[1] ཡ་ཝཱེ་བདག་གིས་ཁྱེད་ལ་སྐྱབས་སུ༌བཅོལ། །ང་རང་ནམ་ཡང་ངོ་ཚར་མི་སྦྱོར༌མཁྱེན། །ཁྱེད་ཀྱི་དྲང་བདེན་ངང་ནས་ང་སྐྱོབ༌རོགས།།
[2] སྙན་གྱིས་གསན་ཏེ་མྱུར་དུ་ང་སྐྱོབས༌ཤིག །ཁྱེད་ཉིད་བདག་གི་བྲག་རི་བརྟན་པོ༌དང༌། །སྐྱོབ་པར་བྱེད་པའི་སྐྱབས་སུ་འགྱུར་བར༌ཤོག།
[3] ཁྱེད་ནི་ང་ཡི་བྲག་དང་རྫོང་ཡིན༌པས། །ཁྱེད་མཚན་ཕྱིར་དུ་འཁྲིད་ཅིང་ལམ་སྣ༌མཛོད།།
[4] ཁྱེད་ཉིད་བདག་གི་སྐྱབས་གནས་ཡིན་པའི༌ཕྱིར། །མི་ཡིས་བཙུགས་པའི་རྙི་ལས་ཐར་བར༌མཛོད།།
[5] བདག་གིས་རང་སེམས་ཁྱེད་ཀྱི་ཕྱག་ཏུ༌བཅོལ། །བདེན་པའི་དཀོན་མཆོག་ཡ་ཝཱེས་ང་རང༌བསྐྱབས།།
[6] ཕན་མེད་རྟེན་ལ་བརྟེན་པར་ང་ནི༌སྡང༌། །བདག་གིས་ཡ་ཝཱེ་ཁོང་ལ་བློ་གདེང༌བསྐྱེད།།
[7] ང་ཡི་སྡུག་བསྔལ་ཁྱེད་ཀྱིས་གཟིགས་པ༌དང༌། །ང་ཡི་སེམས་སྡུག་ཁྱེད་ཀྱིས་མཁྱེན་ཡོད༌པས། །ཁྱེད་ཀྱི་བྱམས་བརྩེའི་ནང་དུ་དགའ་ཞིང༌མགུ།།
[8] ཁྱེད་ཀྱིས་ང་རང་དགྲའི་ལག་མ་གཏད༌པར། །བདག་གི་རྐང་པ་ཡངས་པའི་སར་བཞག༌གོ །
[9] བདག་ནི་དཀའ་སྡུག་གནས་སུ་ལྷུང་བས༌ན། །ཀྱེ་ཀྱེ་ཡ་ཝཱེ་སྙིང་རྗེས་གཟིགས་སུ༌གསོལ། །སེམས་སྡུག་དབང་གིས་མིག་དང་ལུས་སེམས༌རྒས།།
[10] ང་ཡི་ཚེ་སྲོག་སྐྱོ་གདུང་དབང་གིས༌ཟད། །བདག་གི་ལོ་ཟླ་འཁུན་སྒྲ་དང་བཅས༌བཞུད། །ཉེས་པའི་རྐྱེན་གྱིས་ཤེད་ཟད་རུས་པ༌བསྐམས།།
[11] དགྲ་རྣམས་དབང་གིས་ཀུན་གྱིས་བརྙས་པར༌བྱ། །ཁྱིམ་མཚེས་མདུན་དུ་དེ་ལས་ཐུ་བ༌ཡིན། །ངོ་ཤེས་ཐམས་ཅད་བདག་ལ་འཇིགས་པ༌དང༌། །ཕྱི་ནས་ང་རང་མཐོང་མཁན་བྱོལ་ནས༌འགྲོ།།
[12] གཤིན་པོ་ལྟར་དུ་ང་རང་གཞི་ནས༌བརྗེད། །བདག་ནི་རྫ་ཆག་ལྟ་བུར་གྱུར་པ༌ཡིན།།
[13] མང་པོས་གཏམ་ངན་སྒྲོག་པ་བདག་གིས༌ཐོས། །འཇིགས་སྣང་ཕྱོགས་བཞིར་ཁྱབ་ནས་འདུག་པ༌འོ། །དེ་རྣམས་ཕྱོགས་གཅིག་འདུས་ནས་གྲོས་བྱས༌ནས། །བདག་གི་ཚེ་སྲོག་གཅོད་པའི་ཇུས་འགོད༌ཀྱང༌།།
