<Дәстпебун 8

[1] Хwәде Нӧһ бир ани, ӧса жи һ'әму тәрәwьл у һ'әму һ'әйwанед т'әви wи гәмийеда, һьнге Хwәде бак ль ә'рде р'акьр у ав сәкьни.

[2] Канийед тәвәкед бебьнийе у к'ӧләкед ә'змана һатьнә гьртьне у барана ә'змен һатә бьр'ине.

[3] Бәрә-бәрә ав жь ә'рде дьк'ьшийа, пәй сәд пенщи р'ожир'а ав кем бу.

[4] Р'ожа һ'ьвдәһе мәһа һ'әфта гәми ль сәр ч'ийайед Арарате р'уньшт.

[5] Һ'әта мәһа дәһа чьqас дьчу ав кем дьбу у йәке мәһа дәһа сәред ч'ийа һатьнә к'ьфше.

[6] У чьл р'ожи шунда Нӧһ к'ӧләка гәмийа хwәйә чекьри вәкьр,

[7] у qар'qар' бәр'да, ле әw вьрда-wеда хwәр'а фьр'и һ'әта ава ль сәр ә'рде зьһа бу.

[8] Пәйр'а кәвотк жь щәм хwә бәр'да, кӧ бьбинә к'а ава ль р'уйе ә'рде кем буйә.

[9] Ле кәвотк щийе кӧ ньгед хwә ле данийа нәдит, бәр бь гәмийе ль сәр wида вәгәр'ийа, чьмки т'әмамийа р'уйе ә'рде һе ав бу, Нӧһ жи дәст авитә wе гьрт, ани щәм хwә кьрә гәмийе.

[10] Һ'әфт р'ожа жи сәбьр кьр, пәйр'а диса кәвотк жь гәмийе бәр'да.

[11] Бәре еваре кәвотк ль сәр wида вәгәр'ийа, wе бәлгәки зәйт'унейи ну нькӧлкьри девда, һьнге Нӧһ пе һ'әсийа кӧ ава ль сәр р'уйе ә'рде кем буйә.

[12] Һ'әфт р'ожед дьн жи сәбьр кьр, диса кәвотк бәр'да, ле әw иди ль сәр wида вәнәгәр'ийа.

[13] У шәсьд йәк салийа Нӧһда, йәке мәһа сәрсале ава ль сәр р'уйе ә'рде ч'ькийа. Нӧһ ар'ика гәмийе вәкьр у дина хwә дайе, кӧ ва йә ава ль сәр р'уйе ә'рде ч'ькийа йә.

[14] Бист һ'әфте мәһа дӧда ә'рд зьһа бу.

[15] Һьнге Хwәде Нӧһр'а хәбәрда у гот:

[16] «Тӧ т'әви жьна хwә, кӧр'ед хwә у жьнед wанва жь гәмийе дәре.

[17] Ӧса жи һ'әму бинбәред ль щәм тә, жь һ'әмуйед хwәйибәдән: Тәйрәдә, һ'әйwанед к'әди у һ'әму шулькийед кӧ ль сәр ә'рде дьшулькьн, т'әви хwә дәрхә, wәки әw ль сәр ә'рде бәла бьн, к'ока wан шин бә у ль һәв зедә бьн».

[18] Һьнге Нӧһ т'әви кӧр'ед хwә, жьна хwә у жьнед кӧр'ед хwә жь гәмийе дәрк'әт,

[19] һәр һ'әйwан, һәр шульки, һәр тәйрәдә, һәр чь кӧ ль сәр ә'рде дьльвьн щьсьнед хwәда жь гәмийе дәрк'әтьн.

[20] Нӧһ горигәһәк Хӧданр'а чекьр у жь һәр һ'әйwанед һ'әлал у жь һәр тәйрәдед һ'әлал һьлдан ль сәр горигәһе, дийарийа т'әвайишәwате дан.

[21] Һьнге Хӧдан бинәкә хwәш жь wе һьлда у дьле хwәда гот: «Иро шунда р'уйе мерьвда әз иди ньфьр'а ль ә'рде накьм, чьмки сьтqе дьле мерьв жь зар'отийеда хьраб ә у иди әз т'ӧ щар т'ӧ бинбәри нахьм чаwа мьн кьр.

[22] Иро шунда һ'әта кӧ ә'рд һәбә, чандьн у дьрун, сәрма у гәрмайи, һавин у зьвьстан, шәв у р'ож гәрәке т'ӧ щар нәсәкьньн».