[1] བདག་ནི་ཁྱེད་ལ་སྐྱབས་སུ་མཆི་བས༌ན། །ཀྱེ་ཀྱེ་དཀོན་མཆོག་ང་རང་སྐྱོབ་པར༌མཛོད།།
[2] ཡ་ཝཱེ་ལ་ནི་བདག་གིས་འདི་ལྟར༌ཞུས། །ཁྱེད་ནི་ང་ཡི་གཙོ་བོ་ཡིན་ལགས༌ཤིང༌། །ཁྱེད་མིན་བདག་ལ་ལེགས་པོ་ཅི་ཡང༌མེད།།
[3] ས་གཞིའི་སྟེང་གི་སྐྱེས་བུ་དམ་པ༌རྣམས། །ཐམས་ཅད་བརྗིད་ཅིང་ང་རང་ཤིན་ཏུ༌དགའ།།
[4] ཡ་ཝཱེའི་ཚབ་ཏུ་གཞན་པའི་ལྷ་བསྙེགས༌ན། །དེ་ཡི་སྡུག་བསྔལ་ཆེས་ཆེར་འཕེལ་བ༌ཡིན། །དེ་ཚོའི་ཁྲག་གི་གསེར་སྐྱེམས་ངས་མི༌དབུལ། །གཞན་པའི་ལྷ་ཡི་མིང་ཡང་ངས་མི༌གླེང༌།།
[5] ཡ་ཝཱེ་ཁྱེད་ཉིད་བདག་གི་ནོར་སྐལ༌དང༌། །ང་ཡི་ཕོར་བ་ནང་གི་ཟ་སྐལ༌ཡིན། །ང་ཡི་ཐོབ་སྐལ་ཁྱེད་ཀྱིས་སྲུང་བར་མཛད།།
[6] མཐའ་མཚམས་དག་ནི་སྐྱིད་པའི་གནས་སུ༌ཆགས། །སྙིང་དུ་སྡུག་པའི་བགོ་སྐལ་ང་ལ༌ཐོབ།།
[7] ང་ལ་སློབ་སྟོན་མཛད་པའི་ཡ་ཝཱེར༌བསྟོད། །མཚན་མོར་བདག་གི་སེམས་ཀྱིས་གདམས་ངག༌གནང༌།།
[8] དུས་རྒྱུན་ཡ་ཝཱེ་ང་ཡི་མདུན་དུ༌བཞག །ཁོང་ངའི་གཡས་སུ་བཞུགས་པས་ང་མི༌གཡོ།།
[9] དེའི་ཕྱིར་ངའི་སེམས་དགའ་ཞིང་ཡིད་སྤྲོ༌ལ། །ང་ཡི་ལུས་ཀྱང་བདེ་བར་གནས་འགྱུར༌རོ།།
[10] ཁྱེད་ཀྱིས་ངའི་སྲོག་གཤིན་ཡུལ་དུ་མི༌བསྐྱུར། །ཁྱེད་ཀྱི་དམ་པ་ཁོང་ནི་རུལ་མི༌འཇུག།
[11] ཁྱེད་ཀྱིས་ང་ལ་སྲོག་གི་ལམ་སྟོན༌མཛད། །ཁྱེད་ཀྱི་དྲུང་དུ་དགའ་སྤྲོ་མཐའ་ཡས༌མཆིས། །ཕྱག་གཡས་ནང་དུ་གཏན་གྱི་བདེ་བ༌ཡོད།།