[1] Ahu besing fe éné fi Lazarus égé Betania busu ékému kumangkigini baha. Égé éné yahagisi yang Marta kumu Maria kumu kotoféri ékému bahana. Maria égé anggo feki yahang oho-minyak-mur gobona féri Yesus Éné bégé ékému akusumu uri damu éné habangyong féri afu-afumaki kéré.
[3] Damu Lazarus éné yahagisi yang ukuma yoho yohonani, ahu yoho hori Lazarus kumangkigi éné u égéki Yesus bake yohona, "Nabo, nuguna yahagisi Gu worumoho égé kumangkigini baha," emiyohona.
[4] Damu Yesus yoho bake yori emiyoho, "Lazarus égé haiyangne kumangkigini baha. Emohote, fani akumon deyoho. Égé kumangkigi égéki Nusé awe emeni égé awe haniyakiné. Damu ahu yoho etori Nabo Ala esumu habigiyoméri baha ememere Énaukumenané, damu hate ahu yoho Ala Énamu Nusé asuféri bere ememere Nanaukumenané."
[5] Yesus Égé Marta kumu énukuda Maria kumu Lazarus kumu ememere yohoki haiyangmu worumoho.
[6] Emohote, Yesus Lazarus kumangkigini baha éné u égéki dagika, Uku damu busu ékému edakuni bahani, asu ukuma moho.
[7] Damu ememereya, asu ukuma mohoka, Égé Éné murid Égé kotoféyahana yoho bake yori emiyoho, "Marohoné, damu nugu Yudea soho fikoyaha ékému dakamu ahaya."
[8] Damu Éné murid yoho dagenaka, damu Égé bake yori emiyohona, "Bafa-Guru, kageto nogoki Yahudi nahu yoho Guki iyobégé féri funané bemakena. Damu katugo Gu dakumu ékému ahainé bemohoe?" emiyohona.
[9] Damu Yesus yoho bake aseméri utuhu hamoho, "Sawa musuri bumusumoho daha kakani hori égé yaki hahu kigi. Damu éné sawakiyo égéki inahamahanani sawakiyo 12mu égé. Soho nokumu ememere kakani hori égé égéki ahu mekenohosé boahaingkumaki, sawa kakani hori égé égéki etori ahainé, éné bégé entate fani fun deyoho.
[10] Emohote, ahu mekenohosé asituhu boahaingkumaki, kakani hori égé égéki éné modu kumu éri fani uwaneri égé deyoho, emohoni éné bégé entate uwahainé," emiyoho.
[11] Yesus Éné u ememere yohoka, damu Égé tafe yori emiyoho, "Nuguna hogi Lazarus mése kunu igi. Emohote, égé dotohoin niye Nu ékému hori nefime dotohoné," emiyoho.
[12] Damu Éné Murid Égé kotoféyohona yoho Égé bake utuhu hamahana, "Nabo, Lazarus égé wiyahakéri kunu aiyongkumaki, égé awe haniyakiné," emiyohona.
[13] Emohote, Lazarus mése kunggu, nemohoni Yesus nafaméri égé kunuwe igi ememere yoho. Emohote, Yesus Éné murid yoho fani nafamahana deyoho. Yoho Lazarus uku damu kunu igamsumoho égéki ememere fimahana.
[14] Emoho nemohoni, Yesus u hahareméri yori emiyoho, "Lazarus mése kunggu.
[15] Emohote, de gugu nikiye Lazarus kumangkigi hokumu Nu fani éré deyoho égéki esumu manggohokigi. Gugu Nu Ala Éné habigiyo féri ukukuwoho-mujizat égéki emeni gugu etori Nu Ala bahato ékému dere ememere Nanini fimiri bohonané. Emohoni, Nané modu hanikéré. Damu marohoné, Nugu ériya nokumu kusumu Lazarus bake ahaya," emiyoho.
[16] Damu Yesus Éné murid fe Tomas. Éné fi feki Didimus. Égé Yesus Éné murid Yesus kotoféyahana yoho bake emiyoho, "Marohoné, nugu Bafa-Guru kotoféri Yudea soho fikoyaha ékému hori damu Égé kotoféri akumowa," emiyoho.
