[1] Eta Melkisedeek layadeeh, karnati ili Saleeme eheneete, toro la kuhaanihi Waakkhi Weyti Weene eheneet. Chirri Aburaaham 'doo'diis khabaayi karnatohi ittaawe ka'higtoote sooriche soonokhte ka, Melkisedeek or kadowe, iweeste.
[2] Aburaaham la wihi tuummane us diho ka sookhaate meel tomon seley igooche, goonankoo Melkisedeek siiche. Magaha Melkisedeek layadeeh la a mehe ya, “Karnati wihi fissan yeelo.” Jeenteti us karnati Saleem iyahuu, magaha wihi addane us itoollo a mehe ya, “Karnati nebey dowo.”
[3] Walah Melkisedeek aabbahiis ichoow abartiis ichoow aacchinyetiis laka miinsane lasoocheeke mele. Maanti us desse ichoow maanti us yumuy laka ma lacheekin. Us i'di Weeli Waakh u, jirtuu dakkhan a kuhaani on.
[4] Bal saggi rumanka Melkisedeek ikhummanyahe kamalda. Aburaahamhi yaafohi Issiraayel uume laka, wihi us diho ka sookhaate, goonankoo Melkisedeeke siiche.
[5] Amurre Muusa ka nyaakhut nyaakhut Laawi, ki gaasiiskoo kuhaaniyyo yahe, icho laka goonankoo yaafohi Issiraayel a kakhaataan, chirri icho nyaakhut nyaakhut Aburaaham yahiin laka.
[6] I'daasenyi chirri Melkisedeek hiiy Laawi ikiimaatan laka, goonankoo Aburaaham usu siiche a kakhaatte one, toro iweeste. Aburaaham la a eti ayyinti goorat Waakh gooche 'helo.
[7] Wihi inno garanni la a mehe ya, eti enenyet iweesti, ichoow ki liiweesti, ki enenyet iweesti ween.
[8] Kuhaaniyyohi yaaf Laawi kayimiy ka, 'doo'di goonankoo khaato a weeli enenyete berri yamuut. Melkisedeek laka goonankoo a 'hele. I'daasenyi us icho a kussanyahe. I'di tahe Chiirnaanneti Waakh saggi us ijiro a cheekta.
[9] Maantaka maanti Aburaaham goonankoo Melkisedeek siiche, a i'doo Laawihi hiiyyiis goonankoo khaato laka, Aburaaham ka goonankoo bahche.
[10] I'di tahe Laawi geeddaas ka ma delan. Toro maanti Melkisedeek Aburaaham 'hele, Laawihi yomboka ladele, sar aacchihiiski Aburaaham layadeehe goya kijire.
[11] Amurreti Waakh yaafohi Issiraayel siiche, kuhaaniyyohi yaaf Laawi kanoolneet. I'daasenyi kuhaaniyyo hilicho saggi Waakh ika'doono tuum buuhin ma ubaa'dan. Jeentetaas gon kuhaanihi uumman nyaakhut nyaakhut Haruun kayimiy menye, ki uumman Melkisedeeke Waakh i'doona.
[12] I'di tahe wihi la'doono a mehe ya, maanti kuhaaniyyo luurgiyicho, amurre laka a luurgiyicha.
[13] Kamureenka Chiirnaanneti Waakh woriis kaayyeeddo la, yaaftoo addane kayimiyye, yaaftaas ka la et injire chalagti hoola lakasoorriyoocho ka hili kuhaani haaggiche mele.
[14] A mehe enenyet tuumman saggi Kamureen yaaf Yuuda ikayimiy a garta. Muusa la maanti us wori kuhaaniyyoot kaayyeede, yaafta magah laka ma wahin.
[15] Ayta inno kaayyeene weyti a 'dowaawte, i'di tahe kuhaanihoo addane uumman Melkisedeeke a soobahe.
[16] Ulla jeenteti us amura usuhi hiiy Laawi kayamiit i'doono ibuuhiche kuhaani ma itaahane, i'daasenyi jeenteti miigtiisti jirotiisti jirtuu imassanne kuhaani iyitah.
[17] I'di tahe Chiirnaanneti Waakh wihi iche cheekto, “At jirtuu tuumman a kuhaanihi uumman Melkisedeeke.”
[18] Amurreti oraat a 'darneete toro la gargaar ma khabine, a la'diiche.
[19] A mehe amurre Muusa walah tuum ma kayeesso. I'daasenyi khajjeeli inno toolla khabno, khajjeeli goorat inno khabne khuuf on kadeefa, Waakhe inno idowwaachaa.
[20] Inno khajjeela deefo a khabna, toro wihi Waakh daatte laka a jiraan. I'di tahe Waakh maanti goorat kuhaaniyyohi yaaf Laawi lasoobahcho, ma daatan.
[21] I'daasenyi maanti Yeesso kuhaani yitah, Waakh a daatte, wihi us yidah, “Anihi Kamurenye Waakhe wahane gooche, yombo la ma inokhdi, wohoo addan ma yeelo. At jirtuu tuumman a kuhaani.”
[22] Jeenteti Waakh idaattuu, Yeesso a jiti ayyinti deefto Waakh gooche lakabuuhicho.
[23] Wohoo addane ayyinti oraat yeerarroocho a mehe ya, kuhaaniyyohi oraat ittaawe eheneet. I'di tahe kooba a yamuute, chu'us yumuy la, hili Waakh ma haaggicho gone, etoo addan meessiis gela.
[24] I'daasenyi Yeesso jirtuu tuumman a jira gone, hiliiski kuhaani et liikuccho, meessiis gelo mele.
[25] Maantaka usu 'doo'di usu leeyamiite Waakh iirti tuum ribin a yabuu'd. I'di tahe usu kol tuummamba a jira, 'dee 'doo'da Waakh a ihawwaasta.
[26] Yeesso a kuhaaniheenki weyti weene, sagag tuumman ka inno gargaaro. I'di tahe usu a munya, eloo rucchul laka ma khabo, bi'diroo rucchul laka ma khabo. Waakh usu 'doo'di uskeel leh goyaka a soobahche, goobi Waakh ka walah tuumman 'dirihicho weynaache.
[27] Ulla walah usu i'di kuhaaniyyohi weyti wewweene addan u, kol dakkhan koloo jeenteti uskeeliis u, Waakh soorriyoyyo ikabahcho, 'dee toro jeenteti uskeeli 'doo'di addan u Waakh soorriyoyyo ikabahcho mele. Us koloo kalday on issoobahche soorriyoti liikanokhanne uskeeli enenyet bihisso yitah.
[28] I'di tahe amurre Muusa mejeli wihi laka'doono ka 'da'ddarane soobihissa, 'dee kuhaaniyyohi weyti wewween yateeh. I'daasenyi inkoo amurre Muusa timiy ka Waakh daato ka ayyinti husub gooche, weeliis soobahche kuhaanihi weyti weene wihi laka'doono tuum buuhicho jirtuu tuumman kayeele.