[1] Ayti nah elanni talla, rumanka kuhaanihi weyti weene goobi Waakh ka komborti antoote Waakkhi Weyti Ween ankicheki miigeet ka meessi lakiinkaanyito fiddiyo a khabna.
[2] Ulla hili kuhaanihi weene Meessi Lagan ka Waakh ikahila. Meessa la a eemati rummaate Waakh lakawahti, weeli enenyet menye, Kamuri Waakhe rubeytiis dise.
[3] Kuhaanihi weyti ween tuumman hiliis a ki us siimo ichoow soorriyoyyo Waakh ibahcho. 'Deerka kuhaaniheenki weyti ween laka a imasse chirri us Waakh wohoo ibahcho.
[4] Chirri kootte Kiriisto harrata kijiro, kuhaani ma yateeh gon. A mehe kuhaaniyyohi saggi amurre Muusa i'doontuu siimohi Waakh liibahcho bahcho a jiraan.
[5] Meessi lagane icho hili Waakh kahaaggichaan a oosim ichoow iyookkoti wihi goobi Waakh kajiro. Jeentetane maanti Muusa eemati Waakh lakawahti disin leheet, Waakh itootooche, wihi us iyidah, “Tabe, wihi at haaggisso tuumman ichoow iyookkoti goorat hali Sinnaay sartiis ka an kituse a israaheen.”
[6] I'daasenyi Yeesso hili ki kuhaaniyyoha weyti kussane lasiiche. A mehe ayyinti husube Waakh gooche us dahgele yahe, ayyinti oraate amurre Muusa keente weyti kussantahe. Waha la a jeenteti iche ayyinti weyti deefto iraahto.
[7] A mehe chirri kootte ayyintaas oraate Waakh gooche eloo ikhabin ayyintoo addan ma layowti gon.
[8] I'daasenyi Waakh rubeytiis maanti us i'da yidah, aacchinyeteen uskeele kaarge, “Ibeen a yamiit, iche Kamur essa, ibeenki an ayyintoo husub 'doo'di Issiraayel ichoow 'doo'di Yuuda igoocho.
[9] Ayyintaas la i'di ti goorat an gooche mee. Maantaas an aacchinyeticho dahane sookhabde 'dee ili Miissiri kasoobahcha. I'di tahe icho ayyinteeytaas ma khucchinne, an la icho adah kakhabde, iche Kamur essa.
[10] Inkoo ibeennetaas kutte ayyinteeyti husube an 'doo'di Issiraayel igoocho talla, iche Kamur essa. Amurreteey malichooda goya gessa, 'dee kamassaan, uurassicho goya kachiira, 'dee raahaan. An Waakkhichooda ateehe, icho la 'doo'daaya yateehiin.
[11] Et kola ollokkiis walah abcho, ommos walaaliis, ‘Kamur abo,’ idowo mele. I'di tahe icho tuumman, ki ween ichoow ki nugul ba a igartaanee.
[12] An la uskeelicho a ikakuta, suujoonkicho la jirtuu toro ma kasoo'helo.”
[13] Chirri Waakh ayyinti us gooche, “ti husub” yadeeh, waha mehe tusaan ya ti goorat oraat a raagte gon. Taas la geeddoo nucchul on sohatta, massatta.