[1] 'Doo'di Waakh kakhuufo saggi wihi icho ikhajjeelaan isooyateehiine tissibaane, toro la wihi toolla liiargine ubaan.
[2] I'di tahe kakhuufnaanki 'doo'di goorat archiiy Waakh kakhuufe on ka, iche Waakh saggi us icho ikahamaade icheeke.
[3] Jeenteti inno Waakh ikakhuufno, iche saggi us yeedi afiis on ka us harra isoouume igaranna. Wihi toolla indo lakaargo la, wihi indo liikaargine lakasoouume.
[4] Aabel kakhuufnaanki us Waakh kakhuufe on ka, iche soorriyoti too Kaayin kussan Waakh ibahche. Jeenteti kakhuufnaankaas u, Waakh saggi usu eti fissan iyahe cheeke, soorriyotiis la kahamaade. Aabel Waakh a kakhuufe gone, chu'us toolla ijirin laka, usu a i'doo us uliba inno leeyyeedo on.
[5] Eenog la kakhuufnaanki us Waakh kakhuufe on ka ma umaatan. Noolyahaayi Waakh rubeytiis goobi Waakh geeche, Eenog lawaaye. I'di tahe geeddi liikhaatin, saggi us eti rumanka Waakh kahamaadicho iyahe iche lacheeke.
[6] Et Waakh ikakhuufine Waakh kahamaadicho mele. I'di tahe eti Waakh wahan 'doono tuumman, wihi laka'doono a usuhi saggi Waakh rumanka ijiro, toro us 'doo'di usu yowti kala'd iguto, rummeesti.
[7] Noowa la kakhuufnaanki us Waakh kakhuufe on ka, iche maanti Waakh tootooche, wihi maalinkaas liiargin icheeke, koobanhi buure dise, goobiis ribe. Kakhuufnaanki us Waakh kakhuufe ka, 'doo'di harrata uskeel igooche. Toro la Waakh usu eti fissanoonki kakhuufnaanki Waakh lakakhuufo lakeelo mu'dan iekkaache.
[8] Aburaaham la kakhuufnaanki us Waakh kakhuufe on ka, iche maanti Waakh iloo berri alaal ka siicho irte. Ulla chirri us ili us isohti igaran laka, ayti Waakh a raahe iliis kaguure.
[9] Kakhuufnaanki us Waakh kakhuufe on ka, iche ili Waakh iayyiche ka i'di eti yeelan u ili yeelan ifiddiye. Ulla i'di Isakh ichoow Yaakoobuu eemayyo igele. Icho laka ayyinti Waakh usu igooche a dalhaan.
[10] Aburaaham la saggaase ifiddiye. Waha la a jeenteti us ilkerengeetti weene daddaabohi ilaat sarche kadisane, jirtuu dakkhan jirto Waakh rubeytiis rerreege toro dise, ikhajjeelo.
[11] Aburaaham la kakhuufnaanki usu Waakh kakhuufe on ka, iche miigti usu araarri goyaka weeloo ka'helo 'hele, chirri us araarrowe Saara la mahante laka. I'di tahe us Waakkhi ayyiche eti lakakhuufo iekkaache.
[12] Kholoyyohi ittaawe 'deerka makhaabala atteka yumuy iche kayimaateen. Nyaakhuti kholoyyoha ittaaw ka a geeddi yiyyihimohi saraate toro i'di yoohti beyti buure afiche kijirtuu ekkees ma layabuu'd.
[13] 'Doo'da dakkhan la Waakh kakhuufaayi tuume. Icho la wihi Waakh iayyiche ma 'heline, toro la fogaka wihi 'dee berri sooyateeh argeene, kahamaadeen. Saggi icho harrata ka chiiy ichoow 'doo'di yeelan iyahiin 'dow ka a cheekeen.
[14] 'Doo'di i'daas essi, saggi us ili 'dee kiise iyowti, iche tusa.
[15] Chirri icho ili goorat icho kasootabeen kamasseen la, a geeddi kootte icho inokhtaan.
[16] I'daasenyi ili weyti deefo imoonaan. Waha la a goobi Waakh. Maantaka Waakh chirri us a Waakkhichooda liidah us ma kuuryaawo, a mehe usu 'doo'da ilkerengeet a idise.
[17] Aburaaham la kakhuufnaanki us Waakh kakhuufe on ka, iche maanti Waakh kaje, inankiiski Isakh layadeeh Waakh soorriyo ikabihin leheet. Aburaaham ayyinti Waakh igooche khaatte, inankiiski kaldaye keleyenye us khabe, Waakh isoorriyin leheet.
[18] Chirri Waakh goorat Aburaaham, “Isakhe nyaakhuti ittaawe ka'hessa,” iyidah laka,
[19] Aburaaham saggi Waakh Isakh omoot ka isookahcho iche kamasse. Aburaaham ka la a i'doo inankiis omoot ka liisoolaabe.
[20] Isakh la kakhuufnaanki us Waakh kakhuufe on ka, iche yeeletiisti lammee Yaakoobo ichoow Essaawo ba wihi berri sooyateeh ikaweeste.
[21] Yaakoobo la kakhuufnaanki us Waakh kakhuufe on ka, iche chirra us sooyamuut yeele Yuussuf kooba iweeste. Toro la wussiis katirriinsataayi, Waakh wahte.
