[1] 'Doo'di Kiriisto rummeeste tuumman la orey a isohti, a is'doono gi'de.
[2] Goobassiin ka, 'doo'di atin igaranne atin martiisattaan laka kasoo'hela. A mehe 'doo'doo saggaas on u garrawwaayyo ka herti Waakh a martiiste.
[3] 'Doo'di jeelayyo kijiro laka kasoo'hela, 'dee aw ikhaba, i'doo atin laka jeelayyohaas kaleejirtaan u. Toro la 'doo'di sina lakawaaricho laka aw ikhaba, i'doo atin laka sinataas atin lakawaarichuu.
[4] Enenyet tuumman mindischo a inkaanyito. Makhaabal ichoow makhaabál ba la uus icho etoo addan leeur'din. I'di tahe Waakh 'doo'di i'daase ichoow ki soho'ddarri kaassohti rumanka a hukkuma.
[5] 'Doo'di chílim i'damaammowo iitaahana, wihi atin khabtaan on kadarga. I'di tahe Waakh wihi us yidah, “An koloo kalday laka ma kaaseeho, an koloo kalday laka ma ki'dii'do.”
[6] 'Deerka roorro laan wihi inno nadeeh, “Kamur a gargaaraaya, walah an karooro mele. Weeli enenyet mehe iyeela?”
[7] Bal 'doo'di oraate atin woye, Yeedi Waakh atin isoocheeke, kasoo'hela. Jiroti haaggane icho jireen, wihi iche desse kamalda, toro la atin laka saggichuu Waakh kakhuufa gi'de.
[8] Yeesso Kiriisto i'daaru laka ma urgiyo. Us chele ichoow maanta ichoow jirtuu tuummamba a koo kalday on.
[9] Maantaka yeedi tuummane runti Waakh tabardowsane enenyet laabcho, uus jiti mujjume atin bujin. A mehe wihi indigir atin ikhabo gololi soorriyoyyoote layaham menye, a haaggi Waakhe buurenye uurassiin miigoocho.
[10] Innohi 'doo'd Kiriistee la, chalagti kuhaaniyyohi Ya'huude eemati harratane Waakh lakawahti weyti kayeere a khabna. Kuhaaniyyohaas soorriyoyyohi icho Waakh ibahchaan ohom a mu'danyahiin. I'daasenyi wahanyeyyohi chalagteen ohom ma mu'dan.
[11] I'di tahe ayyinti oraat ka kuhaanihi weyti weene Ya'huud diiggi hoolahi Waakh liisoorriyoocho, iche sookhaata eema ka Meessi Weyti Lagan ka, jeenteti uskeeli enenyet u Waakh ibahcha. I'daasenyi jidi hoolahaas uram kharicheeda lakaguba.
[12] Yeesso laka i'daase layeele, aritti ilkerengeeteet khariche ka sina tuhuyye, yumuyye, diiggiis ka la 'doo'diis munyaache.
[13] Maantaka inno laka Yeesso uram khariche ka iiranni, lakhaanyoti usu lakadowe, inno laka a inno lakadowo.
[14] I'di tahe harrata ka ilkerengeetti weene jirtuu tuumman inno fiddiino ma khabno. I'daasenyi ilkerengeetti soosohatti, iche yowanna.
[15] Maantaka taba, Yeesso ka Waakh kol dakkhan koolinno. I'da ka kooloheen a i'di soorriyoti inno Waakh ibihinno, toro la a i'di gurnaanki enenyet af ka saggi Waakh Kamur iyahe cheeko.
[16] Haaggi atin 'doo'di addan iyeessaan ichoow gargaari atin 'doo'di addan leegisantaan la akadabina. A mehe haagga a i'di soorriyoti Waakh kahamaado.
[17] Weynaantiin wihi iche atin idowto daaga, antohicho la akutina. I'di tahe 'doo'da jeenteti us atin iyaakhicho u, koloo kalday laka ma naso. Icho la hila berri saggi icho ihaaggicheene, Waakh worsata. Cha'atin wihi icho atin idowaan raahtaan, hilicho hamaade kahaaggichaan. I'daasenyi cha'atin idaagin la, hil a leemiigoossaane, waha la indigir icho atin ibahaan mele.
[18] Waakh nah isoowaha. Wihi nah tissibno, rubeyohi suujoon nah ikacheekanne khabna, toro walah tuumman ka, nahi haag yeello 'doonna.
[19] Weyti la a atin hawwaasde, Waakh isoowaha, 'dee dowwanoha ka toro a atin isoonokhdi.
[20] Waakkhi nebey leh Yeessohi Kamureenenye Ersinki weene iiyyaate diiggi ayyinti husube jirtuu tuumman imassanne us gooche ka omoot a kasookahche.
[21] Waakh ba haaggi tuummane atin kaankhane, 'dee atin wihi us 'doono yeessaan atin siicha. Yeesso Kiriisto ka, Waakh ba miigti atin wihi us kahamaado yeessaan atin siicha. Yeesso Kiriisto ba jirtuu tuumman lasaa'da. Aamiin.
[22] 'Doo'd Kiriistokaaw, a atin hawwaasde, taba, wihi an khadaabaar rucchul ka atin iidahye uur atin miigoocho, nabah isuda gi'de.
[23] Wihi addane an atin isoocheeko, walaaleenki Timooti layadeeh jeela ka a lasoofure. Chu'us dowwa isooeleele la, a issooraahna 'dee atin sooarga.
[24] 'Doo'di atin iwewween tuumman ichoow 'doo'di Waakh tuumman bariiticha. 'Doo'di koo Kiriisteenye ili 'Deylaan kijiro, a atin soobariitiche.
[25] Waakh ba atin tuumman atin imaala.