[1] Maantaka, jeenteti wihi Waakh yeeluu, runta inno daagne weyti mujjum khabanni gi'de, uus inno inti inno isoohanni bujine.
[2] A mehe farniinki goorat Waakh herti Waakh fare a larummaache. Eti tuummane iraahine ommos daagiwwaaye la, sina loomhiche.
[3] Saggoh sina ikabahsanneey, chirri inno ribnaanki weyti haaggane Waakh inno ribo aw ikakhabin? Yeessohi Kamure rubeytiissa kolooraat ribnaanka cheeke, 'doo'di usu daage la, saggi ribnaankaas rum iyahe inno isoocheeke.
[4] Waakh rubeytiis la ribnaankaas rummaache. Saggi us irummaache la a i'da, wahanyeyyohi miigti Waakh tuso ichoow girmo ichoow wihi ittaawenye weeli enenyet yeelin iubaa'dane yeele, toro la saggi us i'doono on u, siinti Rubeyti Munyee 'doo'd gise.
[5] Waakh herti Waakh mee antohi jiroti harrati soosohatti, nah woriche kaayyeeno siiche.
[6] I'daasenyi Chiirnaanneti Waakh goyaka intoo wihi lakachiire a mehe ya, “Okkhoow, weeli enenyet a mehe kasoo'hessa, weeli enenyete khoroseebe a mehe yaakhissa?
[7] At icho herti Waakh geeddoo nucchul on kasoonuglaasse, a i'doo at 'duub korisse at saggi at iweynaasse toro la liinkaanyito at irummaasse,
[8] toro la icho eti walah tuumman anti kayeesse.” Wihi yeeda yadeeh, Waakh weeli enenyet eti walah tuumman anti kayeele, walah us kalaabte mele. I'daasenyi toolla weeli enenyet usuhi walah tuumman itoollo ma agarro.
[9] I'daasenyi wihi inno agarro a Yeessohi Waakh i'daaru herti Waakh kasoonuglaache. I'daasenyi jeenteti sina ikawaarte us iyumuy u, Waakh toolla usu 'duub a korche, weynaache, a liinkaanyita. I'da ka haaggi Waakhe buure ka, Kiriisto meessi weeli enenyet tuummane kayamuut.
[10] Waakhe walah tuumman soouume, toro la jeentetiissa walah tuumman liihaaggiche. Waakh a eysiiche maanti us Yeesso massalaaba ka sinayyohi lakawaariche ka eti tuume kayeele, 'dee nyaakhuti ittaawe goobi Waakh keena. A mehe Yeesso enenyet jiti ribnaan lakeelo tusa.
[11] Yeessohi enenyet munyaacho ichoow 'doo'di us munyaacho ba Aabbahicho a koo kaldache, a Waakh. Jeentetaas u Yeesso ma uryaawo chu'us 'doo'da a uuraaya yadeeh.
[12] Ulla wihi us Waakh iyidah, “An 'doo'di uureeye wihi at yeesse a icheeka, chirri icho kulmaane weestaan la, an a kikoolicha.”
[13] Wihi addane Yeesso yidah, “Ani Waakhe kakhuufa.” Toro la wihi us essi, “An kalla, nyaakhuti Waakh isiiche leejira.”
[14] Nyaakhutaas i'daas us yadeeh u, a weeli enenyete sar ichoow diig khabo gone, Yeesso laka uummanki weeli enenyete inno leegisme. I'daas ka omoottiis ka Seytaanki enenyet omoot ikeeno miigtiis tuumman bar a tire,
[15] toro la 'doo'di jiroticho tuumman i'di falfa eheet jeenteti icho omoot ikarooraan u, fure.
[16] Rumanka us herti Waakh mee gargaar yimiy. I'daasenyi nyaakhut nyaakhut Aburaahame gargaar yimiy.
[17] Jeentetaas u sagag tuumman ka i'di 'doo'di uuriisenye yitahye, kuhaanihi weyti weene hili Waakh ka lakakhuufo toro uur nugul yitah. Ulla toro i'dane yeele, 'dee soorriyoti holi Waakh laabto bahcha, 'dee Waakh uskeeli weeli enenyet kakuta.
[18] A mehe Yeesso rubeytiis kajmeyyohi uskeel kalug'do ka sina a kawaarte gone, 'doo'di kajmeyyohi uskeel kalug'do ka lakajo gargaarin a yabuu'd.