[1] དཔའ་རྒོད་ཁྱོད་ཀྱིས་སེམས་ངན་ཅི་ལ༌ངོམ། །དཀོན་མཆོག་ཁོང་གི་བྱམས་བརྩེ་དུས་རྒྱུན༌གནས།།
[2] ཁྱོད་ཀྱི་ལྕེ་ཡིས་ངན་ཇུས་གཤོམ་པ༌དང༌། །སྤུ་གྲི་རྣོན་པོ་བཞིན་དུ་གཡོ་སྒྱུ༌སྤེལ།།
[3] ཁྱོད་རང་བཟང་པོ་ལས་ནི་ངན་པར༌དགའ། །དྲང་པོའི་གཏམ་ལས་རྫུན་ལ་ལྷག་ཏུ༌གདུང༌།།༼ སེ༌ལཱ། ༽
[4] གཡོ་ཅན་ལྕེ་ཁྱོད་སྲོག་ལེན་གཏམ་ལ༌དགའ།།
[5] དཀོན་མཆོག་གིས་ཀྱང་ཁྱོད་ནི་གཏན་དུ༌གཞོམ། །ཁོང་གིས་བཟུང་ནས་གུར་སྒོར་བསྐྲད་པ༌དང༌། །གསོན་པོའི་ཡུལ་ནས་རྩ་ནས་བརླག་པར༌བྱེད།།༼ སེ༌ལཱ། ༽
[6] དྲང་པོས་མཐོང་ཞིང་འཇིགས་པར་འགྱུར་བ༌དང༌། །དེ་ལ་ཁྲེལ་དགོད་བྱེད་ཅིང་འདི་བཞིན༌དུ།།
[7] ལྟོས་དང་དཀོན་མཆོག་སྟོབས་སུ་མ་བཟུང༌བར། །རང་གི་རྒྱུ་ནོར་མང་པོར་བློ་གཏད༌དེ། །གཞན་པ་བརླག་ནས་རང་ལ་ཤེད་བཅུག༌སྨྲ།།
[8] འོན་ཀྱང་བདག་ནི་དཀོན་མཆོག་ཕོ་བྲང༌ནང༌། །ལོ་འདབ་རྒྱས་པའི་སྐྱུ་རུ་ཤིང་དང༌འདྲ། །དུས་རྒྱུན་དཀོན་མཆོག་བྱམས་བརྩེར་བློ་གདེང༌བསྐྱེད།།
[9] ཁྱེད་ཀྱིས་དེ་ལྟར་མཛད་པས་ངས་རྟག༌ཏུ། །ཁྱེད་ལ་གཏང་རག་དབུལ་ཞིང་ཁྱེད་ཀྱི༌མཚན། །ཡིད་དུ་འོང་བས་བདག་གིས་རེ་བ༌བཅང༌། །ཁྱེད་ཀྱི་མི་རྒྱུད་དྲུང་དུ་ཁྱེད་ལ༌བསྟོད།།