[1] Maantaka urura buurenye garti saggi icho Waakh ikakhuufaan laabo a inno kamarsanyahe gone, taba, wihi tuummane inno jeycho ichoow uskeeli inno woyo tuumman rogno, toro la oriisihi Waakh orteen gesse ka, a garrahsanni.
[2] Taba, kol tuumman Yeesso a kamalanni gi'de. Usú orey inno woye, Waakh kakhuufne, toro uliba laka inno woya, Waakh tuum kakhuufna. Ulla jeenteti hamaadi sugo u, lakhaanyoti eti massalaaba lakakaaho taham a igarrahsate. Ulla toolla goobi Waakh ka komborti Waakhe antoot ankicheki miigeete fiddiya.
[3] Bal saggi us 'doo'di uskeel khabe usu weyti 'dii'ddan us ikagarrahsate kamalda. I'da yeela 'dee akurmina, toro la rubey iiche atin jebin.
[4] I'di tahe atin uskeeli atin hol leedowtaan ka, uliba ma tirrimine ichoowka geeddi atin lakabakkicho ma eleelin.
[5] Atin la wihi Waakh i'di nyaakhutiis u atin iyidahye uur atin miigoocho, a kadabteen, “Nyaakhutaaw, sooholinti Kamur atin soohosso nabah isuda, toro la geedda us atin khuncho uus rubeye atin jebin.
[6] I'di tahe Kamur eti us 'doono tuumman a soohossa, toro la i'di weeliis u, sirbi gessa.”
[7] Chirri sina atin lakawaaricho, garrahsada on. I'di tahe Waakh sinataas ka a atin soohossa, saggi ooyo weeliis isoohossuu. Weeli ooyo isooholin a jira?
[8] Rumanka Waakh nyaakhutiis tuumman a soohossa. Chirri us i'di nyaakhutiis u us atin isooholin, wahaas mehe tusaan ya, atin nyaakhutiis mee gone, atin a i'di eysing'alaj.
[9] Ooyenyeteenti inno desse inno sooholisso, a inkaanyinna gone, geeddoo meheenye sooholinti Aabbaheenki saraat inno soohosso raahna, 'dee jirtuu tuumman jirra?
[10] Ooyenyeteen geeddoo icho ka imasse, iche inno sooholissa. I'daasenyi sooholinti Waakh inno soohosso, a wihi inno imale, 'dee inno laka munyatiis leegisanno.
[11] Sooholin enenyet lasoohosso chirraas wohoo lakahamaado lakoogyahe mele, a bolokh on. I'daasenyi yomboka eti tuummane lasoohosse, gurnaanki us delo a wihi fissan ichoow nebey.
[12] Maantaka, dahanohiinki 'hare ichoow luhlohiinki harmo miigoocha.
[13] “Luhlohiin jiti fissan iyeela.” 'Dee jirotiin ka ma tarrantarrattaane, ma kuftaane, i'daasenyi a miigowtaan.
[14] Hol dowa 'dee weeli enenyet tuumman nebey kaleefiddiya, toro la 'doo'di munyee ateeha. I'di tahe eti tuummane munya ieheynan, jirtuu Kamur ma argo.
[15] Taba aw isikhaba, uus 'dee etiinkoo kalday laka haaggi Waakhe buurenye us atin tuste waayine. Uus etiinkoo kalday laka i'di hiiyyi hadaado khabo soobaho sina keeno, toro enenyet suujaacho itaahan.
[16] Uus etiinkoo kalday laka soho'ddarri kaassohanne, ommos i'di Essaawohi Waakh inkaanyitiwwaaye itaahan. Ulla jeenteti gololi koloo kalday on ka, antohiiski teyyannoon ororiche.
[17] Ulla yomboka i'di atin igarattaan u, maanti us weysi aabbahiis 'doone, aabbahiis usu a 'dii'de. Chi' Essaawo weysi iooye laka, sag us maliis iurgiyicho mele.
[18] Atin la i'di yaafohi Issiraayel mee, a mehe atin hali Sinnaaye la'daaro, 'dab kabolkho, ichoow mug'dihi reebe ichoow rug,
[19] ichoow hooyi arabi laafuufo ichoow hooyi Waakkhi yeyyeedo ma isoodowwaan. Inkoo 'doo'daas hooyi Waakkhi yeyyeedo daage ka, Waakh hawwaasteene, ichohi toro yeedoo addan daago ma 'doonin.
[20] Amuri Waakh bahche icho daagin i'doonin la kalla, “Chirri weeli enenyet ommos wohoo nafe laka hala 'daareen, dagah a lakaseyo, a layigaase.”
[21] Wihi 'doo'd halaas ka arge, weyti bur'doocheene, ichoowka Muusa wihi us yidah, “An weyti roorro khaba ichoowka harma.”
[22] I'daasenyi atin Hali Saayone isoodowwaatteen. Waha la a ilkerengeetti weene Yeerusaleeme goobi Waakh kijirto, a ilkerengeetti Waakkhi jiro. Waha la a inti herti Waakhe eluffe goosso, hamaad ka kulante.
[23] Toro la urur Kiriistoki i'di teyyanohi Waakhenye isoodowwaatteen. Waha la a 'doo'di magahenyeticho goobi Waakh ka lachiire. Atin la Waakkhi 'doo'd hukkumo ichoow rubeyohi 'doo'di fiffissane el laa lakayeele, iche isoodowwaatteen.
[24] Toro la Yeessohi dahgeleenye ayyinti husube Waakh gooche keene, iche isoodowwaatteen. Diiggiis a liirdifte, 'dee Waakh enenyet uskeel ikakuta. Diigga i'di diig Aabelki eti aal guto yowti mee.
[25] Taba gi'de Waakkhi yeeda atin idowo a'dii'dina. A mehe chirri goorat yaafohi Issiraayel Muusahi harrata ka leeyyeede yeediis 'dii'deene iche ibahsawwaaytuu, inno laka sag inno i'daaru laka ibahsanni mele chirri inno eti goobi Waakh kasooyyeedo adah kakhabanne.
[26] Maantaas goorat hooyi Waakh harra a sesseehiche, i'daasenyi toolla wihi us ayyiche us yidah, “Koloo kalday toro harra kalday on menye, sereyta daayan laka a korkokicha.”
[27] Yeeda, “Koloo kalday toro,” essi saggi wihi Waakh haaggiche harrata kijiro liikorkokicho, liibahcho, 'dee wihi jirtuu tuumman jiro kaldach on isoo'hadaane tusa.
[28] Maantaka Waakh dakhi liikorkokinne inno siicha gone, Waakh jiti us kahamaado, roorro ichoow inkaanyit ka kala'd ilaabno toro wahanni gi'de.
[29] A mehe Waakkheen rumanka a 'dabi walah yaham.