[1] Da bi a Yesu reka asɛmpa wɔ Genesaret ɔtadeɛ ho no, nnipakuo bɛkyeree ne so sɛ wɔrebɛtie Onyankopɔn asɛm.
[2] Ɔhunuu akodoɔ mmienu a afarefoɔ bi a wɔrehohoro wɔn asau wɔ mu no agya wɔ ɔtadeɛ no ho.
[3] Yesu kɔtenaa kodoɔ no baako a na ɛyɛ Simon dea no mu. Ɔka kyerɛɛ Simon sɛ ɔmpia nkɔ nsu no mu kakra sɛdeɛ ɛbɛyɔ a, ɔbɛtumi afiri hɔ akasa akyerɛ nnipa no.
[4] Yesu wiee nʼasɛnka no, ɔka kyerɛɛ Simon sɛ, “Hare kɔ baabi a ɛmu dɔ kakra na monkɔgu mo asau no na mobɛyi nam bebree.”
[5] Simon kaa sɛ, “Owura, yɛyɛɛ adwuma anadwo mu no nyinaa yɛannya hwee, nanso wʼasɛm nti, yɛbɛgu yɛn asau no.”
[6] Wɔguu asau no na wɔyii nam bebree maa anka mpo asau no retete.
[7] Wɔfrɛɛ wɔn mfɛfoɔ a wɔwɔ kodoɔ baako no mu no maa wɔbɛboaa wɔn twee asau no. Ɛnam no yɛɛ akodoɔ mmienu no nyinaa ma ma a anka ɛreyɛ amemem mpo.
[8] Simon Petro hunuu deɛ aba no, ɔbuu Yesu nkotodwe kaa sɛ, “Me wura, mesrɛ wo, firi me nkyɛn kɔ na meyɛ ɔdebɔneyɛfoɔ a mensɛ sɛ wobɛn me.”
[9] Ɛnam dodoɔ a wɔyiiɛ no yɛɛ Petro ne nʼahokafoɔ no nwanwa.
[10] Saa ara nso na ɛyɛɛ Yakobo ne Yohane, Sebedeo mma no nso nwanwa. Yesu ka kyerɛɛ Petro sɛ, “Nsuro, ɛfiri nnɛ, wobɛyɛ nnipa yifoɔ.”
[11] Wɔde akodoɔ no bɛduruu nsuo no ano hɔ no, wɔgyaa wɔn nnoɔma nyinaa hɔ bɛdii nʼakyi.
[12] Da bi a Yesu wɔ kuro bi mu no, ɔbarima bi a kwata ayɛ ne honam nyinaa bɛkotoo nʼanim srɛɛ no sɛ, “Owura, mesrɛ wo, sɛ ɛyɛ wo pɛ a, sa me yadeɛ.”
[13] Ɛhɔ ara Yesu tenee ne nsa de kaa no kaa sɛ, “Aane, ɛyɛ me pɛ. Wo ho mfi.” Amonom hɔ ara, ne ho firiiɛ.
[14] Yesu hyɛɛ no sɛ, “Wo ne obiara nni wʼayaresa yi ho nkɔmmɔ. Kɔ na fa wo ho kɔkyerɛ ɔsɔfoɔ na bɔ afɔdeɛ a Mose hyɛɛ sɛ akwatafoɔ a wɔn ho afi no mmɔ sɛ adansedie no.”
[15] Yesu anwanwadwuma a ɔyɛeɛ yi maa ne ho asɛm trɛɛ mpɔtam hɔ nyinaa maa nnipa bebree bɛtiee no pɛɛ sɛ ɔsa wɔn yadeɛ nso.
[16] Nanso na ɔtaa twe ne ho kɔ serɛ so kɔbɔ mpaeɛ.
[17] Berɛ bi a Yesu rekyerɛkyerɛ no, na Farisifoɔ ne Atwerɛsɛm no akyerɛkyerɛfoɔ bi a wɔfiri Galilea ne Yudea nkuro ahodoɔ so ne Yerusalem nso wɔ hɔ bi a wɔretie no. Saa berɛ no, na Onyankopɔn ayaresa tumi ahyɛ no ma.
[18] Mmarima bi baa hɔ a wɔso obubuafoɔ bi.
[19] Ɛsiane sɛ na wɔntumi mfa nnipakuo no mu nkɔ Yesu nkyɛn nti, wɔforoo ɛdan a Yesu wɔ mu no kɔtuu atifi tokuro, de obubuafoɔ a ɔda ne kɛtɛ so no faa mu gyaagyaa no brɛoo, kɔtoo Yesu anim.
[20] Yesu hunuu gyidie a wɔwɔ no, ɔka kyerɛɛ ɔyarefoɔ no sɛ, “Onua, wɔde wo bɔne akyɛ wo.”