[22] Yuussuf la kakhuufnaanki us Waakh kakhuufe on ka, iche chirra us sooyamuut saggi yaafohi Issiraayel berri ili Miissiri ikaguuraane, icho ilicho ikanokhtaan cheeke. Amur bahche lafohiis i'di layadeeh icheeke.
[23] 'Doo'di Muusá dele, kakhuufnaanki icho Waakh kakhuufeen on ka iche roorro laan amuri karnat bahche, nyaakhuti lallabe yaafohi Ibiraaniya tuummane labakkicho miinsan raahin 'dii'deen. Muusa uus desse, hay seyyah dakkhan dagcheen. I'di tahe Muusa weeli joon lehe eheet.
[24] Muusa la kakhuufnaanki us Waakh kakhuufe on ka, iche maanti us weynaate, usuhi weeli inanti karnati ili Miissiri lakawaho 'dii'de.
[25] Ulla usuhi jiroti uskeel keeno geeddoo rucchul on lakahamaado fiddiyo ka, usuhi isbahcho, sinati 'doo'di Waakh taham, usu laka taham gooche.
[26] Usu ka la lakhaanyoti us jeente Kiriisto i'helo leedeefta, kamurroonki us ili Miissiri ka'helo ka. I'di tahe usu kala'ddi buurenye berri Waakh guto, iche rerreege.
[27] Muusa la kakhuufnaanki us Waakh kakhuufe on ka, iche ili Miissiri kabahe, holi karnat hollowe la ma karoorin. Ulla i'doo us Waakkhi liiargin iarge u, yombohi us inokhti 'dii'de.
[28] Ulla kakhuufnaanki us Waakh kakhuufe on ka, iche 'doo'd saggi daawti Baasakka liigelo, toro la diig kho'doommeti min afafhiise lakachiiro idowdowe. I'da ka la herti Waakhe omoot teyyano tuumman ikeento, teyyanohi yaafohi Issiraayel ma bakkin.
[29] Yaafohi Issiraayel la kakhuufnaanki icho Waakh kakhuufeen on ka, iche Beyti Buurenye Guu'ddan seley igoote, harrati kafafsan itabeene, imaaheen. I'daasenyi iskarti 'doo'di Miissiri chirra icho yaafohi Issiraayel raaheen ka, chirraas on bicche khaateen.
[30] Yaafohi Issiraayel la kakhuufnaanki icho Waakh kakhuufeen on ka, iche maanti icho ibeen teeba ilkerengeetti Yeeriko kamareen, daddaabohi ilkerengeet kamarsan tuumman isoorerreyeen.
[31] Raahabti malaayee la kakhuufnaanki iche Waakh kakhuufte on ka, iche 'doo'di Waakh daagin 'dii'de liileeigaasawwaaye. I'di tahe iche 'doo'di Issiraayele 'degey irte, nebey ka a martiisatte.
[32] 'Deerka 'doo'doo addane wawwaha, bal mehe addane idaahe? I'di tahe Giidiyon ichoow Baarag ichoow Saamison ichoow Yeeftah ichoow Dawuud ichoow Saamuwel ichoow 'doo'di Waákh íyeyyeedo tuumman, chir an jiroticho kaayyeedo mele.
[33] Kakhuufnaanki 'doo'da Waakh kakhuufe on ka, iche yaafohi chiiytichee idiheene, isooricheen. Jiti fissan on enenyet kahukkumeene, wihi goorat Waakh iayyiche la 'heleen. Gaasichokoo afi bahassi a 'duu'deene,
[34] gaasoo laka 'dabi buure jiccheene, gaasoo laka 'doo'di birlabbe ka ogoos marmo kabahsateen. Icho a 'da'ddarneete, i'daasenyi miigoween. Toro la iskarti diho ka mimmiigenye chiiyo firdisso yitaaheen.
[35] Deyyeho gaasoo 'doo'di hiiyyicheenye tuume omoot lakasookahche, 'heleen. 'Doo'd gaasoo bolokkhi buurenye latuse toro furnaanki lasoofuro 'dii'de, 'dee maanti omoot lakasookahcho ka jirotoo deefto 'helaan.
[36] Gaasoo laka a lakachaarte, laajjayyo ka lajahe, gaasoo laka biingoyyo lakahide, jeelayyo lakachibe.
[37] Gaasoo dagah ka labakkiche, gaasoo seley laaggooche, gaasoo la birlabbe ka labakkiche. Gaasoo la uktohi adi gaad kayeesseene, gessateen. Icho la rumanka miskiinki marahe eheneete, sinati buure laka lakawaariche, toro la wihi suuje layeele.
[38] 'Doo'da weyti haagganeete harrata ma imalin. Icho la i'di 'doo'di meel laa u, hidaad ichoow kuro kaassohteene, toro la go'dda'd ichoow lumam igeleen.
[39] 'Doo'da tuumman jeenteti icho Waakh weyti ikakhuufeen u, saggi Waakh icho ikahamaade a lacheeke. I'daasenyi icho wihi Waakh iayyiche, ma 'helin.
[40] I'di tahe Waakh mali inno iroone gooche. I'daas ka la laanteen Waakh ortiis ka 'doo'di el laa ma yateehiin.