[1] ང་དང་རྩོད་པའི་མི་རྣམས༌ལ། །ཡ་ཝཱེ་ཁྱེད་ཀྱིས་རྩོད་པར༌མཛོད། །ང་དང་འཐབ་པའི་མི་རྣམས༌ཀྱང༌། །ཁྱེད་ཀྱིས་འཐབ་མོ་མཛད་དུ༌གསོལ།།
[2] ཕུབ་དང་ཕ་ལི་བསྣམས་མཛད༌དེ། །ང་ཡི་ར་མདར་བཞེང་བར༌ཞུ།།
[3] མདུང་དང་དགྲ་སྟ་བཏོན་ནས༌ནི། །ང་རང་འདེད་མཁན་འགོག་པར༌མཛོད། །ཁྱོད་ཀྱི་སྐྱབས་ནི་ང་ཡིན༌ཞེས། །བདག་གི་སེམས་ལ་གསུང་དུ༌གསོལ།།
[4] ང་ཡི་སྲོག་ལ་རྔམ་མཁན༌རྣམས། །སྐྱེངས་ཤིང་ངོ་ནི་ཚ་བར༌ཤོག །ང་ལ་གནོད་སྐྱེལ་གྲོས་བྱེད༌རྣམས། །ཕམ་པར་གྱུར་ཏེ་གནོང་བར༌ཤོག།
[5] དེ་དག་རླུང་འཁྱེར་ཕུབ་མ༌ལྟར། །ཁོང་གི་ཕོ་ཉས་བསྐྲད་པར༌ཤོག།
[6] ལམ་ནི་མུན་ཞིང་འདྲེད་གྱུར༌ཅིག ། ཁོང་གི་ཕོ་ཉས་འདེད་པར༌ཤོག།
[7] དེ་ཚོས་དོན་མེད་ང་ཡི༌ཕྱིར། །རྙི་རྒྱ་བཙུགས་ཤིང་རྒྱུ་མེད༌པར། །ངའི་སྲོག་ལེན་ཕྱིར་དོང་བྲུས༌མྱོང༌།།
[8] དེ་ཚོར་ཆག་སྒོ་ཐོལ་གྱིས༌འབྱུང༌། །རང་གིས་བཙུགས་པའི་རྙི་རུ༌འཚུད། །དེའི་ནང་ལྟུང་ཞིང་འཕུང་གྱུར༌ཅིག།
[9] ངའི་སེམས་ཡ་ཝཱེའི་ནང་དགའ༌ཞིང༌། །ཁོང་གི་སྐྱབས་ནང་སྤྲོ་བར༌འགྱུར།།
[10] སྟོབས་ལྡན་དག་ནས་དབུལ་པོ༌སྐྱོབ། །དབུལ་ཕོངས་ནོར་མེད་ཇག་པ༌ལས། །ཐར་བར་མཛད་མཁན་ལགས་པ༌ཡི། །ཡ་ཝཱེ་ཁྱེད་འདྲ་སུ་ཡོད༌ཅེས། །ང་ཡི་རུས་པ་ཀུན་གྱིས༌ཞུ།།
[11] དཔང་པོ་གདུག་རྩུབ་ཅན་ལངས༌ནས། །ང་ལ་རྒྱུས་མེད་གཏམ་དག༌འདྲི།།
[12] དེ་ཚོས་བཟང་ལན་ངན་འཇལ༌གྱིས། །ངའི་སེམས་ཕམ་ཞིང་ཁེར་རྐྱང༌ལུས།།
[13] ཁོ་རྣམས་ན་དུས་ང་ཡིས༌ནི། །སྡུག་གོས་གྱོན་ཏེ་སྨྱུང་གནས༌བསྲུངས། །རང་སེམས་བཏུལ་ཞིང་སྨོན་ལམ༌ནི། །ཡང་ནས་ཡང་དུ་བཏབ་པ༌ཡིན།།
[14] དེ་ཚོར་གྲོགས་དང་སྤུན་ལྟར༌བྱམས། །མའི་ཕྱིར་མྱ་ངན་བྱེད་པ༌ལྟར། །མགོ་བོ་བསྒུར་ནས་སྡུག་བསྔལ༌བྱས།།
[15] འོན་ཀྱང་ང་རང་འཁྱོར་དུས༌སུ། །དེ་རྣམས་སྤྲོ་ཞིང་ལྷན་དུ༌འཚོགས། །རྒྱུས་མེད་འདུས་ནས་ང་ལ༌རྒོལ། །རྒྱུན་ཆད་མེད་པར་བརྙས་བཅོས༌བཏང༌།།
