[1] Goorat archiiy, Waakh aacchinyeteen geeddi buure ichoow jitassi ittaawe ka a leeyyeede. Ulla 'doo'di Waákh íyeyyeedo kaleeyyeede.
[2] I'daasenyi, ibeenneta 'da'ddaboot ka, Waakh Weeliissa inno kaleeyyeede. Weeliiska a ki Waakh soobahsate walah tuumman dalho, toro la a ki Waakh usu ka harra tuumman soouume.
[3] Weela Waakh la weynaanti Waakkhi ababo tusa, ulla toro a fooli Waakh. Ulla yeediiski miig leh ka wihi tuummane jiro khuccha. Ulla a yumuyye, 'dee usu rubeytiis jiti uskeeli weeli enenyet lakadikho yitah. Inkoo us wahaas yeele ka, goobi Waakh ka Waakkhi Weyti Ween ankiiski miigeet orronte.
[4] 'Deerka Weeli Waakh herti Waakh laka weyti a kaweeyyahe. Magahi Waakh weeliis siiche magahi herti Waakh weyti kussanyahe.
[5] I'di tahe Waakh hertoh Waakhe injire waha iidah, “At a Weelaaya, maalinka an Aabbahaahha itah.” Ommos Waakh hertoo kaldache Waakh, “An Aabbahiissa ateehe, ulla Weelaaya yateeh,” ma iidaahan.
[6] Toro la Waakh maanti us teyyankiis harrata isooerge wihi us yidah, “Herti Waakh tuumman usu a wahatti.”
[7] Waakh la chirri us wori hertiis kaayyeedo, wihi us essi, “Waakh hertiis hafare kayeela, toro falfatiistaas kalabi 'dabe kayeela.”
[8] I'daasenyi Waakh wihi weeliis miinsane us iyidah, “Okkhoow, kombortaahti antoot jirtuu tuumman ma massatti, at la wussaah ka jiti rummaate 'doo'daah kadakhatta.
[9] At wihi fissane 'doonta, hugun'darri la 'dii'dda. Jeentetaase anihi Waakkhaahe, subakki geeyi oolife hamaad keeno matah ikaasubhe, wahalhaah goyaka kikucche.”
[10] Wihi addane Waakh weeliis iyidah, “Kamuroow, uumaccho ka harra tuumman a soouunte, dahanohaah ka la serey soouunte.
[11] Waha tuumman a massataane, icho dakkhan la i'di dafareet u, a massataan. I'daasenyi, at a soo'hadda.
[12] I'di kootihi massatte u a isijibbaadda, toro la i'di dafarti raagte u urgiyissa. I'daasenyi at a ki gooraatteet one, ma urgiito, gu'hassaah la ma massataan.”
[13] Hertoh Waakhe injire Waakh i'da iidah, “Dabankeeyki miigeete antoot orrommo ichoowka chiiytaah tuum dahanohaah a soogesso?”
[14] Herti Waakh a meheey? Icho a rubeyohi Waakh ergati, 'doo'di ribnaanki Waakh mu'dan ihilo menya?