[1] Khadaaba eti atin isoochiiro, a ani Yaakoobo. Anna a bow'dati Waakh ichoow bow'da Yeesso Kiriistohi Kamureene. 'Doo'di an isoochiiro la a 'doo'd Kiriistoki yaafohi tomon ichoow lammeenye Issiraayelenye harra tuumman kataasan. Nebeeheyte?
[2] 'Doo'd Kiriistokaaw, maambaaw sinayyohi khar kayamiit atin isoobahaan weyti hamaad iekkaacha.
[3] A mehe saggi atin igarattaan u, sinayyo kakhuufnaanki atin Yeesso kakhuuftaan usu ki rummaatenye kajaane, toro sinayyohaas miigti atin kagarrahsattaane delaan.
[4] Maantaka taba miigti atin kagarrahsattaan tuum hiliche a massisso, 'dee 'doo'di ii'dowe ateeha, toro la 'doo'di wohoo rucchul laka ikaankhaneynan ateeha.
[5] I'daasenyi chirri etiinkoo khara laayahe, Waakh a daaho Waakh la usu a siichaa. I'di tahe Waakh enenyet tuumman i'daanu weyti walah siicha toro enenyet ma kofo.
[6] I'daasenyi eti Waakh walah daaho, uus uurlammaal khabine, saggi Waakh wahaas us daahe isiicho a kakhuufo. A mehe eti tuummane uurlammaal khabo, a i'di irti beyti buure goyaka hafar kolba ankoo ilaabo.
[7] Eti i'dee uus kol us Waakh wohoo ka'helo koogeynan.
[8] Eta uurlammaal khabo, jirotiis kol dakkhan maamba fooloo yeerenye bihissa.
[9] Eti Kiriisto rummeeste miskiine weynaantiisti buure a keeylajo.
[10] I'daasenyi eti kamure, weynaantiisti rucchul a keeylajo. I'di tahe eti kamure i'di fiikhti yibaat u a baaba.
[11] A mehe orrahe kuleeli walah gubto leesookorta, geey angagissa, fiikhe la khubatta, haaggiche la ibaaba. Saggaas on eti kamure laka hiliis haaggichaayi baaba.
[12] Waakh eti sinayyohi kharaat ka garrahsati a imaala. A mehe inkoo us kajmeyyohaas ka mujjum tolossate, Waakh kala'ddi us 'doo'di usu 'doono iayyiche iche siicha, kala'dda la a jiroti jirtuu imassan.
[13] Chirri etoo kajme ka uskeel lakalug'do, uus “Waakhe kajme ka uskeel ikalug'da,” elan. I'di tahe Waakh kajmeti uskeel kalugu'ddo ka ma lakajo, toro Waakh et us kajmeti uskeel kalugu'ddo ka us kajo mele.
[14] I'daasenyi ebba chi' kajmeti uskeel kalugu'ddo ka lakajo, geedda 'dooninti us uskeel imoono jiitto iche angey lagessa.
[15] 'Deerka inkoo uskeelaas liimoono lasoouume ka, uskeel dessa. Uskeel la chu'us tuum weynaate, omootti armaanjireen dela.
[16] 'Doo'd Kiriistokaaw, uus atin leekkeysan.
[17] Siinti tuummane haaggane toro la eloo rucchul laka ikhabin, sereye katamiite toro la Waakkhi Aabbaheenenye banayhi saraat tuumman soouume iche katamiit. Banayhaas a geeddi icho urgiyaane mug'di yateehiin. I'daasenyi Waakh i'daaru laka ma urgiyo.
[18] Maliis ka wihi us gooche, a ki us yeediiski rummaat ka jiroti husub inno siicho. I'da ka wihi us soouume tuumman goyaka, wihi us soobahsate orate nateeh.
[19] 'Doo'd Kiriistokaaw, taba waha tissiba, atin tuumman dowwa nabah suda, dowwa ayeedina, dowwa ahollowina.
[20] I'di tahe holi weeli enenyet jiroti fissane Waakh 'doono ma keeno.
[21] Maantaka, wihi uurassiin bi'dirroocho tuumman ichoow suujoonki noole atin yeessaan kasootaba. Wori Waakh uurassiin goya gesse ribin atin yabuu'd samacchaar on khaadda.
[22] Toro la Yeedi Waakh nabah kalday iisudina. I'daakka a isekkeysattaan. Wihi us yeela essi laka yeela.
[23] I'di tahe eti tuummane Yeedi Waakh nabah on isudo i'daasenyi wihi us essi iyeelin, a i'di eti kitaab ka fooliis 'dey'doocho,
[24] inkoo us isfiiriche irti chirraas on toro fooliis i'di us yahe kadabo.
[25] I'daasenyi eti amurreti eloo rucchul laka ikhabine enenyet soofurto mujjum fiiricho toro la kol dakkhan kamassi, toro la wihi us daage ikadabine i'daasenyi raaho, Waakh etaas wihi us yeelo ka a imaala.
[26] Chirri etoo kol us wihi Waakh 'doono mujjum raaho koogyahe toro la harrabiis ijeyin, etaas a isekkeesta, saggi us Waakh iraaho la a wihi ilmarhaatteet on.
[27] Jitaas inno Waakkhi Aabbaheene mujjum karaahno us khaatti uruftoo rucchul laka ikhabine toro wohoo ikaankhaneynan, a ki nyaakhuti abar ichoow ooyo laa ichoow muunkhoyyo sinayyohicho ka mujjum lawoywoyo. Toro la wahanyeyyohi harratane sussuujenye enenyet bi'dirroocho islakalaabo.