[1] ང་ཡི་བྲག་རི་ཡ་ཝཱེ་བསྟོད་པར༌འོས། །ཁོང་གིས་ང་ཡི་ལག་པར་འཐབ་ལུགས༌དང༌། །མཛུབ་མོར་དམག་འཁྲུག་རྒྱག་ཚུལ་བསླབ་པ༌ཡིན།།
[2] ཁོང་ངའི་བྱམས་བརྩེ་ལྡན་པའི་གཙོ་བོ༌དང༌། །ང་ཡི་རི་རྫོང་དང་ནི་བཙན་རྫོང༌དང༌། །ང་ཡི་སྲོག་སྐྱོབ་དང་ནི་ཕུབ་ཡིན༌ཞིང༌། །ང་རང་སྐྱབས་སུ་འགྲོ་ས་ཡང་ཡིན༌ནོ། །ཁོང་གིས་འབངས་རྣམས་ང་ཡི་དབང་དུ༌བསྡུས།།
[3] ཀྱེ་ཀྱེ་ཡ་ཝཱེ་མགོ་ནག་མི་ནི༌ཅི། །ཁྱེད་ཀྱིས་མི་རྣམས་ཐུགས་སུ་འཛིན་དོན༌ཅི། །ཀྱེ་ཀྱེ་འཇིག་རྟེན་མི་བུ་ཅི་འདྲ༌ཙམ། །ཁྱེད་ཀྱིས་དེ་ལ་ཐུགས་ཁུར་མཛད་དོན༌ཅི།།
[4] མི་ནི་དབུགས་ཐེངས་གཅིག་ཙམ་ཡིན་པ༌དང༌། །དེ་ཡི་མི་ཚེ་གྲིབ་མ་ནང་བཞིན༌ཡལ།།
[5] ཡ་ཝཱེ་ནམ་མཁའ་འཕྱངས་ནས་མར་ཕེབས༌ཤོག །རི་བོ་རྣམས་ལ་ཕྱག་གིས་རེག་པར༌མཛོད། །རི་བོ་རྣམས་ལས་དུ་བ་འཕྱུར་བྱེད༌དོ།།
[6] གློག་དམར་འཁྱུགས་ནས་དགྲ་རྣམས་གཏོར་བར༌མཛོད། །ཕྱག་མདའ་འཕངས་ནས་དེ་རྣམས་དཀྲོག་པར༌མཛོད།།
[7] སྟེང་ནས་ཕྱག་མར་བརྐྱངས་ཏེ་ང་སྐྱོབ༌རོགས། །ཆུ་ཆེན་དང་ནི་ཕྱི་པའི་ལག་ནས༌སྒྲོལ།།
[8] དེ་དག་ཁ་ནས་རྫུན་གཏམ་ལབ་པ༌དང༌། །གཡས་ལག་བཀྱགས་ནས་རྫུན་གྱི་མནའ་སྐྱེལ༌ལོ།།
[9] དཀོན་མཆོག་ཁྱེད་ལ་བསྟོད་དབྱངས་གསར་པ༌འབུལ། །རྒྱུད་བཅུའི་པི་ཝང་གིས་ནི་ཁྱེད་ལ༌བསྟོད།།
[10] ཁོང་གིས་རྒྱལ་པོ་རྣམས་ནི་ཐར་དུ༌འཇུག །ཞབས་ཕྱི་དཱ་བིད་སྲོག་ལེན་གྲི་ལས༌སྲུང༌།།
[11] ཕྱི་པའི་ལག་ནས་ང་སྐྱོབ་ང་སྒྲོལ༌དང༌། །དེ་དག་ཁ་ནས་རྫུན་གཏམ་ལབ་པ༌དང༌། །གཡས་ལག་བཀྱགས་ནས་རྫུན་གྱི་མནའ་སྐྱེལ༌ལོ།།
[12] ངེད་ཀྱི་བུ་རྣམས་གཞོན་ནུའི་དུས་ནས༌བཟུང༌། །ལྗོན་གསར་བཞིན་དུ་ཆེ་ཆེར་སྐྱེ་བ༌དང༌། །བུ་མོ་རྣམས་ནི་ཕོ་བྲང་ཟུར་བཞི༌ཡི། །རྒྱན་བྱེད་ཀ་བ་བཞོགས་འདྲར་གྱུར་ཅིག༌གུ།
[13] ངེད་ཀྱི་བང་མཛོད་རྣམས་ནི་འབྲུ་ཡིས༌གཏམས། །ཟས་རིགས་སྣ་ཚོགས་དེ་ལས་འབྱུང་བ༌ཡིན། །ངེད་ཀྱི་ཀླུང་དུ་ལུག་ནི་ཁྲི་སྟོང༌འཕེལ།།
[14] ངེད་ཀྱི་བ་ཁྱུ་མང་དུ་འཕེལ་བ༌དང༌། །མངལ་ཤོར་དང་ནི་འཆི་བ་ཡོད་མ༌ཡིན། །ཕྱི་རུ་བསྐྱོད་དེ་འཐབ་འཁྲུག་རྒྱག་པ༌མེད། །ལམ་སྲང་རྣམས་སུ་སྨྲེ་སྔགས་སྐད་ཀྱང༌མེད།།
[15] འདི་འདྲའི་དཔལ་ལ་རོལ་བའི་འབངས་རྣམས༌བདེ། །ཡ་ཝཱེ་དཀོན་མཆོག་ལགས་པའི་འབངས་རྣམས༌བདེ།།