[17] Yesus kumu Éné murid Égé kotoféyohona yoho Betania busu ékému hohona. Sawa Yesus damu Éné murid yakenani, ékému ogohona. Damu dagenani ahu yoho yori emiyohona, "Lazarus mése kungguni, damu éné wosoho mése gugu defenan de égéki, iyobégéto gumahana ékému asori kufiyahanani, mése asu ukumasiyo moho, yeya niyaki," emiyohona.
[18] Betania busu fani Yerusalem busu fikoyaha kumu hamuyahamu égé deyoho. Yerusalem busu fikoyaha ékému kufiyori haméri inahamahanani, kamu 3 kilometer moho.
[19] Damu Marta kumu Maria kumu yohona yahagisi besing Lazarus kungguni, yohona modu afénan niye Yahudi nahu aburoho yoho Yudea soho emu-hori-daha bahana yoho ékému ogohona.
[20] Ememere Marta dagini ahu yoho yori emiyohona, "Yesus mése maraha." Emohoni, Marta Yesus gebufun niye musuri hohote, Maria égé damu afahang kumu baha.
[21] Damu Marta hori Yesus gebuuri Égé bake emiyoho, "Nabo, Gu nokumu bohongkumaki, emohoni nané yahagisi nogoki fani akumon deyoho.
[22] Emohote, nu nafaméré kageto nogoki Gu u makerahare fimiri baha égéki Ala bake fisini yohongkumaki, Ala Égé awe Gu u yohoto hamemere emoné," emiyoho.
[23] Damu Yesus Marta bake emiyoho, "Gané yahagisi awe dakumu dotohoné."
[24] Damu Marta dari utuhu hamoho, "Nu nafaméré égé awe sawa akimamaga ahu honubakigina yoho dotohonané mahana égéki, awe dakumu dotohoné."
[25] Emiyohote, Yesus utuhu hamoho, "Nusé ahu honubakigina yohoki emeni dakumu dotohonané, damu Nu emeni ahu yoho sifing harahaimu fimiri bohonané. Ahu Nu kotoféyahana yoho awe akumenanéte, awe dakamu dotohonané.
[26] Damu ahu esumu Nu kotoféri damu sifing harahaimu fimiri bahana yoho fani akumenané embahae posu-posukin deyoho. Emohoni, Marta, gu u nogoki haiyangne ememere fimohoe?" emiyoho.
[27] Damu Marta utuhu hamoho. "Yahae, Nabo, Nu u nogoki haiyangne ememere fimiri: Guki Ala Énamu kéré, damu Ala kubumu yohoni Ahuhabang kiri soho nokumu daha Gu séré," emiyoho.
[28] Marta u égéki ememere yohoka, damu égé éné yahagisi yang Maria bake hoho, damu égé bake sunto yokuni yoho, "Bafa-Guru de pama kumu hoyaki, damu Égé gure emiyoho, 'Do,' ememere yoho."
[29] Maria u égéki dagika, damu égé bagumu méséri Yesus bake hoho.
[30] Emohote, Yesus fani busu ékému osugu deyoho. Égé damu Marta Yesus gebuugu yakito ékému damu égé.
[31] Yahudi nahu Maria éné modu afénan niye éné afahang kumu bahana yoho etohonani Maria égé bagumu méséri hoho. Emohoni, yoho fimahanani égé Lazarus éné wosoho kufiyahana éné béng ékému hori efe aun niye hoho. Ememere fimahanaka, damu yoho égé kotoféri hohona.
[32] Maria yaki Yesus égéto ékému ogori etohoka, égé Yesus Énaukumon niye Éné sama kumu bukumu tini uhung hori Égé bake fisini yoho, "Nabo, Gu nokumu bohongkumaki, emohoni nané yahagisi nogoki fani akumon deyoho," emiyoho.
[33] Damu Yesus etohoni Maria égé efe ugu damu Yahudi nahu égé kotoféri dahana yoku hate efe uguna. Emohoni, Éné modu esumu budiyahangféri égé.
