[1] ཀྱེ་ཀྱེ་དཀོན་མཆོག་ངའི་སེམས་བརྟན་པོར༌གནས། །ཡིད་སེམས་ཀུན་ནས་གླུ་ལེན་བསྟོད་དབྱངས༌བྱ།།
[2] ཀྱེ་མ་པི་ཝང་སྒྲ་སྙན་སད་རན༌བྱུང༌། །བདག་གིས་སྐྱ་རེངས་གཉིད་ལས་བསླང་བར༌བྱ།།
[3] ཀྱེ་ཀྱེ་ཡ་ཝཱེ་མི་སྡེ་ཀུན་གྱི༌ཁྲོད། །ང་ཡིས་ཁྱེད་ལ་གཏང་རག་འབུལ་བར༌བྱ། །མི་རིགས་ཐམས་ཅད་དཀྱིལ་ནས་ཁྱེད་ལ༌བསྟོད།།
[4] ཁྱེད་ཀྱི་བྱམས་བརྩེ་ཆེན་པོ་གནམ་ལས༌མཐོ། །དྲང་བདེན་ནམ་མཁའི་སྤྲིན་དང་མཉམ་པས༌སོ།།
[5] ནམ་མཁའ་ལས་ཀྱང་ཁྱེད་ཉིད་མཐོ་བར༌ཤོག །གཟི་དཔལ་ས་གཞི་ཡོངས་སུ་ཁྱབ་གྱུར༌ཅིག།
[6] ཁྱེད་ཀྱིས་གཅེས་པའི་མི་རྣམས་ཐར་བའི༌ཕྱིར། །ཕྱག་གཡས་ཀྱིས་ནི་སྐྱོབ་ཅིང་ལན་ང༌གནོངས།།
[7] དམ་པའི་གནས་ནས་དཀོན་མཆོག་འདི་སྐད༌གསུངས། །བདག་གིས་རྒྱལ་ཁ་དང་བཅས་སི་ཀེམ༌བགོ །སོའུ་ཀོད་ལུང་པ་ཐག་པས་འཇལ་བར༌བྱ།།
[8] གིལ་ཨད་དང་ནི་མཱ་ན་ཤེ་ངའི༌ཡིན། །ཨེ་ཕཱར་ཡིམ་ནི་བདག་གི་རྨོག་ཞྭ༌ཡིན། །ཡ་ཧུ་དཱ་ནི་ང་ཡི་ཁྲིམས་དབྱུག༌ཡིན།།
[9] མོ་ཨབ་བདག་གི་འཁྲུད་གཞོང་ཡིན་པ༌དང༌། །ཨེ་དོམ་ཕྱོགས་སུ་བདག་གིས་ངའི་ལྷམ༌དབྱུག །ཕེ་ལེ་ཤེད་ལས་རྒྱལ་བས་དགའ་འབོད༌བྱེད།།
[10] གྲོང་ཁྱེར་བཙན་པོར་ང་རང་སུ་ཡིས༌བསྐྱལ། །ཨེ་དོམ་ཡུལ་དུ་ང་རང་སུ་ཡིས༌འཁྲིད།།
[11] དཀོན་མཆོག་ཁྱེད་ཀྱིས་ངེད་རྣམས་མ་སྤངས༌སམ། །ཀྱེ་ཀྱེ་དཀོན་མཆོག་ཁྱེད་ཉིད་ངེད་ཅག༌གི །དམག་དཔུང་མཉམ་དུ་གཤེགས་པ་མ་ཡིན༌ནམ།།
[12] མི་ཡི་ར་མདའ་ཕན་མེད་ཡིན་པའི༌ཕྱིར། །རོགས་པ་བརྒྱབ་ནས་དགྲ་བོ་འགོག་པར༌མཛོད།།
[13] དཀོན་མཆོག་ཁོང་གིས་དགྲ་རྣམས་བརྫི་འོང༌བས། །ཁོང་ལ་བརྟེན་ནས་ང་ཚོས་དཔའ་རྩལ༌མངོན།།