho. Nané na Ahuhabang kiri bere nogoki ahu soho nokumu bahana yoho fani Nu bake kurahana deyoho," emiyoho.
[37] Damu Pilatus égé Yesus bake abamu yoho, "Haiyangre? Gu Yahudi nahu yohona Ahuhabang re?" Emiyohoni, Yesus dari utuhu hamoho, "Gu Nure emiyoho Ahuhabang ré. Ememere iri yoho égéki haiyangne. Nu Ala Éné u haiyangmu égé égéki yobuwoméri yahae niye wadi Nu asufiyoho damu Nu soho nokumu dere. Ahu Ala Éné u haiyangmu égé nogoki hanikéri areyongkumaki, ahu égé Nu u yoré égéki dari hanikéri haiyangne ememere fimiri bohoné," emiyoho.
[38] Damu ahuhabang-gubernur Pilatus égé Yesus bake abamu yoho, "U haiyangmu égé égéki nugu makemere nafamane?" ememere abamu yoho. Damu ahuhabang-gubernur Pilatus égé u ememere yohoka, damu éné afahang fikoyaha ékému dakamu musuri Yahudi nahu yoho bake hori yori emiyoho, "Ahu égé u fe fani keiyongmu emoho égéki fani gebuuri deyoho.
[39] Sufébégé hamu Sawa-Paskah kubu geisuméri bahana égéki ahuhabang-gubernur nu mése Yerusalem busu fikoyaha ékému u ememere emesuméré; Yahudi nahu gugu ahu aburoho bui womu kumu bahana ékému ahu fe éné fi ainangkumaka, nu dari ahu éné fi iri yahaeni, nané tentara yoho hori afite abuwoméri ahu égéki bui kumu suhungfiyosumahana. Emohoni, nu awe Yahudi nahu guguna Ahuhabang ememere iri yohona égéki nokumu suhungfiye. Gugu makerahare fimahanae?"
[40] Emiyohoni, dagenaka, yoho u hanggeramu yori emiyahana, "Fani ahu nogo suhungfiyon deyoho, menefé! Emohote, Barabas suhungféna," ememere yohona. Barabas égé mése tahae damu dibisi féri dosa yaha égé séré.