[14] ཡ་ཝཱེ་བདག་གིས་ཁྱེད་ལ་བློ་གཏོད༌ཅིང༌། །ཁྱེད་ཉིད་ང་ཡི་དཀོན་མཆོག་ཡིན་ཞེས༌སྨྲ།།
[15] བདག་གི་མི་ཚེ་ཁྱེད་ཀྱི་ཕྱག་ཏུ༌ཡོད། །དགྲ་དང་འཚེ་མཁན་རྣམས་ལས་བདག་སྐྱོབས༌ཤིག།
[16] ཁྱེད་ཀྱི་བྲན་པོར་ཞལ་མདངས་སྣང་བར༌མཛོད། །ཁྱེད་ཀྱི་བྱམས་བརྩེའི་ངང་ནས་སྐྱབས་སུ༌གསོལ།།
[17] ཀྱེ་ཀྱེ་ཡ་ཝཱེ་བདག་གིས་ཁྱེད་ལ༌ནི། །འོ་དོད་བོས་པས་ངོ་ཚར་མི་སྦྱོར༌མཁྱེན། །སྡིག་སྤྱོད་ངོ་ཚར་སྦྱར་ནས་ཁོ་རྣམས༌ནི། །གཤིན་པོའི་ཡུལ་དུ་གྲགས་འགུལ་མེད་པར༌མཛོད།།
[18] ང་རྒྱལ་མཐོང་ཆུང་དང་བཅས་དྲང་པོ༌ལ། །ཁེངས་གཏམ་སྨྲ་ཞིང་རྒོལ་བར་བྱེད་པ༌ཡི། །རྫུན་གྱི་མཆུ་སྒྲོས་ལྐུགས་པར་གྱུར་ཅིག༌གུ།།
[19] ཁྱེད་ལ་གུས་ཤིང་འཇིགས་པ་རྣམས་ཀྱི༌ཕྱིར། །བཞག་པའི་བཀའ་དྲིན་ཇི་ལྟར་ཆེ་བ༌ལ། །དེ་ནི་ཁྱེད་ལ་སྐྱབས་སུ་འགྲོ་མཁན༌ཕྱིར། །འཇིག་རྟེན་མི་བུ་རྣམས་ཀྱི་མཐོང་ངོར༌བཤམས།།
[20] མི་ཡི་བྱུས་ངན་དག་ལས་དེ་རྣམས༌ནི། །ཁྱེད་དྲུང་ལྐོག་གྱུར་གནས་སུ་སྦ་བར༌འགྱུར། །ཁ་རྩོད་དག་ལས་གུར་ཁང་ནང་དུ༌སྲུང༌།།
[21] དགྲ་ཡིས་བསྐོར་བའི་མཁར་ནང་ང་རང༌ལ། །བྱམས་བརྩེ་ཧང་སང་བསྟན་པས་ཡ་ཝཱེར༌བསྟོད།།
[22] ཞེད་སྣང་ཁྲོད་དུ་བདག་གིས་འདི་ལྟར༌དུ། །ང་རང་ཁྱེད་ཀྱི་དྲུང་ནས་ཕྲལ་ཞེས༌སྨྲས། །འོན་ཀྱང་བདག་གིས་འོ་དོད་འབོད་དུས༌སུ། །ཁྱེད་ཀྱིས་ང་ཡི་ཞུ་བར་གསན་པ༌འོ།།
[23] ཀྱེ་ཀྱེ་ཡ་ཝཱེའི་མི་རྒྱུད་དམ་པ༌རྣམས། །ཐམས་ཅད་ཁོང་ལ་དགའ་བར་གྱིས་ཤིག༌ཨང༌། །ཡ་ཝཱེས་དྲང་པོ་རྣམས་ནི་བསྲུང་མཛད༌ཅིང༌། །ང་རྒྱལ་ཅན་ལ་བཀའ་ཆད་ནན་མོ༌གནང༌།།
[24] ཡ་ཝཱེར་རེ་ལྟོས་བྱེད་མཁན་ཐམས་ཅད༌ནི། །སྙིང་སྟོབས་བསྐྱེད་ཅིང་བློ་རྩ་བརྟན་པར༌གྱིས།།