[1] Amurre Muusa a oosinti wihi haaggane soosohti one, wihi rummaat mee. Amurretaas ka soorriyoyyo a wihi gu'hi soomaro tuumman ka liinonnokhti lahaaggicho. I'daasenyi soorriyoyyoha 'doo'di Waakh kawahti 'doo'di eloo rucchul laka ikhabin ma kayeelaan.
[2] Chirri soorriyoyyoha 'doo'di Waakh kawahti rumanka uskeelicho kadikhin yabuu'diin, soorriyoyyo tuumman a latoollicha gon. I'di tahe i'da ka 'doo'di Waakh kawahti koloo kalday on jirtuu tuumman ladikha, toro la rubeyohicho suujoonkicho ma kacheektaan.
[3] I'daasenyi wihi rummaate jiro a mehe ya, soorriyoyyohi gu'hi soomaro tuumman lagelo, enenyet kol tuumman uskeelichooda on kasoo'helchaan.
[4] I'di tahe diiggi heeraroot ichoow ki waharoot koloo kalday laka uskeel ma bahchaan.
[5] Maantaka, maanti Kiriisto harrata yimiy, wihi us Waakh iyidah, “At soorriyo ichoow wihi lakisoobahche ma 'doonin, i'daasenyi at ani sar a iyeesse.
[6] Hoolahi tuum chalag ka lakigube, ommos soorriyoyyohi jeenteti uskeeli enenyet liibahche laka, ma kaahamaadin.
[7] 'Deerka Kiriisto wihi us yidah, ‘Okkhoow, an kalla, wihi imiinsane khadaabi yuuban kachiiran, an a imiyye wihi at 'doonto yeela.’ ”
[8] Kiriisto 'hor Waakh wihi us iyidah, “At hoolahi lakisoorriyooche ichoow siimohi lakisoobahche ichoow hoolahi tuum chalag ka lakigube, ommos soorriyoyyohi jeenteti uskeeli enenyet liibahche, ma 'doonine ommos ma kahamaadin.” Ulla chirri soorriyoyyoha amurre Muusa 'doonto laka, i'daas on yidah.
[9] 'Deerka wihi us yidah, “Okkhoow, an kallaaye, wihi at 'doonto iche yeela.” Waakh soorriyoyyohi oraate bahcha, too Kiriisto meessicho gessa.
[10] Waakh i'daas a yeele gone, sar Yeesso Kiriistoti lasoorriyooche ka a inno munyaache. Kiriisto la koloo kalday on jirtuu tuumman issoorriyooche.
[11] Kuhaaniyyo ebba maan dakkhan chalag ortiis ka hiliissa haaggicha, soorriyoyyohaas koloo kalday laka uskeel ibihin babbahchaan.
[12] I'daasenyi kuhaaniha koloo kalday on issoobahche, soorriyoti uskeel bihisso, jirtuu tuumman liikanokhan yitahye, Waakh anki dahantiisti miigeet orronte.
[13] Ulla toolla intaase chiiytiisti tuum Waakh dahanohiis soogesso kasuga.
[14] A mehe soorriyotaas kaldaye us issoobahche on ka, 'doo'di lamunyaacho 'doo'di jirtuu eloo rucchul laka ikhabine kayeele.
[15] Rubeyti Munyee laka Yeedi Waakh ka ayta a cheekta, wihi iche kolooraat elatti,
[16] “Kamur wihi us essi kallaayo, waha a ayyinti husube an berri 'doo'deey igoocho, amurreteey uurassicho goya gessa, toro la malicho goya kachiira.”
[17] Wihi addane iche kakhayte, “Uskeelicho ichoow hugun'darriticho jirtuu tuumman ma kasoo'helo.”
[18] Maanti Waakh enenyet uskeel ikakute la, soorriyoyyohi uskeel bahcho kola ma la'doono gon.
[19] Maantaka 'doo'd Kiriistokaaw, diig Yeesso ka, antohi inno roorro laan goobi Waakh ka Meessi Weyti Lagan kagello a khabna.
