[1] Усьв бәржери Мьсьре кьрьн. Wәзире Фьрәwьн, Потифаре мьсьрийи сәрwере нобәдара, әw жь дәсте исмайилийед кӧ әw бәржер бьрьбунә wьр к'ьр'и.
[2] Хӧдан т'әви Усьв бу, әw йәки хери жеһати бу у мала ахайе хwәйи мьсьрида дьма.
[3] Ахайе wи дит кӧ Хӧдан пер'а бу у һәр тьште кӧ әw дькә, Хӧдан бь дәсте wи ль һәв тинә.
[4] Усьв ль бәр ч'ә'ве wи к'әрәм дит у әw бу бәрдәстийе wи. Әwи әw кьрә бәрпьрсийаре мала хwә у һ'әму һәбука хwә да дәсте wи.
[5] Wи чахида гава әwи әw кьрә бәрпьрсийаре мала хwә, Хӧдан бона хатьре Усьв, дӧа һ'әму һәбука мала мьсьри кьр, чаwа кӧ йа малда, ӧса жи йа ә'рде.
[6] У чи wи һәбу һ'әму дәсте Усьвда һьшт у әw һаш тьштәки мала хwә т'ӧнә бу, пештьри wи нане кӧ дьхwар. Усьв бәжьн у баледа йәки бәрбьч'ә'в у бәдәw бу.
[7] Пәй ван йәкар'а, ӧса бу кӧ жьна ахайе wи ч'ә'в бәрда Усьв у готе: «Сәре хwә мьнр'а дайнә».
[8] Ле әwи т'әхсир кьр у готә жьна ахайе хwә: «Ахайе мьн һаш жь пе т'ӧнә мала wида чи wи щәм мьн һәйә у һ'әму һәбука хwә дайә дәсте мьн.
[9] Ве маледа жи жь мьн мәзьнтьр кәс т'ӧнә у тьштәк жи әwи жь мьн на-на нәкьрийә пештьри тә, чьмки тӧ жьна wи йи, әзе чаwа ве хьрабийа мәзьн бькьм у ль бәр Хwәде гӧнә бькьм?»
[10] Әве кӧ һәр р'о аһа дьготә Усьв, ле әwи гӧр'а wе нәдькьр, кӧ әw т'әви wе р'азе йан т'әви wе бә.
[11] У р'ожәке, гава әw к'әтә мале, кӧ шьхӧле хwә бькә у жь мәрьвед wе мале жи кәсәк нә малда бу,
[12] һьнге ханьме дәст авитә к'ьнща wи гьрт у гот: «Сәре хwә мьнр'а дайнә». Ле әwи к'ьнща хwә дәсте wева бәрда у р'әви дәрк'әтә дәрва.
[13] Чахе әwе дина хwә дайе, кӧ әwи к'ьнща хwә дества бәрда у р'әви дәрва,
[14] әwе гази мәрьвед мала хwә кьрьн, wанр'а гьли кьр у гот: «Һәла дина хwә бьдьне, әви чу ибраник ани кӧ намуса мәр'а бьлизә. Әва һатә щәм мьн, кӧ дәст бавежә мьн, ле мьн бь дәнге бьльнд кьрә qар'ин.
[15] Әви кӧ бьһист мьн дәнге хwә бьльнд кьр у кьрә qар'ин, к'ьнща хwә ль щәм мьн һьшт у р'әви дәрк'әтә дәрва».
[16] У әwе к'ьнща wи ль щәм хwә хwәй кьр, һ'әта кӧ хwәйе wе һатә мале.
[17] Диса әв готьна хwә wәк'ьланд готә wи: «Әw хӧламе ибранийи кӧ тә мәр'а анийә, һатә щәм мьн, кӧ намуса мьнр'а бьлизә.
[18] Ле гава мьн дәнге хwә бьльнд кьр у кьрә qар'ин, әwи к'ьнща хwә һьшт у р'әви дәрва».
[19] У гава ахайе wи әв хәбәр жь жьна хwә бьһистьн, кӧ жер'а гьли кьр гот: «Хӧламе тә әв йәк ани сәре мьн». Һерса wи р'абу.
[20] Ахайе Усьв әw гьрт авитә кәле, wи щийе кӧ гьртийед п'адше гьредайи бун. У әw ль wьр кәледа ма.
[21] Ле Хӧдан т'әви Усьв бу у һ'ӧба хwәйә амьн да к'ьфше, ӧса кӧ әwи бәр ч'ә'ве сәрwере кәле к'әрәм дит.
[22] Сәрwере кәле һ'әму гьртийед кәле данә дәсте Усьв. У чь кӧ ль wьр дьһатә кьрьне, әwи дьда кьрьне.
[23] Сәрwере кәле дина хwә нәдьда wан тьштед дәсте wида, чьмки Хӧдан т'әви wи бу у һ'әму шьхӧле wи Хӧдан жер'а ль һәв дани.