[1] Аqуб р'ийа хwәда чу. Мьлйак'әтед Хwәде р'асти wи һатьн.
[2] Гава Аqуб әw дитьн, гот: «Әва зома ордийа Хwәде йә». Наве wе дәре дани Маһ'анайим .
[3] Аqуб пешийа хwә qасьд шандьнә wәлате Сеһире, т'опрахе Әдоме, щәм бьре хwә Әсаw.
[4] У т'әми да wан у гот: «Аһа бежьнә хwәйе мьн Әсаw, кӧ хӧламе тә Аqуб аһа дьбежә: ‹Әз ль щәм Лабан бумә, һ'әта ньһа жи щәм wи хәрибийеда мамә.
[5] Га, к'әр, кәрийед пез, хӧлам у щари мьн qазьнщ кьрьнә. Ньһа әз дьшиньм, хwә хwәйе хwәва дьдьмә һ'әсандьне, кӧ әз бәр ч'ә'вед тә к'әрәме бьбиньм›».
[6] Qасьд ль сәр Аqубда вәгәр'ийан у готьне: «Әм чунә щәм бьре тә Әсаw, ва йә әw чарсьд мәрьвива пешийа тәда те».
[7] Аqуб гәләки тьрсийа у т'әвиһәв бу у р'абу мәрьвед т'әви хwә, пәз у дәwар, дәвә кьрьнә дӧ п'ара.
[8] Дьгот: «Һәгәр Әсаw ль сәр п'арәкеда бьгьрә у лехә, һәма п'ара дьн же хьлаз бә».
[9] Һьнге Аqуб гот: «Йа Хwәдейе баве мьн Бьраһим у Хwәдейе баве мьн Исһаq, Хӧдано! Кӧ тә мьнр'а гот: ‹Вәгәр'ә wәлате хwә, ль wат'ане хwә, әзе qәнщийе ль тә бькьм!›
[10] Әз нә һежайи т'әмамийа һ'ӧб у амьнийа тәйә qәдим ьм, к'ижан кӧ тә qуле хwәр'а кьрьнә, чьмки әз бь шьвдара дәсте хwә жь ве Урдӧне дәрбаз бум у ньһа бумә хwәйе дӧ п'ара.
[11] К'әрәма хwә, мьн жь дәсте бьре мьн Әсаw хьлаз кә, чьмки әз же дьтьрсьм, нәбә кӧ әw бе, мьн, де у зар'окава хә.
[12] Нә тә готийә: ‹Әзе ә'сәйи qәнщийе ль тә бькьм у зӧр'әта тә бькьмә wәкә qума бә'ре, кӧ жь гәләкбуне wе нәйе жьмаре›».
[13] Аqуб шәва хwә ль wе дәре дәрбаз кьр, р'абу жь һәр тьште хwә, бьре хwә Әсаwр'а п'ешк'еш һазьр кьрьн.
[14] Дӧсьд бьзьн, бист нери, дӧсьд ми, бист бәран,
[15] си дәвед зайи щә'шькед wанва, чьл ч'еләк, дәһә бохә, бист к'әре ме у дәһә йе нер вәqәтандьн.
[16] Һәр кәри, башqә-башqә, данә дәсте хӧламед хwә у готә хӧлама: «Пешийа мьн һәр'ьн, бьра һәр кәри дури һәв, ль пәй һәв һәр'ьн».
[17] Ә'мьр ль йе пешийе кьр у готе: «Гава бьре мьн Әсаw р'асти тә бе у жь тә бьпьрсә: ‹Тӧ к'е йи у те к'ӧда һәр'и? У әвед ль пешийа тә йед к'е нә?›
[18] Һьнге тӧ бежә: ‹Әв йед хӧламе тә Аqуб ьн, әвана п'ешк'еш хwәйе хwә Әсаwр'а шандьнә, ва йә әw хwәха жи ль пәй мә те›».
[19] Аһа жи т'әми да йе дӧда, йе сьсийа у һ'әмуйед кӧ ль пәй кәрийа дьчун у гот: «Аһа бежьне гава һун р'асти Әсаw бен
[20] у бежьне: ‹Ва йә хӧламе тә Аqуб жи ль пәй мә те›». Чьмки әwи хwәха хwәр'а дьгот: «Бь ван п'ешк'ешед кӧ әз бәри хwә дьшиньм, әзе дьле wи бьк'ьр'ьм, паше р'уйе wи бьбиньм, бәлки әw мьн qәбул кә».
[21] П'ешк'еш пешийа wи чун, ле Аqуб шәва хwә зомеда дәрбаз кьр.
[22] Аqуб wе шәве р'абу, һәр дӧ жьнед хwә, һәр дӧ щарийед хwә у һәр йанздәһ кӧр'ед хwә һьлдан у тәнькайийа Йабоqр'а дәрбаз бу
[23] у әw һьлдан аве хьстьн дәрбаз кьрьн, һәр тьштед хwә, чи wи һәбу дәрбаз кьрьн.
[24] Аqуб т'әне ма. Мәрьвәк һ'әта саре сьбәһе жер'а к'әтә дәстәгӧлаше.
[25] Әwи дит кӧ ль Аqуб нькарә, әw ль севька qарч'ька wи к'әт у дәма дәстәгӧлаше Аqуб qарч'ькеда сьст бу.
[26] Һьнге әwи готә Аqуб: «Мьн бәр'дә әз һәр'ьм, чьмки ва йә сьбәһ зәлал дьбә». Аqуб гот: «Һ'әта тӧ дӧа ль мьн нәки әз тә бәр'надьм».
[27] Әwи готә wи: «Наве тә чи йә?» Аqуб гот: «Аqуб ә».
[28] Әwи гот: «Иди наве тә Аqуб нәйе готьн, ле Исраел , чьмки тӧ Хwәде у мәрьвар'а к'әти һ'ӧщәте у тӧ сәр к'әти».
[29] Һьнге Аqуб пьрси у гот: «Һиви дькьм, наве хwә бежә». Әwи гот: «Тӧ чьма наве мьн дьпьрси?» У ль wи щийи дӧа ль wи кьр.
[30] Аqуб наве wи щийи дани Пьнийел у гот: «Чьмки мьн Хwәде р'у бь р'у дит у әз сах мам».
[31] У гава әw жь Пьнӧеле дәрбаз бу, р'о дәрк'әт у Аqуб qарч'ькеда дькӧлийа.
[32] Ләма жи һ'әта р'ожа иро, зар'ед Исраеле ч'иле сәр севька qарч'ьке нахwьн. Чьмки ль ч'иле севька qарч'ька Аqуб к'әт.