[1] Yesus kumu Éné murid Égé kotoféyahana yoho kumu bohohona égéki, ahu fe énéni koku womu kumu kiyo ketanggi bahani asufiyaki égéki etohona.
[2] Damu Éné murid yoho Yesus bake abamu yohona, "Bafa-Guruwa, ahu mekenohosé dosa yaha, emohoni ahu nogoki énéni modu kumu kiyo ketanggini, asufiyohoe? Uku dosa yaha rahamo énéni kumu énabo kumu dosa yahana rahamohoe?"
[3] Abamu yohonani, Yesus dari utuhu hamoho, "Fani égé dosa yaha égéki emohoni, éné kiyo ketanggini baha deyoho, damu hate énéni kumu énabo kumu yohona dosa yahana égé deyoho. Emohote, uku ememere égéni, Ala Éné habigiyo féri ahu égéki awe degemu emoné, égé haniyakiné. Emohoni, ahu yoho awe Ala Éné habigiyo féri emoho égéki etohonané.
[4] Ala Nuki kubumu yohoni dere, damu Ala Éné furubo Nu bake kuroho. Emohoni, sawa kakani hori égé gahakumu Nu kumu gugu kumu kotoféri beriya nogoki, Ala Éné furubo Nu bake kuroho égéki Nugu yeri esumu emowa. Fani kebekin de bagumu asu kiné, emohoni ahu fe fani furubo yeri kukuwoho fe emon deyoho.
[5] Nu soho nokumu damu bere nogoki, ahu soho nokumu bahana yoho niye kakani hori égé gahakumu bere. Kakani hori égéni, ahu soho nokumu bahana yoho asuguguto kumu égena égéki etohona. Hamemere Nu emeni, ahu yohote Alaki nafamenané."
[6] Yesus ememere yohoka, Égé soho ékému mise siuguka, damu bero féri soho ékému afufumoho yaki horéyahakéri égéni, damu yeri ahu kiyo ketanggini baha éné kiyo ékému afunggu.
[7] Damu Yesus égé bake yori emiyoho, "Nohoi. Hori oho uwahae Siloam ékému damu gané kiyo oho uroho kunu!" (Yahudi nahu yohona u Siloam éné u feki kubumu yohoni daha kéré.) Damu ahu égé hori oho uwahae ékému éné kiyo oho uroho kunggu. Ememere emohoka, damu égé dakamu daha égéki éné kiyo daneri etoho.
[8] Emohote, égé ememere daha égéki, éné matahai éné afahang ita égena yoho damu ahu tuhuremu yoho emiyahana, "Ahu kiyo ketanggini baha égé posuyahaki beri aneséyang fe kuro ememere yosumoho égésé rahamohoe?" emiyohona.
[9] Damu égena ékému tuhuremu yoho utuhu hamahana, "Haiyangne, Égé séye." Emiyohonate, ahu tuhuremu yoho hate yori emiyahana, "Égé deyoho. De uku ahu kiyo ketanggini baha éné ketobégéki hamu hanigi," ememere yohona. Emohote, ahu kiyo daneri égé égé yori emiyoho, "Haiyangne. Nu posuyaha kiyo ketanggini baméré Nu séré," ememere yoho.
[10] Emohoni, ahu yoho égé bake abamu yohona, "Makemere emohoni, gu kiyo daneri etohoe?" emiyohona.
[11] Damu égé utuhu hamoho, "Ahu Éné fi Yesus Égésé soho ékému mise siuguka, damu soho ékému afufumoho yaki horéyahakéri égé damu yeri nané kiyo kumu afungguka, damu Égé nu bake yohoni, nu hori oho uwahae Siloam ékému hori nané kiyo oho uroho kunini, nané kiyo manggohokigini, daneri damu etoré," ememere yoho.
[12] Damu yoho tafe égé bake abamu yohona, "Ahu Égéte makuma kumu ége?" Damu égé utuhu hamoho, "Nu fani nafaméré deyoho," ememere yoho.
[13] Yesus soho ékému mise siuguka, soho ékému afufumoho yaki horéyahakéri égé damu yeri ahu kiyo ketanggini bamoho éné kiyo ékému afungguni, éné kiyo daneri etoho. Yesus emoho égéki Sawa-Sabat, Yahudi nahu gemu bahana éné sawa kiye. Emohoni, ahu katugo kiyo danegi éné matahai éné afahang ita égena yoho etohonaka, égéki yeri Farisi nahu éné gogo égena ékému hohona.
