[1] བདག་གིས་སྔར་ནས་སྤྱོད་པ་དྲང་པོར༌སྤྱད། །གཡོ་བ་མེད་པར་ཁྱེད་ལ་བློ་གཏད༌པས། །ཀྱེ་ཀྱེ་ཡ་ཝཱེ་ང་ལ་དཀར་འདོན༌མཛོད།།
[2] བདག་ལ་ཚོད་ལྟ་དང་ནི་བརྟག་པར༌མཛོད། །སེམས་དང་སྙིང་ཁོང་རུས་པའི་གཏིང་ལ༌དཔྱོད།།
[3] ཁྱེད་ཀྱི་བྱམས་བརྩེ་ནམ་རྒྱུན་མིག་མདུན༌དུ། །ཁྱེད་ཀྱི་བདེན་པའི་ལམ་ནང་འགྲུལ་བར༌བྱ།།
[4] གཡོ་སྒྱུ་ཅན་གྱི་གྲལ་དུ་ང་མི༌སྡོད། །ཚུལ་འཆོས་ཅན་དང་འགྲོ་འོང་ངས་མི༌བྱེད།།
[5] ངན་པའི་ཚོགས་ལ་ང་རང་སྡང་བ༌དང༌། །ངན་སྤྱོད་མཉམ་དུ་ང་རང་སྡོད་པ༌མིན།།
[6] ཡ་ཝཱེ་བདག་གིས་ཉེས་མེད་མཚོན་ཕྱིར༌དུ། །ལག་ཟུང་བཀྲུས་ནས་ཁྱེད་ཀྱི་མཆོད་ཁྲིར༌སྐོར།།
[7] གཏང་རག་འབུལ་བའི་འབོད་སྒྲ་བསྒྲག་པ༌དང༌། །ངོ་མཚར་མཛད་པ་ཐམས་ཅད་བརྗོད་ཕྱིར༌རོ།།
[8] ཡ་ཝཱེ་ཁྱེད་ཉིད་བཞུགས་སའི་ཕོ་བྲང༌དང༌། །ཁྱེད་ཀྱི་གཟི་བརྗིད་གདན་སར་ང༌དགའོ།།
[9] སྡིག་ཅན་ཁོངས་སུ་བདག་སེམས་མི་འཁྱེར༌ཅིང༌། །ལག་དམར་ཁོངས་སུ་བདག་སྲོག་མི་ལེན༌རོགས།།
[10] དེ་རྣམས་ལག་ཏུ་གཡོ་འཕྲུལ་ཡོད་པ༌དང༌། །གཡས་ལག་རྣམས་སུ་ལྐོག་རྔན་གྱིས་གང༌ངོ༌།།
[11] འོན་ཀྱང་ང་རང་དྲང་པོར་འགྲུལ་བར༌བྱ། །ང་རང་བསྐྱབས་ནས་དྲིན་གྱིས་བསྐྱང་བར༌མཛོད།།
[12] བདག་གི་རྐང་པ་བདེ་སྙོམས་ས་རུ༌ཚུགས། །ང་ཡིས་ཚོགས་ནང་ཡ་ཝཱེར་བསྟོད་པར༌བྱ།།