[1] Пәй ван йәкар'а, хәбәра Хӧдан дитьнокеда Абрамр'а һат у гот: «Нәтьрсә, Абрам, әз жь тәр'а мәрт'ал ьм, хәлата тәйе гәләки мәзьн бә».
[2] Һьнге Абрам гот: «Йа Хwәй Хӧдан! Те чь бьди мьн? Әзи ва бе зӧр'әт мамә, сәрwере мала мьн Елийазере Шаме йә».
[3] Абрам диса гот: «Тә кӧ зӧр'әт нәда мьн, ва йә хӧламе мала мьнда буйи wе дәwса wаре мьн бьгьрә».
[4] У аwа хәбәра Хӧдан һатә wи у гот: «Әw дәwса wаре тә нагьрә, ле йе кӧ wе жь бәдәна тә бьбә, әwе бьбә wаре тә».
[5] Һьнге Хӧдан әw дәрхьстә дәрва у готе: «Ньһа дина хwә бьдә ә'змен у стәйрка бьжмьрә, һәгәр дькари бьжмьри. У готе: ‹Зӧр'әта тәйе жи wе һаqаса бә›».
[6] Абрам баwәрийа хwә Хӧдан ани у wи әw йәк жер'а р'асти һ'әсаб кьр.
[7] Хӧдан диса готе: «Әз ьм әw Хӧдане кӧ тӧ жь Ура к'ьлданийа дәрхьсти, кӧ ви wәлати чаwа щи-wар бьдьмә тә».
[8] Абрам гот: «Йа Хwәй Хӧдан! Әзе чаwа заньбьм, кӧ әзе ви wәлати чаwа щи-wар бьстиньм?»
[9] Хӧдан готе: «Бона мьн ногьнәкә се сали, бьзьнәкә се сали, бәранәки се сали, фатьмокәке у кәвоткәкә фьр'ак'әти бинә».
[10] Абрам әв һ'әму жер'а анин у әw нивида кьрьнә дӧ qәти у һәр кәрики wан данә ль бәр кәрийе wан, ле тәйрәдә qәт нәкьрьн.
[11] П'әр'анийа тәйрәда хwә дьда ль сәр wан щәндәка, ле Абрам бәри wан дьда.
[12] Гава р'о чу ава, хәwәкә к'ур к'әтә ч'ә'ве Абрам у аwа саwәкә шәвәр'әшайә тә'ри к'әтә сәр wи.
[13] Һьнге Хӧдан готә Абрам: «Тӧ р'ьнд заньбә, кӧ зӧр'әта тәйе wәлатәкида бьк'әвә хәрибийе у wе хӧламтийе wанр'а бькьн, чарсьд сали әwе wан бьдьнә щәфе,
[14] ле диwана wи мьләте кӧ wе wан бькьнә хӧлам әзе бькьм у пәй wе йәкер'а әwе бь хер-хьзне жь wьр дәрен,
[15] те жи бь хер-хwәши һәр'и щәм кал-бавед хwә у каләки р'у-р'әман бейи дәфьн кьрьне.
[16] Ле зӧр'әта тәйә qӧр'на чарада wе вәгәр'ә вьр, чьмки к'аса гӧнәйед әморийа һе т'ьжи нәбуйә».
[17] У гава р'о чу ава у тә'ри к'әтә ә'рде, аwа дуки фьр'не у алавәкә егьр нава qәтед щәндәкар'а дәрбаз бу.
[18] Wе р'оже Хӧдан Абрамр'а пәйман гьреда у гот: «Ва әз ә'рде жь ч'әме Мьсьре һ'әта ч'әме мәзьн, аwа готи Фьрате, дьдьмә зӧр'әта тә:
[19] Wәлате qенийа, qьнизийа, qадмонийа,
[20] һ'итийа, пьриззийа, р'ьфайийа,
[21] әморийа, кәнанийа, гиргашийа у йәбусийа».