[34] Damu Yesus Égé yoho bake abamu yoho, "Lazarus Éné wosoho égéki gugute makuma kumu kufiyahanani ége?" Emiyohoni, yoho utuhu hamahana, "Nabo Ahuyaha, maha deri eta," emiyohona.
[35] Damu Yesus Uku hate efe ugu.
[36] Emohoni, Yahudi nahu yoho fete fe bake yohona, "Maha nugu etohowa! Égé esemu Lazarus égéki worumoho," emiyohona.
[37] Emohote, yoho égena ékému ahu tuhuremu yoho hate fete fe bake emiyahana, "Égésé ahu kiyo ketanggini baha égéki yohoni kiyo daneri etaki. Emohote, makemohore Égé fani Lazarus kunggu nogoki mahamu emoné, égé fani akumon de uku damu bohoné," emiyahana.
[38] Yesus Éné modu tafe esemu budiyahangféri égé. Damu Égé Lazarus éné wosoho kufiyahana éné béng ékému hoho. Éné béng égéki ahu yoho uku iyobégéto gumahanaka, éné wosoho asuri ékému kufiyahana. Damu yoho iyobégé fikoyaha fe féri éné béng to égéki ketanggena.
[39] Damu Yesus hori ahu yahamuto ékému égena yoho bake yori emiyoho, "Iyobégé égéki yekebinané dotohoné," emiyoho. Emohote, ahu kunggu égé éné yahagisi yang Marta égé Yesus bake yori emiyoho, "Nabo, ahu égé mése soho kuniyani, asu ukumasiyo mohoka, damu yeya niyaki. Emohoni, éné wosoho mése pahafumoho," emiyoho.
[40] Damu Yesus Marta bake utuhu hamoho, "Nu mése gu bake yoré: Gu esumu kirimu Nanini fimiri bohongkumaki, emohoni gu awe Ala Éné habigiyo esemu fikomu égé égéki awe etohoné," emiyoho.
[41] Emohoni, ahu yahamuto ékému égena yoho iyobégé égéki yakebimahanani otoho. Damu Yesus kerose hou etori damu emiyoho, "Nabo, degi kuroho. Gu Nané u yosuméréni, dari baha. Emohoni, Nu Gu bake degi kuroho ememere yoré.
[42] Damu Nu nafaméréni Gu Nané u égéki daraméré baha. Emohote, Nu u yoré nogoki ahu nokumu dukuméri égena yoho niye yoré. Emohoni, Gusé Nuki kubumu yohoni, soho nokumu deré u nogoki haiyangne ememere fimenané," emiyoho.
[43] Ememere Yesus Ala bake u yori feyahafungguka, damu Égé esemu u hanggeramu yoho, "Lazarus pama nokumu namusu!"
[44] Emohoni, ahu kungguni, soho kungguna égé éné béng ékému musuri pama kumu daha. Égé éné bero damu bégé égéki damu tahano koro féri aragenaka, damu hate tahano ketobégé fuhungguna égéki botowe damu égéni musuri daha. Damu Yesus ahu ékému égena yoho bake emiyoho, "Tahano koro égéki abubuwoméri meneféyané, ukuwe ahainé," emiyoho.
[45] Yahudi nahu aburoho Maria éné modu afénan niye dahana yoho Yesus Ala Éné habigiyo féri emohoni Lazarus dakamu dotoho égéki etahana. Emohoni, ahu aburoho ékému égena tuhuremu ememere fimiri bahana, "Haiyangne, Yesus Égé Kristus, u feki Ala Énamu kubumu yohoni Ahuhabang kiri baha Égé kéré."
[46] Emohote, ahu yoho égena ékému tuhuremu yoho Farisi nahu yoho bake hori Yesus Ala Éné habigiyo féri emohoni etohona éné sisi égéki yohona.
[47] Emoho nemohoni, ahu-imam yohona ahuhabang yoho damu Farisi nahu yoho u yohona égéki dagenaka, damu yohonani, Yahudi nahu gogo hamu deregemu égena yohona yeyoho matahai yoho deri u kutumu yori areyonan niye dahana. Yoho deri u kutumu yori emiyahana, "Ahu nogoki ukukuwoho Ala Éné habigiyo féri ahu yoho fani emesumahana de égéki aburohomu emesumoho. Emohoni, nugute makemere esumu emowane?
