[1] Пәй ве йәкер'а готьнә Усьв: «Баве тә нәхwәш ә». Әwи һәр дӧ кӧр'ед хwә Мьнашә у Әфрайим т'әви хwә һьлдан чу.
[2] Щаб данә Аqуб у готьне: «Ва йә кӧр'е тә Усьв сәр тәда те». Исраел сәр qӧдуме хwәда һат у ль сәр ньвина хwә р'уньшт.
[3] Аqуб готә Усьв: «Хwәдейе Һәри Зор ль wәлате Кәнане Лузеда мьнва хӧйа бу, дӧа ль мьн кьр
[4] у готә мьн: ‹Әзе тә шин кьм у ль һәв зедә кьм у жь тә мьхӧлqәта пешда биньм, әви wәлати жи пәй тәр'а әзе чаwа мьлк'е һ'әта-һ'әтайе бьдьмә зӧр'әта тә›.
[5] Ньһа әw һәр дӧ кӧр'ед тәйә кӧ Мьсьреда, бәри һатьна мьнә щәм тә Мьсьре, кӧ тәр'а бунә, әw кӧр'ед мьн ьн, Әфрайим у Мьнашә, wе мина Р'убен у Шьмһ'ун бьбьнә кӧр'ед мьн,
[6] ле зар'ед пәй ванр'а кӧ жь тә бьбьн, тәр'а бьн, әwе wартийеда сәр навед бьратийа хwә бенә һ'әсабе.
[7] Чьмки гава әз жь Паддане дьһатьм, wәлате Кәнанеда, һьндьк мабу кӧ әм бьгьһиштана Әфрат'е, р'еда Р'аһела дийа тә мьнр'а бу дәрд мьр, мьн әw ль wе дәре, ль сәре р'ийа Әфрат'е, аwа готи Бәйтләһ'ме дәфьн кьр».
[8] Исраел кӧр'ед Усьв дитьн у гот: «Әв к'е нә?»
[9] Усьв готә баве хwә: «Кӧр'ед мьн ьн, йед кӧ Хwәде ль вьр данә мьн». Аqуб гот: «К'әрәма хwә wан бинә щәм мьн, әз дӧа ль wан бькьм».
[10] Ч'ә'ве Исраел жь мәзьнайе мә'рьм бьбун, әwи нькарьбу зәлал бьдита, Усьв әw незики баве хwә кьрьн, әwи әw р'амусан у һ'әмез кьрьн.
[11] Исраел готә Усьв: «Гӧмана мьн т'ӧнәбу кӧ мьн р'уйе тә жи бьдита, ле ва йә Хwәде зӧр'әта тә жи нишани мьн кьр».
[12] Усьв әw жь сәр чока wи р'акьрьн у хwәха һ'әта ә'рде дәвәр'уйа чу.
[13] Усьв һәр дӧ кӧр'ед хwә һьлдан, Әфрайим да дәсте хwәйи р'асте, алийе Исраели ч'әпе у Мьнашә да дәсте хwәйи ч'әпе, алийе Исраели р'асте у незики wи кьрьн.
[14] Исраел qәста дәстед хwә щигӧһастьн у дәсте хwәйи р'асте дьреж кьр дани сәр сәре йе бьч'ук Әфрайим у дәсте ч'әпе дани сәр сәре Мьнашә. Ле бәле Мьнашә йе ньхӧри бу.
[15] У дӧа Усьв кьр у гот: «Әw Хwәдейе кӧ бавед мьн Бьраһим у Исһаq р'ийа wида чунә, әw Хwәдейе кӧ жь р'ожа буйина мьнда һ'әта иро шьванти ль мьн кьрийә,
[16] әw мьлйак'әте кӧ әз жь һәр хьрабийе азад кьрьмә, бьра дӧа ван кӧр'а бькә у бь наве мьн у навед кал-бавед мьн Бьраһим у Исһаq бенә газикьрьне, нава дьнеда гәләки ль һәв зедә бьн».
[17] Гава Усьв дит кӧ баве wи дәсте хwәйи р'асте данийә сәр сәре Әфрайим, әва йәка ль wи хwәш нәһат, әwи дәсте баве хwә жь сәр сәре Әфрайим гьрт, wәки дайнә ль сәр сәре Мьнашә.
[18] Һьнге Усьв готә баве хwә: «Аһа на Баво, чьмки әв ә йе ньхӧри. Дәсте хwәйи р'асте, дайнә сәр сәре ви!»
[19] Ле баве wи qайл нәбу у гот: «Әз заньм лаwо, әз заньм. Әве жи бьбә мьләт, әвайе жи бьбә мәзьн. Ле бьрайе wийи бьч'ук, wе жь wи һе мәстьр бә у зӧр'әта wи wе бьбә мьхӧлqәта мьләта».
[20] Wе р'оже әwи дӧа wан кьр у гот: «Бьра Исраел пе тә бьмбарәк бькә у бежә: ‹Хwәде тә бькә мина Әфрайим у Мьнашә›», әв йәк гот у Әфрайим дани феза Мьнашә.
[21] У һьнге Исраел готә Усьв: «Ва йә әзе бьмьрьм. Ле Хwәде wе т'әви wә бә у wе wә вәгәр'инә wат'ане бавед wә.
[22] Әз п'аләкә ч'ийа сәр бьратийа тәр'а зедәтьр дьдьмә тә, к'ижан кӧ мьн әw жь дәсте әморийа бь шур у тир-кәване хwә станд».