[15] Damu Farisi nahu yoho égé bake abamu yohona, "Gute makemereye gané kiyo daneri etohoe?" Damu ahu égé utuhu hamoho, "Yesus Égé soho ékému mise siuguka, damu yeri nané kiyo ékému afungguka, damu yohoni nu hori nané kiyo oho uroho kunini, damu nané kiyo daneri etoré," emiyoho.
[16] Damu Farisi nahu tuhuremu ékému égena yoho Yesus Éné sisi égéki yori emiyohona, "Ahu Nogoki Sawa-Sabat, Yahudi nahu nugu gemu beriya éné sawa égéki furubo yeri Musa éné hukum égéki fani dari baha deyoho. Emohoni, Ahu Nogo bagumu fani Ala kusumohoni soho nokumu daha Égé deyoho," emiyohona. Emohote, ahu tuhuremu yori emiyohona, "Fani ememere égé deyoho. Ahu dosa wiyaha baha égé fani Ala Éné habigiyo féri ukukuwoho-mujizat emohoni ahu kiyo ketanggini baha égé kiyo daneri etohon deyoho," emiyahana. Yoho égena ékému gogo hamu yohona sifingmu deregemu fifimiri yohona.
[17] Damu Farisi nahu yoho ahu kiyo danegi égé bake abamu yohona, "Ahu gané kiyo ketanggini baha égéki emohoni daneri etohoni, gute Ahu Égéki makemere fimohoe?" Emiyohonani, ahu égé utuhu haméri emiyoho, "Égé Uku ahu-nabi fe ye," emiyoho.
[18] Emohote, Farisi nahu yoho fani ahu égé kiyo ketanggini bamohote, katugo éné kiyo daneri etoho éné u égéki dagenaka, fani haiyangne ememere fimahana deyoho. Emohoni, Farisi nahu yoho yohonani, ahu fe hori énabo damu énéni yoho bake yohonani dahana.
[19] Dahanani, yoho énabo damu énéni yoho bake abamu yohona, "Nogoki gugunamu besing kere? Gugu yori emiyohona, 'Ofo nogoki énéni asufiyohoni kiyo ketanggini baha,' ememere yakena égé kere? Ememere yakenate, makemere égé kiyo daneri etohoe?" Ememere abamu yohona.
[20] Damu énabo kumu énéni kumu yoho utuhu haméri emiyohona, "Haiyangne. Égé nugunamu kiye, damu égé uku kiyo ketanggini énéni asufiyakiré.
[21] Emohote, égé makemere kiyo daneri etoho nogoki nugu fani femu nafamériya deyoho. Damu ahu mekenohosé éné kiyo emohoni, daneri etoho nogoki hate fani nafamériya deyoho. Égé uku mése ahuyaha we. Maha égé bake abamu nouwané. U makerahae égé égéki égé awe pumise yohoné," emiyohona.
[22] Énabo damu énéni Yesus emohoni yohonamu éné kiyo daneri égé égéki nafamahanate, Yahudi nahu asuféri bahana yohoki mokéri bahana. Yahudi nahu asuféri bahana yoho mése u kutumu yori ememere inggemahana: Ahu menohosé emiyohoni Alasé Yesus Égéki kubumohoni Égéte Ahuhabang kiri baha ememere yohongkumaki, ahu égé fani Yahudi nahu nuguna sunafahang osuri kotoféri sembayang yeri Ala Énaukumon deyoho. Ememere yohonani, énabo damu énéni yoho Yahudi nahu asuféri bahana yohoki mokéri bahana. Emohoni, énéni kumu énabo kumu ememere utuhu haméri yohona, "Uku mése ahuyaha we. Maha pumise égé bake abamu nouwané," ememere yohona.
[24] Emohoni, Farisi nahu yoho ahu kiyo danegi égé defen niye yohonani, ahu yohote hori égé yeri dahana. Égé tafe dahani, Farisi nahu yoho égé bake yori emiyohona, "Nugu nafamériyani Yesus Égé Musa éné hukum fani dagi deyoho, emohoni Égé dosa kemesumoho kéré. Gu awe nugu bake u haiyangmu yoho niye Ala Éné sama kumu u yahaméri nou," emiyohona.
[25] Damu ahu égé dagika, utuhu haméri emiyoho, "Yahae, nu fani nafaméré deyoho ahu égé uku dosa yaha rahamo dosa fani yaha rahamoho. Emohote, nu kamu u kamisige nafaméré anggo fe nu kiyo ketanggi bere damu katugo nogoki nu mése kiyo daneri etoré," emiyoho.
[26] Damu yoho tafe égé bake abamu yohona, "Égéte gu bake makemere emohoni, gu gané kiyo daneri etohoe?"
