[1] Maantaka orey isohanni, kakhuufnaanki inno Kiriisto kakhuufno ka soonnaanneti 'doo'di Kiriisto ka ii'd khabo miinsan, a raahno. Wihi Kiriisto miinsane inno kolooraat abanne i'di maanta sohoti omoot keeno inno kasoonokhanni ichoow saggi inno Waakh ikakhuufno illehe, kakunno gi'de.
[2] Soonnaanneta addan la a i'di maanta baattissiyo ichoow 'doo'di dahano lakorcho ichoow 'doo'di tuume berri omoot kasookaho ichoow saggi Waakh berri enenyet ihukkumo wihi us goocho jirtuu tuumman iyateehiin illeh kakunno gi'de.
[3] Afi Waakh ka, i'daase yeella, Kiriisto goyaka ii'downa.
[4] A mehe 'doo'di maantoo Kiriisto rummeysan katabe soolaabinti lasoolaabo icho uskeelicho kasoonokhtaan ma tateeh. 'Doo'da runti wori Waakh a abte, wihi Waakh 'doo'd siicho la rubey ka a chanchameene, icho ichoow 'doo'di addan la Rubeyti Munyee a islee'heleen.
[5] Icho rubeyohicho ka chinniti Yeedi Waakh ichoow miigti maanti Waakh enenyet soodakhti a chanchameen.
[6] Chirri icho Kiriisto kakhuufin 'diicheen, soolaabinti lasoolaabo 'dee icho uskeelicho kasoonokhtaan ma tateeh. I'di tahe icho toro Weeli Waakhe awtichuu massalaaba kakaahaane, toro usu 'dow on ka lakhaanyo kadowaan.
[7] Iyookkoka Waakh harrati bicchehi hiri 'deyo surrukhto, toro la gurnaanki indigir khabo eti gos leh ibihisso a imaala.
[8] I'daasenyi harra chi'iche kudah ichoow haraam on bihisso, indigir iche khabto mele gon. Waakh kola harrataas a fala, 'da'ddaboka la jirtuu tuumman 'dab yaham.
[9] Aalasseenyoki nah weyti 'doonno, chirri nah i'duu atin faajjiino laka, nah wa'dwaa'd ma atin kakhabno. I'di tahe saggi atin jiti deefo ribnaan raaho iraahtaane garanna.
[10] Waakh wihi imale on yeela. Usu wihi atin yeessaan ma kadabo, ommos 'dooninti atin usu tusatteen ma kadabo. 'Dooninta la mehe lakaarga ya, gargaari atin 'doo'di Waakh gargaarteene, uliba laka atin gargaartaan.
[11] Wihi nah etiimba i'doonno kallaayo, orey isohda, is'doona ichoowka jiro 'dubiche a eleesso, 'dee wihi atin Kiriisto ka khajjeessaan uba.
[12] I'da ka la wihi Waakh miinsan ka ma sey'hoottaane, i'daasenyi dabati 'doo'di samacchaar ichoow kakhuufnaanki icho Waakh kakhuufaan ka wihi Waakh ayyiche mu'dane raahtaan.
[13] Maanti Waakh Aburaaham ayyintiis igooche a daatte. Et usu kaween mele gone, chu'us daatte, magahiissa on wahe.
[14] Waakh wihi us Aburaaham iyidah, “Rumanka a kimaala, toro la nyaakhutaah a ittaawicha.”
[15] Aburaaham la geeddi deer garrahsi ka Waakh a kakhuufe, wihi goorat Waakh iayyiche 'da'ddaboka 'hele.
[16] Eti daatti tuumman magahi etoo kaweene waha, 'dee iriire massatta.
[17] Waakh 'doo'di wihi us ayyiche dalho saggi us ayta weyti imiigooche toro la us maliis iurgiyin a tusa. Jeentetuu la Waakh wihi us ayyiche ka a daatte.
[18] Waakh wihi us ayyiche ichoow wihi us daatte ma urgiyaane, been goon ma yabuu'd. Maantaka innohi Waakh inyaanne karibanne uure inno miigoocha, 'dee khajjeeli us inno siiche mujjum khabanna.
[19] Waha inno khajjeello la, jiroteen ka fiddihi roorro laan lafiddiyo khuuf inno siichaan. Eti inno khajjeel kakhabno a Yeessohi dafarti yobbeenye meel seley goosso tabe, dafartaas 'dirihiche ka meessi goyaat ikute.
[20] Yeesso la orteenna meessaas inno igele. Ulla jirtuu tuumman uumman Melkisedeek u, kuhaaniheenki weyti weene yitah.