[1] ང་ཚོའི་སྟོབས་ཤུགས་ཡིན་པའི་དཀོན་མཆོག༌ལ། །དགའ་སྤྲོའི་སྐད་སྒྲ་སྒྲོགས་དང་ཡ་ཀོབ༌ཀྱི། །དཀོན་མཆོག་དྲུང་དུ་དགའ་མགུའི་འུར་སྒྲ༌སྒྲོགས།།
[2] མགུར་གླུ་ལོངས་ཤིག་རྔ་དང་སྐད་སྙན༌པོའི། །སྒྲ་སྙན་དང་ནི་པི་ཝང་དཀྲོལ་བར༌གྱིས།།
[3] ཉ་ཚེས་ཉ་གང་ཉིན་དང་རང་ཅག༌གི །དུས་ཆེན་རྣམས་སུ་དུང་ནི་འབུད་པར༌གྱིས།།
[4] འདི་ནི་ཡེས་ར་ཨེལ་ཕྱིར་སྒྲིག་ཁྲིམས༌དང༌། །ཡ་ཀོབ་དཀོན་མཆོག་ཉིད་ཀྱི་སྲོལ་ཡིག༌ཡིན།།
[5] ཁོང་གིས་ཨེ་ཅིབ་ཡུལ་ལ་རྒོལ་དུས༌སུ། །ཡོ་སེབ་ཕྱིར་དུ་ཁྲིམས་སྲོལ་འདི་བཙུགས༌སོ། །བདག་གིས་ཆ་རྒྱུས་མེད་པའི་སྐད་ཅིག༌ཐོས།།
[6] དཀོན་མཆོག་ཉིད་ཀྱིས་འདི་སྐད་གསུངས་པ༌སྟེ། །བདག་གིས་དེ་ཡི་ཕྲག་པའི་ཁུར་པོ༌ཕབ། །སླེ་བོ་ཡང་ནི་ཁོ་ཡི་ལག་པར༌ཕྲལ།།
[7] དཀའ་སྡུག་ཁྲོད་ནས་འོ་དོད་བོས་པ༌ན། །ང་ཡིས་ཁྱོད་རང་བསྐྱབས་ཤིང་འབྲུག་གྲགས༌པའི། །སྤྲིན་ནག་ཁྲོད་དུ་ཁྱོད་ལ་ལན་བཏབ༌ཅིང༌། །མེ་རི་བཱ་ཡི་ཆུ་འགྲམ་ཁྱོད་ལ༌བརྟག།༼ སེ༌ལཱ། ༽
[8] ཉོན་དང་ང་ཡི་མི་རྒྱུད་ཉེན་བརྡར༌ཉོན། །ཡེས་ར་ཨེལ་གྱིས་ཉན་ན་ཅི་མ༌རུང༌།།
[9] ཁྱོད་ནང་རྒྱུས་མེད་ལྷ་ནི་ཡོད་མི༌རུང༌། །ཕྱི་པའི་ལྷ་ལ་ཕྱག་ཀྱང་འཚལ་མི༌རུང༌།།
[10] ཁྱོད་རང་ཨེ་ཅིབ་ཡུལ་ནས་ཕྱིར་ཁྲིད༌པའི། །ཁྱོད་ཀྱི་དཀོན་མཆོག་ཡ་ཝཱེ་ང་ཡིན༌ནོ། །ཁ་ཆེར་གདོངས་ཤིག་བདག་གིས་འགེང་བར༌བྱ།།
[11] ངའི་འབངས་ང་ཡི་སྐད་ལ་མ་ཉན༌ཞིང༌། །ཡེས་ར་ཨེལ་གྱིས་ང་ལ་མ་བསྟུན༌པས།།
[12] དེ་རྣམས་སེམས་རྒྱུད་གྱོང་བོར་བསྐྱུར་ནས༌ནི། །རང་གི་གྲོས་བཞིན་སྤྱད་པ་སྤྱོད་དུ༌བཅུག།
[13] ང་ཡི་འབངས་ཀྱིས་ང་ལ་མཉན་པ༌དང༌། །ཡེས་ར་ཨེལ་ངའི་ལམ་དུ་འགྲུལ་ན༌ནི།།
[14] བདག་གིས་མྱུར་དུ་དགྲ་རྣམས་འདུལ་བྱ༌ཞིང༌། །ཕྱི་ལག་བྱས་ནས་དེ་ཚོའི་དགྲ་ལ༌རྒོལ།།
[15] ཡ་ཝཱེར་སྡང་མཁན་ཟོལ་གྱིས་ཁོང་ལ༌བསྟུན། །དེ་ཚོའི་ཉེས་ཆད་ཁུར་ཡུན་རྫོགས་མཐའ༌མེད།།
[16] ཁོང་གིས་དེ་ཚོར་གྲོའི་ཕུད་གནང་བ༌དང༌། །བྲག་ནས་ཐོན་པའི་སྦྲང་རྩིས་ཚིམ་པར༌མཛད།།