[27] Abamu yohonani, ahu égé utuhu haméri emiyoho, "Nu mése gugu bake yoré égé kéré. Emohote, gugu fani dagena deyoho. Makemoho niye nu u tafe yahaeni, gugu areyonane? Emohoni gugu hate Égé kotoféyonan nere?" emiyoho.
[28] Damu yoho dirimeféri yori égé bake yori emiyahana, "Gusé Yesus Éné u yohoni dari hamemahana, mite nugu nuku u makerahae Musa yaki égéki dari hamemere emesuméri beriya.
[29] Nugu nafamériyani Ala Éné u égéki kamu Musa bake yaki. Emohote, Ahu éné fi Yesus Nogoki makuma kumu daha égéki nugusé fani nafamériya deyoho," emiyohona.
[30] Damu ahu égé yoho bake utuhu haméri emiyoho, "Ha! Égé nuki emohoni nu mése kiyo daneri etoréte, gugu Yesus Égé makuma kumu daha égéki fani nafamahana deyohoe?
[31] Nugu nafamériyani ahu dosa yeri bahana yoho Ala bake u yohonate, Ala fani dagi deyoho. Emohote, Ala kamu ahu fani Ala munggu de sifing kamisigemu Alani fimiri damu Ala Éné sifing fimiri emoné moho égéki kotoféyahana yohona u dagi.
[32] Sawa Ala soho kumu hou kumu emaki ékému embahae sawa nogoki nugu fani dariyani ahu fe énéni koku womu kumu kiyo ketanggi bahaka, énéni asufiyohoni, ahu fe fani emoné kiyo daneri etoho deyoho.
[33] Ahu Égé fani Ala bahato ékému defen dekumaki, Égé Ala Éné habigiyo féri emoho ememere ukukuwoho fe fani emon deyoho," emiyoho.
[34] Damu yoho u égéki dagenaka, ahu kiyo danegi égé bake utuhu haméri yahana, "Gu gané dosa ékému asufiyohoni, dosa womu kumu fikoyahakigi. Emohote, gusé nuguki yokukubumon nere? Menefé!" Damu sawa égéki yoho ahu égé bake ememere yori uwahafungguna, "Gu fani tafe nuguna sunafahang osuri sembayang yeri Ala Énaukumon deyoho. Menefe!"
[35] Yesus dagini Yahudi nahu asuféri bahana yoho ahu kiyo daneri etoho égé bake yori Yahudi nahu yohona sunafahang womu kumu uwahafunggunani musuri pama kumu osugu. Damu Yesus Égé ahu égéki agu hori gebuuguka, damu égé bake yori emiyoho, "Gu Ahu Ala bahato ékému daha Égésé Kristus kéré ememere kirimu fimohoe?"
[36] Damu ahu égé dagika, utuhu hamoho, "Nabo, maha nu bake nou, Égé mekenohosé re? Emohoni, nu awe haiyangne Ahu Ala bahato ékému daha Égé kéré ememere fimiri bahae," emiyoho.
[37] Damu Yesus égé bake yori emiyoho, "Gu mése Ahu Égéki etaki. Damu hate Ahu Égéki gu kumu u kutumu éyoriya Nu séré," emiyoho.
[38] Damu ahu égé yori emiyoho, "Nabo, haiyangne Gu Ahu Ala bahato ékému daha Gu kéré ememere fimiri." Ememere yori égé Yesus esemu asuféri baha ememere kubumon niye Éné sama kumu bukumu tini uhung hoho.
[39] Damu Yesus yori emiyoho, "Nu soho nokumu dere nogoki ahu yohona u efefeméri yori inggeme niye dere. Emohoni, Nu awe emeni ahu yohona kiyo ketanggenani bahana yoho awe yohona kiyo daneri etohonané. Damu ahu yoku yohore emiyohonani nu kiyo daneri etoré ememere yohonangkumaka, yoho awe yohona kiyo ketanggenani bohonané," emiyoho.
[40] Damu Farisi nahu tuhuremu Yesus kumu kotoféri ékému égena yoho u égéki dagenaka, damu Yesus bake abamu yohona, "Gu fimohoni nugu hate ahu kiyo ketanggi bahana gahakumu beriyaye? Nugu Karawoho," emiyohona.
[41] Yesus dagika, damu yoho bake utuhu haméri yoho, "Gugu kiyo ketanggenani bohonangkumaki, gugu dosa fani bahana deyoho. Emohote, gugu yori emiyahana, 'Nugu kiyo daneri beriya.' Ememere yohonani, guguna dosa damu égena," emiyoho.