[1] Maantaka 'doo'd Kiriistoki munyeenye Waakh goobiis iwahe, Yeessohi kakhuufnaanki inno Waakh kakhuufno inno cheekno ka, Waakh ergaano ichoow kuhaanihi weyti ween kayeele kamalda.
[2] Yeessohi Waakh soobahsate la, wihi Waakh yeel iyidah tuumman ka a eti lakakhuufe, saggi Muusa hiliiski minki Waakh ka eti lakakhuufe ieheet u.
[3] Yeesso Muusa 'dirihiis koolo a imaleen saggi eti min diso koolo min 'dirihiis ikamaleen u.
[4] Min ba eti diso a khaba gone, i'daasenyi Waakh usu walah tuumman i'di icho yahiin kayeele.
[5] Muusa goorat i'di ilbooy u, eti rumanka hili minki Waakh ka lakakhuufe eheete, ulla wihi Waakh berri sooyadeehe cheeke.
[6] I'daasenyi Kiriisto weeli lakakhuufo hili minki Waakh tuumman itoollo eheet. Chirri inno bur'de ikhabine, khajjeeli inno Kiriisto kakhabno keeylajno la, inno a minkiissa.
[7] Maantaka, i'di Rubeyti Munyee Chiirnaanneti Waakh goyaka tadeeh u, “Maalinka cha'atin wihi Waakh essi daagtaan,
[8] matah amiigeysanna i'di aacchinyetiin u. Iche la goorat a idaagiwwaayte. Maanti iche hidaad goya kajirte iche ani ikajje.
[9] Chirri aacchinyetiin wihi an gu'h tomon affar iyeele agarte laka, usu an rum ahe a ikajje, toro sinayyohi ikajo ikeente.
[10] Ani la jeentetaase kholotaas ikahollowe, wihi an idah, ‘Uurassicho kol dakkhan baabaa iche kijiraane, jitasseey la ma garan.’
[11] Ani la holeey ka a daadde wihi an idah, ‘'Doo'da ili an kanascho yombuu tuumman ma gelo.’ ”
[12] 'Doo'd Kiriistokaaw taba gi'de, uus etiinkoo kalday laka matahmiigti Waakh liirummeysanne Waakkhi jiro lakatabo khabin gi'de.
[13] I'daasenyi geeddi il Maalinka on yahe, maan dakkhan uur ismiigoocha. Uus 'dee etiinkoo kalday laka uskeel ekkeysanne, us Waakh matah imiigeysanne.
[14] I'di tahe chirri inno geeddi inno jiro khabno inno mujjum tolossanne, inno khajjeeli maanti inno kolooraat Yeesso rummeysanne on khabno, inno tuumman Kiriisto a walhinne.
[15] I'daasenyi, wihi Yeedi Waakh essi akadabina. “Maalinka, chirri atin wihi Waakh essi daagteen, matah amiigeysanna i'di aacchinyetiin u. Iche la goorat ani a idaagiwwaayte.”
[16] Kamalda bal 'doo'di wihi Waakh essi daage toro raahiwwaaye a ayyo illeh? Icho 'doo'di tuummane Muusa ili Miissiri kasoobahche menya?
[17] Toro 'doo'di Waakh rubeytiis gu'h tomon affar ihollowe a ayyo illeh? Icho 'doo'di uskeel yeele, hidaad goyaka tuume menya?
[18] Toro kamalda bal, 'doo'di Waakh idaatte, “'Doo'da ili an kanascho yombuu tuumman ma gelo,” iyidah a ayyo illeh? 'Doo'di Waakh rubeytiis daagiwwaaye menya?
[19] Wihi 'deerka inno abanni, 'doo'da Waakh ma kakhuufin gone, ilaas icho kanasin leheet a latirte.