[21] Farisifoɔ no ne Atwerɛsɛm no akyerɛkyerɛfoɔ no tee asɛm a Yesu kaeɛ no, wɔbisabisaa wɔn ho wɔn ho sɛ, “Hwan ne saa onipa yi a ɔreka abususɛm yi? Hwan na ɔtumi sɛ ɔde bɔne kyɛ ka Onyankopɔn ho?”
[22] Ɛsiane sɛ Yesu hunuu deɛ wɔdwennwene nti, ɔbuaa wɔn sɛ, “Adɛn nti na modwene sɛ asɛm a mekaeɛ yi yɛ abususɛm?”
[23] Yesu bisaa wɔn sɛ, “Deɛ ɛwɔ he na ɛyɛ den, sɛ wɔbɛka akyerɛ obi sɛ, wɔde wo bɔne akyɛ wo anaasɛ, wɔbɛka sɛ, sɔre na nante?”
[24] Na sɛ ɛbɛyɛ na mobɛhunu sɛ Onipa Ba no wɔ tumi sɛ ɔde bɔne kyɛ wɔ asase so nti, mereka akyerɛ wo sɛ, “Sɔre yi wo kɛtɛ na kɔ fie!”
[25] Amonom hɔ ara, ɔsɔreeɛ, yii ne kɛtɛ kɔɔ fie. Ɔrekɔ no nyinaa na ɔreyi Onyankopɔn ayɛ.
[26] Wɔn a wɔgyina hɔ no ho dwirii wɔn. Ehu kaa wɔn. Wɔyii Onyankopɔn ayɛ kaa sɛ, “Ɛnnɛ deɛ, yɛahu anwanwadeɛ.”
[27] Yei akyi no, Yesu firii hɔ kɔhunuu ɔtogyeni Lewi sɛ ɔte atogyeɛ. Ɔhunuu no no, ɔka kyerɛɛ no sɛ, “Bɛdi mʼakyi.”
[28] Ɛhɔ ara, Lewi sɔre, gyaa ne nnoɔma nyinaa hɔ dii nʼakyi.
[29] Akyire yi, Lewi too pono wɔ ne fie maa Yesu. Ɛtogyefoɔ ne nnipa ahodoɔ bebree kɔɔ apontoɔ no ase.
[30] Farisifoɔ ne Atwerɛsɛm no akyerɛkyerɛfoɔ no hunuu sɛ Yesu ne saa nnipa no ato nsa redidi no, wɔnwiinwii bisaa no sɛ, “Adɛn nti na wo ne togyefoɔ ne nnebɔneyɛfoɔ ato nsa redidi?”
[31] Yesu buaa wɔn sɛ, “Wɔn a wɔyare no na ɔyaresafoɔ ho hia wɔn na ɛnyɛ wɔn a wɔnyare.
[32] Mamma sɛ merebɛfrɛ ateneneefoɔ na mmom mebɛfrɛɛ nnebɔneyɛfoɔ sɛ wɔnsakra wɔn adwene.”
[33] Nnipa no kɔɔ so bisaa no bio sɛ, “Adɛn nti na Yohane Osubɔni asuafoɔ ne Farisifoɔ asuafoɔ no deɛ wɔtaa di mmuada, na wʼasuafoɔ deɛ daa wɔdidi na wɔnom?”
[34] Yesu nso bisaa wɔn sɛ, “Ɛho hia sɛ wɔn a wɔn ani agye, anaasɛ wɔn a wɔahyia wɔn ayeforɔ ase no di mmuada, wɔ bere a ayeforɔ kunu no wɔ wɔn nkyɛn anaa?
[35] Nanso, da bi bɛba a wɔbɛfa ayeforɔkunu no afiri wɔn nkyɛn; saa berɛ no na wɔbɛdi mmuada.”
[36] Yesu buu wɔn bɛ yi sɛ, “Obi mfa ntoma foforɔ ntare ntoma dada mu. Ɔyɛ saa a foforɔ no bɛma dada no asuane. Afei, ɛbɛma nsonoeɛ ada foforɔ no ne dada no ntam.
[37] Obiara nso mfa nsa foforɔ ngu mmoa nwoma nsa nkotokuo dada mu. Ɔyɛ saa a nsa no bɛpaapae nkotokuo no na ahwie agu na nkotokuo no nso asɛe.
[38] Yei nti, nsa nkotokuo foforɔ mu nko ara na ɛsɛ sɛ wɔde nsa foforɔ gugu.
[39] Obi nnom mmarimasa nwie mmisa mmaasa ase. Deɛ ɔnom no ka sɛ, deɛ apae no na ɛyɛ.”