[16] མགྲོན་དུ་རྩུབ་མོ་ཚིག་གིས༌འཕྱས། །དེ་ཚོས་ང་ལ་སོ་ཡང༌འཆོས།།
[17] གཙོ་བོ་ནམ་ཞིག་བར་དུ༌གཟིགས། །བདག་སེམས་དེ་ཚོའི་གནོད་འཚེ༌དང༌། །གཅེས་སྲོག་སེང་དར་ལས་སྐྱོབ༌རོགས།།
[18] ཚོགས་ཆེན་ནང་དུ་གཏང་རག༌འབུལ། །མི་མང་ཁྲོད་དུ་ཁྱེད་ལ༌བསྟོད།།
[19] དོན་མེད་ངའི་དགྲར་གྱུར་པ༌རྣམས། །ཁྲེལ་དགོད་བྱེད་པར་མ་གནང༌ཞིག །རྐྱེན་མེད་བདག་ལ་སྡང་བ༌དག །ང་ལ་སྡང་མིག་བགྲད་མ༌འཇུག།
[20] དེ་ཚོས་ཞི་མཐུན་མི་གླེང༌ཁར། །ཡུལ་དེའི་ཞི་འཇམ་མི་རྣམས༌ལ། །འཚེ་ཕྱིར་གཡོ་སྒྱུའི་སྦྱོར་བ༌སྤེལ།།
[21] ཁ་ཆེར་གདངས་ཏེ་ང་རྒོལ༌ཞིང༌། །ཨ་ཧ་ཨ་ཧ་ངེད་ཅག༌གི །མིག་གིས་མཐོང་བྱུང་ཞེས་སྨྲས༌སོ།།
[22] ཡ་ཝཱེ་ཁྱེད་ཀྱིས་དེ་གཟིགས༌ཡོད། །ཁྱེད་རང་ཞལ་རོག་མི་བཞུགས༌མཁྱེན། །ང་དང་ཉེ་བར་བཞུགས་པར༌མཛོད།།
[23] ང་ཡི་དཀོན་མཆོག་ངའི་གཙོ༌བོ། །ཐུགས་མཉམ་བཞག་ནས་ཡར་བཞེངས༌ཏེ། །དག་འབུད་དང་ནི་ཁྲིམས་གཅོད༌གནོངས།།
[24] ཡ་ཝཱེ་ང་ཡི་དཀོན་མཆོག༌ལགས། །དྲང་བདེན་ངང་ནས་ཁྲིམས་གཅོད༌རོགས། །ངོམ་ཟིལ་སྟོན་པར་མི་མཛད༌རོགས།།
[25] དེ་ཚོའི་སེམས་སུ་ཀྱེ་མ༌ཧོ། །ཏག་ཏག་ང་ཡི་འདོད་སྟེང༌བབས། །ཞེས་སུ་སྙམ་དུ་མི་མཛད༌རོགས། །ང་ཚོས་ཁོ་རང་ཁྱུར་མིད༌བཏང༌། །ཞེས་ཀྱང་སྨྲ་བར་མི་འཇུག༌མཁྱེན།།
[26] ང་རང་སྡུག་དུས་དགའ་མཁན༌རྣམས། །ངོ་ནི་ཚ་ཞིང་གནོང་བར༌ཤོག །བདག་ལ་ངོམ་ཟིལ་སྟོན་མཁན༌རྣམས། །དམའ་འབེབས་ངོ་ཚས་ཁེབས་གྱུར༌ཅིག།
[27] ང་ཡི་དག་འབུད་ལ་དགའ༌མཁན། །སྤྲོ་ཞིང་ཀི་སྒྲ་བསྒྲག་པར༌ཤོག །ཉིད་ཀྱི་བྲན་པོ་བདེ་བ༌ལ། །མཉེས་པའི་ཡ་ཝཱེར་བསྟོད་ཅིག༌ཅེས། །དེ་ཚོས་དུས་རྒྱུན་སྨྲ་བར༌ཤོག།
[28] དེ་ནས་བདག་གི་ལྕེ་ཡིས༌ནི། །ཁྱེད་ཀྱི་དྲང་བ་གཏམ་དུ༌བྱེད། །ཉི་མ་གང་བོར་ཁྱེད་ལ༌བསྟོད།།