[1] Waakh uliba laka a inno iayyicha nasmetiis a inno siicha. Maantaka taba a isyaakhinno, uus 'dee eteenkoo kalday laka meessa nasme eleelin waayin gi'de.
[2] Saggi aacchinyeteen hidaad goyaka Wori Haaggane nasmeti Waakh miinsan idaagtuu, inno laka a daagne. Icho woraas a daageene, i'daasenyi walah us ibahe mele. A mehe chi'icho daageen laka, icho Waakh ma kakhuufin.
[3] Innohi Waakh rummeysanne kaldache nasmetaas Waakh ayyiche 'hella, a mehe wihi Waakh aacchinyeteenti usu irummeysan miinsane us yidah kallaayo. “Ani la holeey ka a daadde, ‘'Doo'da ili an kanascho, yombuu tuumman ma gelo.’ ” Ulla i'daase yidah chirri us hiliiski us harra soouume meessiisti nasme kijirtaayi us orey on massiche laka.
[4] A mehe Chiirnaanneti Waakh intoo ka wihi ibeenki teebannaatteet miinsane kachiiran kallaayo, “Ibeenki teebannaatteete uumacchoti harra tuumman ka, Waakh walah Us haaggiche mele, a nase.”
[5] Ayta nasme la inti kootte oraat ka a lakaayyeede, wihi liidah, “'Doo'da ili an kanascho, yombuu tuumman ma gelo.”
[6] Uliba laka nasmeti Waakh 'doo'doo usu kakhuufo nascho a jirta. I'daasenyi 'doo'di oraate Wori Haaggane meessaas nasme miinsan daage la meessaas ma gelin. I'di tahe ayti Waakh a daagiwwaayeen.
[7] Maantaka Waakh toro ibeenkoo addane nasmetiis la'helo yeele, ibeenkaas la Maalinkane layadeeh. Inkoo geeddi deer lafiddiye ka, wihi Waakh Dawuud ka yidahye kootte orey lakahawwooche a mehe ya, “Maalinka, chirri atin wihi Waakh essi daagteen, matah amiigeysanna.”
[8] A mehe chirri goorat Yoochuwa woynaanki us 'doo'd ili Kaanan iwoyo ka, nasmeti Waakh 'doo'd iayyiche nasche, Waakh toro ibeenkoo addane nasmetiis la'helo ma kaayyeedo gon.
[9] 'Deerka nasmeti khummane 'doo'di Waakh uliba sugto a jirta.
[10] A mehe eti tuummane nasmetaas khummane Waakh 'doo'd iayyiche naso, ullaka hiliis ka a nasa saggi Waakh hiliiski uumaccho ka inasuu.
[11] Maantaka, tirriinsanni gi'de, 'dee nasmetaas Waakh a nasno. A mehe eti tuummane ayti Waakh daagiwwaaye i'di goorat yaafohi Issiraayel yeeleen u, ullaka nasmetaas ma naso.
[12] Wihi Waakh yidah a i'di wihi jiro khabo, miig laka khabo. Afi Yeedi Waakh leeyahiin la afi birlab laka a kutaane, rubey ichoow uur laka seley a goocha, toro la inti hubno ichoow duh kijiraan seley a goocha. Yeedi Waakh wihi suuje ichoow wihi haaggane uureen kijiro a tusa, mali enenyet ichoow wihi enenyet 'doono dagsan laka mujjume fiiricha.
[13] Wohoo rucchule lasoouume Waakh lakadagcho ma jiraan, Waakh ortiis ka walah tuumman a nyiikhsanyahiin one, i'daanu arga. Waha a Waakkhi berri wihi inno yeelle tuumman inno worsati.
[14] Maantaka kuhaanihi weyti weene goobi Waakh irte a khabna. Waha la a Yeessohi Weeli Waakhe. Taba gi'de kakhuufnaanki inno Waakh kakhuufno inno cheekanni ka, mujjum a tolossanni.
[15] Kuhaaniheenka weyti ween la 'dabakkheen tuumman a isoonaha. I'di tahe sagag tuumman ka saggi kajmeti uskeel inno kalugu'ddo inno liikakajo on usu laka liikaje, i'daasenyi uskeeloo rucchul laka ma gelin.
[16] Maantaka Waakkheenki haaggiiski buure inno tusti roorro laan kombortiisti antoot ortiis iranni gi'de. Intaas ka maambaaw inno gargaar 'doonno, us uure inno isoonugleesta toro haaggiiski buure inno siicha.