[20] Meessa la jiti husube jiro keeno Kiriisto dafartaas us tabe ka inno ifure, iche kagella. Dafartaas la a sartiissa.
[21] Kuhaanihi weyti weene minki Waakh itoollo la a khabna gone,
[22] mali fissan ichoow kakhuufnaanki inno Waakh kakhuufno uurlammaal ikhabin ka, Waakh idowwaanni gi'de. A mehe rubeyoheenki suujoon inno kacheekti diig Kiriisto ka a ladikhe, sarteen la a i'doo bicchehi warraakhe lakadikhe.
[23] Khajjeeli inno cheekno mujjum khabno gi'de, a mehe Waakkhi waha ayyiche a eti lakakhuufo.
[24] Saggi inno uur isimiigoonno, 'dee 'doonin isikhabno, haag la isiyeello kamalanni gi'de.
[25] Uus inno kulanki inno kulanno 'diin, i'di 'doo'doo yeeluu. I'daasenyi tabno uur a ismiigoonno, toro Ibeenki Kamur soonokhti a soodowwaatee gone, weyti i'daas yeello gi'de.
[26] Chirri inno inkoo inno rum abanne dib on u toro uskeel yeello, soorriyotoo addane uskeel inno kabihisso ma jirto.
[27] I'daasenyi wihi jiro, a hukkunki Waakh 'doo'd hukkumo soosohti, inno roorro ka sugno, ichoow 'dabi weyti bolkho chiiyti Waakh 'dabbaacho kalday on.
[28] Goorat eti tuummane amurre Muusa raahin 'dii'de, chirri et lamma ommos et seyyahe gartiis laabte, uur ma liinugleesti, chirraas on layagiis.
[29] Eheet a, eti Weeli Waakh daddabho la mehe imale? Eti diiggi ayyinti Waakh gooche enenyet munyaacho wohoo bi'dire ikhaato mehe imale? Toro la eti Rubeyti Munyeenye haaggi Waakhe buure inno siisso abaare mehe imale? Sinati eta imasse Waakh igoocho, buur ka geeddoo meheenye kakhayanta?
[30] A mehe saggi Kamur rubeytiis waha iyidah a garanna, “Ani aal gudda, ani toro mog gudda.” Toro la wihi addane liidah, “Kamure 'doo'diis hukkuma.”
[31] A roorroti weyti buure chirri Waakkhi rumanka jiro inno khabte.
[32] Bal saggi atin dowwanohi atin Yeesso Kiriisto rummeysatteen ijirteen kasoo'hela. Sinati buurenye atin tuhuyye, i'daasenyi atin a garrahsatteen one, yombo ma inokhan.
[33] Kolossoo 'dowhi nyiikhsan on ka atin laleeabaarrama, toro sina atin lakawaaricha. Kolossoo laka 'doo'di addane sina lakawaaricho goya atin lagata.
[34] I'di tahe 'doo'di jeelayyo kajiro a inahteen. Chirri wihi atin khabtaan tuumman atin lasare laka, atin hamaad on khabteen, jeenteti atin wihi deefo yombuu imassanne Waakh ayyiche ikhabtaan igarattaan u.
[35] Maantaka jiti atin roorro laan Waakh kakhuuftaan a'diinna. Saggi jeentetaas u kala'ddi buure atin liiguto kasoo'hela.
[36] Wihi toolla atin laka'doono a garrahsi, 'dee cha'atin wihi Waakh 'doono yeesseen ka, wihi us ayyiche 'hessaan.
[37] A mehe dowwanoha ka, “Eti yamiit a yamiite ma malmalo la.
[38] I'daasenyi eteeyki fissan ani ikakhuufa, kakhuufnaankaas ka jira. Eti adah ikakhabti, ma kahamaado.”
[39] I'daasenyi inno 'doo'di Waakh adah kakhabti labaabiicho goya ma kijirro, 'doo'di Waakh kakhuufo, Waakh ribo goya kijirra.