[1] Kuhaanihi weyti ween tuumman 'doo'd goya lakasoobahcha. Hilicho la, a ki icho wihi Waakh miinsan ka, meessi enenyet ka Waakh ifalaane, siimo ichoow soorriyoyyohi uskeel bahcho Waakh ibahchaan.
[2] Kuhaanihi ween ullaka 'dabakkhi weeli enenyet a khaba gone, 'doo'di jeenteti us jiti mujjume igaran u uskeel gelo, inahin a yabuu'd.
[3] Ullaka a etoo 'dabakhe gone, jeenteti uskeeliis u ichoow toro uskeeli 'doo'di addan u Waakh soorriyo a ibahcha.
[4] Et keley on isweynaacho, kuhaanihi weyti ween iskayeelo mele. Eti tuummane kuhaanihi weyti ween yateeh, Waakh kalday on waha, i'di goorat Haruun Waakh iwahuu.
[5] Kiriisto laka 'deerka ma isweynaanne kuhaanihi weyti ween ma iskayeelin. I'daasenyi Waakhe usu soobahsate wihi us iyidah, “At a Weelaaya, maalinka an Aabbahaahha itah.”
[6] Chiirnaanneti Waakh goyaka intoo ka Waakh mehe Kiriisto idowa ya, “At jirtuu tuumman a kuhaanihi uumman Melkisedeeke.”
[7] Maanti Yeesso harrata kijire, us riirit ichoow oytim ka Waakkhi omoot karibo wahte. Jeenteti Us roorro ka Waakh afiis ikutin u, Waakh weysihiis a daage.
[8] Chirri us rumanka Weeli Waakh yahe laka, sinayyohi lakawaariche wihi Waakh 'doono mujjum a abcheen.
[9] Inkoo tuum lakayeele ka, eti jirtuu tuumman 'doo'di usú raaho ribo yitah.
[10] Waakh la wihi us kawahe, a kuhaanihi weyti weene uumman Melkisedeeke.
[11] Wihi buurenye Yeessohi ullaka i'di Melkisedeek u kuhaanee miinsane an idaahan 'doono, a jiraan. I'daasenyi chirri an atin isoobabbakkaahicho weyti miigyahiin. A mehe walah dowwa ma atin gelaanee.
[12] Atin geeddi deere 'doo'd Kiriisto eheet. Kootte geeddee ka, atine 'doo'di addan walah abissaan. I'daasenyi, atin laka toolla wihi Yeedi Waakh ka kolooraat lakasooumho, iche eti atin abcho 'doontaan. Wihi Waakh miinsan ka, atin uliba a i'di nyaakhuti gololi miige ohom iubaa'dane, haanu kalday on damo.
[13] A mehe eti tuummane haanu kalday on damo a weeli nucchule, wihi fissane kootte lii'doono us yeelo ma garti.
[14] I'daasenyi gololi miige a ki 'doo'di ii'dowe, kol tuumman Yeedi Waakh raaho, wihi haaggan ichoow wihi suuje seley saahnaan isabche.