[1] Аqуб ль wәлате хәрибийа баве хwә, wәлате Кәнанеда щи-wар бу.
[2] Әв ә сәрһатийа р'ьк'ьнйата Аqуб: Усьв һ'ьвдәһ сали бу, т'әви бьрайед хwә ль бәр пез бу. Әw сьвьке нава кӧр'ед жьнбавед хwә Билһайе у Зилпайеда бу. Усьв щаб-саwед wанә хьраб баве хwәр'а данин.
[3] Исраел жь нава кӧр'ед хwәда, жь һ'әмуйа зә'фтьр Усьв һ'ьз дькьр, чьмки әw кӧр', мәзьнайа wида бьбу у әwи к'ьнщәкә р'әнг-р'әнги у дьреж жер'а чекьр.
[4] Бьра дина хwә дане, кӧ баве wан, wи жь һ'әму бьра зә'фтьр һ'ьз дькә, әw ль бәр ч'ә'ве wан р'әш бу у нькарьбун заре хwәш пер'а хәбәрдана.
[5] Усьв хәwнәк дит, р'абу бьред хwәр'а гьли кьр, һьнге әw һе ль бәр ч'ә'ве wан к'әт.
[6] Әwи готә wан: «Һиви дькьм гӧһ бьдьнә ве хәwна кӧ мьн дитийә.
[7] Аwа әмә зәвийеда мә гӧр'з гьре дьдан, мьн дина хwә дайе wе гӧр'зе мьн р'абу т'ик сәкьни, ле аwа гӧр'зед wә дора wи гьртьн у ль бәр гӧр'зе мьн та бун».
[8] Бьрайед wи готьне: «Кӧ ӧса йә те ль сәр мә бьби п'адша? Йан ль сәр мә бьби һ'акьм?» У бона хәwн у хәбәред wи һе гәләки жәнандьнә wи.
[9] Хәwнәкә дьн жи диса дит, р'абу әw бьрайед хwәр'а гьли кьр у гот: «Аwа мьн хәwнәкә дьн жи дит: мьн дина хwә дайе wе һив у р'о у йанздәһ стәйркава ль бәр мьн та дьбун».
[10] Гава әwи бав у бьрайед хwәр'а гьли кьр, баве wи ле һьлат у готә wи: «Әв чь хәwн ә, кӧ тә дитийә? Чьма әз у дийа тә у бьрайед тәва, әме бен ль бәр тә һ'әта ә'рде та бьн?»
[11] Бьрайед wи һ'әвсудийа wи кьрьн, ле баве әв йәк дьле хwәда хwәй кьрьн.
[12] Бьрайед wи чунә Шьхәме ль бәр кәред пәзе баве хwә.
[13] Исраел готә Усьв: «Нә бьрайед тә ль Шьхәме ль бәр пез ьн? Wәрә әз тә бьшиньмә щәм wан». Усьв гот: «Әз һазьр ьм».
[14] Аqуб готә wи: «Һәла һәр'ә бьзаньбә к'а бьрайед тә сьламәт ьн у пәзи чаwа нә. Хәбәрәке мьнр'а бинә». Әw шандә дәшта Һеброне. Гава әw чу Шьхәме,
[15] мерәк р'асти wи һат, кӧ әw ль дәште бәр'ийеда дьгәр'ийа у wи мәрьви же пьрси: «Тӧ ль чь дьгәр'и?»
[16] Әwи готе: «Әз ль бьрайед хwә дьгәр'ьм, һиви дькьм бежә мьн, әw ль к'идәре пез дьч'ериньн?»
[17] Wи мәрьви гот: «Wан жь вьр бар кьр чун. Мьн бьһист кӧ wан дьготьн: ‹Әм һәр'ьнә Дот'ане›». Усьв пәй бьрайед хwә к'әт у әw ль Дот'ане дитьн.
[18] Гава әw дурва дитьн, һе незики wан нә бьбу, хәйба wи кьрьн кӧ wи бькӧжьн.