[48] Damu nugu Ahu nogo etori modiyangkumaka, Uku ememere emesuméri bohoné. Damu ahu emu-hori-daha yoho Éné u dari haiyangne Ala Énamu kubumu yohoni Égéte Ahuhabang kiri baha ememere fimiri bohonané. Ememere de bohonangkumaka, Roma nahu yoho awe fimenani Yahudi nahu nugu yohoki hagiyakéri ansakumahana. Emohoni, yoho deri Ala Éné Afahang umbuwomu abutakumenané, damu hate nuguki kotoféri homuuri gogokumenan kiyoho," emiyahana.
[49] Emohote, yoho égena ékému ahu fe éné fi Kayafas de baha. Égé sufébégé baha nogoki ahu-imam yohona ahuhabang esumu asuféri baha égé kéré. Damu Kayafas égé yoho bake yori emiyoho, "U katugo égé nogoki gugu fani femu nafamahana deyoho.
[50] Gugu esemu wayamu ukuni finané: Yahudi nahu gogoyaha kamisigemu beriya nugu niye ahu kamisige akumongkumaki, manggohokigi. Emohote, nuguna gogo kamisigemu dukuméri beriya nogoki homuuri abutakumenangkumaka, esumu poréyahakigi," emiyoho.
[51] Emohote, Kayafas u yoho égéki fani ukuni sifingmu fimoho deyoho. Emohote, égé sufébégé égéki ahu-imam yohona ahuhabang kiri esemu asuféri baha, nemohoni Ala Kayafas éné sifing wayamu emohoni, égéte nafaméri Yesus Yahudi nahu emu-hori-daha yoho niye awe akumoné moho éné u égéki moguri yoho kéré.
[52] Damu Yesus Égé awe akumoné moho égéki fani kamu Yahudi nahu yoho niye akumon deyoho. Emohote, ahu yoho awe Ala Énahu kiri soho emu-hori-daha ahahaméri bahana yoho dukuméri Ala Éné gogo kamisigemu bohonan niye akumoné.
[53] Kayafas égé Yahudi nahu asuféri bahana yohona sama kumu éyoho éné sawa égéki yoho Yesus funan niye Énahaisigina.
[54] Emoho nemohoni, Yesus Égé Yudea soho fikoyaha ékému Yahudi nahu yohona sama kumu fani kibikubumoho deyoho. Égé ékému musuri Éné murid Égé kotoféyahana yoho kumu kotoféri busu fikoyaha éné fi Efraim siyanto soho takenamu égé ékému hori bahana.
[55] Yesus ékému baha égéki Sawa Paskah, Yahudi nahu Mesir soho fikoyaha kumu fani kungguna de damu beri musuri dakena éné sawa kubu geisumahana égéki mése takenakigi. Emohoni, ahu busu-busu hamu bahana yoho yohona busu hamu égena ékému musuri Yerusalem busu fikoyaha ékému dahana. Damu Sawa-Paskah fani égé de, dakasuhumu Ala Éné Buku womu kumu Musa kara uwangki hamemere ukukuwoho emenané mahana éné sawa égéki kotoféyahana. Emohoni, Ala yohona dosa tobunsumonéka, Ala yohoki etori yoho dosa fani yahana de haiyangmu bahana ememere fimoné.
[56] Yoho ememere égena égéki, ahu-imam yohona ahuhabang yoho damu Farisi nahu yoho ahu dukuméri égena yoho bake yohona akiya yohona, "Ahu mekenohosé Yesus Égé makuma kumu baha égéki nafamongkumaki, nugu bake nouwané. Emohoni, nugu hori Égé berahe aféyané," emiyahana. Damu ahu aburoho Yerusalem busu égena yoho dagenaka, yoho Ala Éné Afahang ékému dukuméri Yesus Énini aguguméri damu u kutumu abubaméri yohona, "Gugute makemere fimahanae? Gugu fimahanani Égé awe kubu aiya mériyato nokumu defen rahamohoe?" emiyohona.