[1] Khadaaba eti kisoochiiro a ani, Baawulo. Anna jeenteti an wori Yeesso Kiriisto miinsan icheeko iche jeela ikajira. Timootihi ullaka koo Kiriistee a kisoobariitiche. Fiilemonhi weyti aalenyeenye, hil Kiriisto nah kaleejiro,
[2] ichoow Aafiyati too Kiriistee ichoow eteenyoki Arkiiba layadeehe nah sina isleenaham ichoow urur Kiriistoki kol tuumman minkaah ka Waakh wahti laka a isoochiira.
[3] Waakkhi Aabbaheene ichoow Yeesso Kiriistohi Kamure ba atin imaalaane nebey atin kakaalaan.
[4] An kol tuumman Waakkheey kala'd a ilaaba geeddi an weysiheey ka kaasoo'helo.
[5] I'di tahe saggi at Yeessohi Kamureene ikakhuufto toro la at 'doo'di Waakh tuumman i'doonto, a daaga.
[6] Wihi an Waakh daaho, a kulanki Kiriistohi inno kakhuufno ka isikhabno gurnaan delo 'dee haaggi tuummane Kiriisto kayamiite inno khabno tuum abatta.
[7] Et Kiriistokaaw, 'dooninti at 'doo'd Kiriisto 'doonto weyti a ikahamaadisse, toro weyti uur imiigoosse, i'di tahe at 'doo'di Waakh uur a miigoosse.
[8] Antohi Kiriisto isiiche ka, a geeddi an roorro laan amur kibahcho wihi incheenka at yeesso kicheeko.
[9] I'daasenyi 'doonin Kiriisto ka, samacchaar on kihawwaasda. Ani a Baawulo kola a araarrowe, toro la jeente Yeesso Kiriisto jeela ikajira,
[10] a kihawwaasde, bal Oneesmo gargaar. Us kola a i'di weelaaya. I'di tahe an jeela kajiraayi, usu jit Kiriisto abche kola a i'doo an aabbahiis itah.
[11] 'Hor indigir us kikhabo mele, i'daasenyi toolla ati ichoow ani ba weyti indigir inno ikhaba.
[12] Usuhi an uureey ka weyti 'doono a kisoolaaba.
[13] Kootte incheenka geedda an jeela kajiro jeenteti an Wori Haaggan icheekuu, usuhi inta ka ileefiddiyo meessaah gelo igargaaro 'doona.
[14] I'daasenyi sammata at iayyin, anihi wohoo rucchul laka yeelo ma 'doono. I'da ka haaggi at yeesso ma lakihosso a wihi at 'doonto on.
[15] Kolossoo jeentetane geeddoo rucchul Oneesmo seley ibahteene, 'dee maanti us kisoonokhti jirtuu tuumman usu khabta.
[16] 'Deerka us kola bow'da menye, bow'da a kadeefa, a i'di walaalaahki at weyti 'doonto. An usu weyti 'doona, i'daasenyi 'dooninti at usu 'doonto iche weyti kutta. A mehe saggi weeli enenyet u ichoow Kamur ka us a walaalaahha, usu a 'doonta.
[17] 'Deerka chirri rumanka at ani hil Kiriisto ka i'di wahalhaah ikhaatto, Oneesmo saggi kootte at ani imartiisatti imartiiso.
[18] Chirri us khufoo kiyeele ommos us mogtoo kaakhabo, ani ikaguto.
[19] Ani Baawulo, yeeda dahantaaya kachiira. Mogtiis ani kisooguta. I'daasenyi jiroti ati ichoow Kiriisto wohoo kalday tahiin ka saggi at ani mog ikakhabto laka an ma kaayyeedo.
[20] Toollaka et Kiriistokaaw, inno ichoow Kiriisto a wohoo kalday gone, iroonoteey u wahaas an kaa'doono yeel. I'daakka weyti uur imiigoossa.
[21] Saggi at wihi an kidaahe iyeesso a tissiba, 'deerka khadaaba a kisoochiira. Saggi at wihi an kidaahe laka 'dirihicho iyeesso a garda.
[22] Wihi addane an kidaaho kallaayo, minki marti ka inti an baryo ihaaggi. A mehe khajjeeli an khabo a ki Waakh weysihiin daago, us toro ani goytiin isoolaabo.
[23] Ebaabarahi jeenteti us wor Yeesso Kiriisto 'doo'd ikacheekuu jeela ikaleejiro a kisoobariitiche.
[24] Toro la Marko ichoow Aristaarko ichoow Deema ichoow Luuka laka a kisoobariiticheen. Icho a 'doo'di hil Kiriisto ikaleejiro.
[25] Yeesso Kiriistohi Kamure ba rubeyohiin imaala.