[1] དཀོན་མཆོག་སྙིང་རྗེ་མཛོད་ཅིག་སྙིང་རྗེ༌མཛོད། །བར་ཆད་འདི་དག་མེད་པར་འགྱུར་བའི༌བར། །ཁྱེད་ལ་སྐྱབས་སུ་མཆི་ཞིང་ཁྱེད་ཉིད༌ཀྱི། །གཤོག་པའི་གྲིབ་བསིལ་འོག་ཏུ་འཛུལ་བར༌བྱ།།
[2] བདག་གིས་བླ་ན་མེད་པའི་དཀོན་མཆོག༌སྟེ། །ཉིད་ཀྱི་ཐུགས་དགོངས་བཞིན་དུ་ང་རང༌ལ། །ཐམས་ཅད་གནང་བ་ཁོང་ལ་འོ་དོད༌འབོད།།
[3] ཁོང་གིས་གནམ་ནས་ང་རང་སྐྱོབ་ངེས༌ཤིང༌། །ང་ལ་རྡོག་བརྫིས་གཏོང་མཁན་རྣམས་ལ༌བཀྱོན། །༼ སེ༌ལཱ། ༽ བྱམས་དང་དྲང་བདེན་ཁོང་གིས་ང་ལ༌གནང༌།།
[4] ང་ཡི་ཚེ་སྲོག་སེང་གེའི་ཁྲོད་དུ༌ཡོད། །རྩ་མེད་གཏོང་མཁན་གསེབ་ཏུ་ང་རང༌ཉལ། །དེ་ཚོའི་སོ་ནི་མདུང་དང་མདའ་མོ༌ཡིན། །དེ་ཚོའི་ལྕེ་ནི་རལ་གྲི་རྣོན་པོ༌ཡིན།།
[5] དཀོན་མཆོག་ཁྱེད་ཉིད་གནམ་ལས་མཐོ་བར༌ཤོག །ཁྱེད་ཀྱི་ཟིལ་ཤུགས་ས་གཞིར་ཁྱབ་གྱུར༌ཅིག།
[6] དེ་ཚོས་ང་ཡི་རྐང་འོག་རྙི་བཙུགས༌ཤིང༌། །མནར་གཅོད་བཏང་ནས་ང་ཡི་སེམས་ཀྱང༌འཁུམས། །ང་ཡི་མདུན་དུ་ས་དོང་བྲུས་མོད༌ཀྱང༌། །ཁོ་ཚོ་རང་ཉིད་དེ་ཡི་ནང་དུ༌ལྷུང༌།།༼ སེ༌ལཱ། ༽
[7] ཀྱེ་ཀྱེ་དཀོན་མཆོག་ང་ཡི་སེམས་ནི༌བརྟན། །ང་ཡི་སེམས་ལ་གཡོ་འགུལ་ཅི་ཡང༌མེད། །བདག་གིས་མགུར་མ་དང་ནི་བསྟོད་དབྱངས༌འབུལ།།
[8] ཀྱེ་ཀྱེ་ང་ཡི་སེམས་ཉིད་སད་པར༌གྱིས། །པི་ཝང་སྒྲ་སྙན་རྣམས་ཀྱང་སད་པར༌གྱིས། །ང་རང་སྐྱ་རེངས་ཤར་དུས་སད་འོང༌ངོ༌།།
[9] མི་སྡེའི་ཁྲོད་དུ་གཙོ་བོར་གཏང་རག༌བྱ། །མི་རྒྱུད་ཁྲོད་དུ་ཁྱེད་ལ་བསྟོད་དབྱངས༌འབུལ།།
[10] ཁྱེད་ཀྱི་བྱམས་བརྩེ་ཆེ་ཞིང་ནམ་མཁར༌ཟུག ། ཁྱེད་ཀྱི་དྲང་བདེན་ནམ་མཁའི་དབྱིངས་དང༌མཉམ།།
[11] དཀོན་མཆོག་ཁྱེད་ཉིད་གནམ་ལས་མཐོ་བར༌ཤོག །ཁྱེད་ཀྱི་ཟིལ་ཤུགས་ས་གཞིར་ཁྱབ་གྱུར༌ཅིག།