[19] У һәвр'а готьн: «Ва йә, йе хwәйе хәwна те!
[20] Дә wәрьн әм ви бькӧжьн у бавежьнә нава жь ван ч'ә'ла ч'ә'ләке. Әме бежьн кӧ р'ә'wьрәки бәйани әw хwарийә. Әме т'әсәлийа хәwнед wи кьн, к'а wе чаwа бьн!»
[21] Р'убен бьһист у әw жь дәсте wан хьлаз кьр у гот: «Әм ви нәкӧжьн».
[22] Р'убен готә wан: «Хуне нәр'ежьн, әwи бавежьнә ве ч'ә'ла чоле, дәсте хwә һьлнәдьнә ль сәр wи». Әwи әв йәк гот, wәки әw жь дәсте wан хьлаз кьра у ль баве вәгәр'анда.
[23] У гава Усьв һат гьһиштә бьрайед хwә, к'ьнща Усьв же ехьстьн, аwа готи әw к'ьнща wийә р'әнг-р'әнгийә дьреж кӧ ль wи бу.
[24] У әw гьртьн авитьнә ч'ә'ләке, әw ч'ә'л вала бу ав теда т'ӧнәбу.
[25] Р'уньштьн нане хwә бьхwьн. Wана дина хwә дане wе к'арване исмайилийа жь Гилә'д те. Дәвәйед wан бь бьһарәта, мәлһ'әме у зьмьр баркьри бун, бәржер дьбьрьнә Мьсьре.
[26] Һьнге Щьһуда готә бьрайед хwә: «Әме чь к'аре бьбиньн, һәгәр әм бьре хwә бькӧжьн у хуна wи вәшерьн?
[27] Wәрьн әм wи бьфьрошьнә исмайилийа у бьра дәсте мә ль wи нәк'әвьн. Чьмки әw бьрайе мә йә, жь хун у qьнета мә йә». Бьрайед wи гӧр'а wи кьрьн.
[28] Мьдйанийед базьрган кӧ дәрбаз дьбун, Усьв жь ч'ә'ле к'ьшандьн дәрхьстьн у Усьв бь бист зиви фьротьнә исмайилийа*. Wана жи Усьв бьрьнә Мьсьре.
[29] Р'убен сәр ч'ә'леда вәгәр'ийа, дина хwә дайе кӧ Усьв ч'ә'леда нинә. Һьнге әwи к'ьнще хwә qәлаштьн,
[30] ль сәр бьрайед хwәда вәгәр'ийа у гот: «Кӧр'ьк т'ӧнә! У әз, әз к'ӧда һәр'ьм?»
[31] Нерик сәржекьрьн у к'ьнща Усьв һьлдан хунеда кьрьн.
[32] Әw к'ьнща р'әнг-р'әнгийә дьреж шандьн, анин данә баве хwә у готьн: «Мә әв дитийә, һиви дькьм, дина хwә бьде, әва к'ьнща кӧр'е тә йә, те нас ки, йан на?»
[33] Әwи к'ьнщ нас кьр у гот: «Әва к'ьнща кӧр'е мьн ә! Р'ә'wьрәки бәйани әw хwарийә, Усьв һатийә дьр'андьне!»
[34] Аqуб к'ьнщед хwә qәлаштьн, к'ӧрх ль навк'елка хwә гьреда у гәләк р'ожа шина кӧр'е хwә кьр.
[35] Һ'әму кӧр'ед wи у һ'әму qизед wи р'абун кӧ дьл бьдьнә ль бәр wи, ле әwи qәбул нә дькьр у дьгот: «Әзе бь дьләки кӧл һәр'ьмә Дийаре Мьрийа, ль щәм кӧр'е хwә». У баве wи гьрийа бона wи.
[36] Мьдйанийа әw Мьсьреда фьротьнә Потифаре wәзире Фьрәwьни сәрwере нобәдара.