[1] У ӧса qәwьми, кӧ wи чахи Щьһуда жь щәм бьрайед хwә бәржер бу, чу щәм мәрьвәки ә'дуллами, наве wи Һ'ира.
[2] Ль wе дәре Щьһуда qиза Шуа мәрьвәки кәнани дит, әw станд сәре хwә wер'а дани.
[3] Әwа пе ма кӧр'әк ани, Щьһуда наве wи дани Әр.
[4] Әw диса пе ма кӧр'әк ани, наве wи дани Онан.
[5] Әwе диса кӧр'әк ани, наве wи дани Шелаһ. Гава әwе әw зар' ани, Щьһуда ль К'ьзибе бу.
[6] Щьһуда кӧр'е хwәйи ньхӧри Әрр'а qизәк ани, наве wе Т'амара.
[7] Кӧр'е Щьһудайи ньхӧри Әр, ль бәр ч'ә'ве Хӧдан йәки хьраб бу у Хӧдан әw кӧшт.
[8] Щьһуда готә Онан: «Борще т'ийитийе бьqәдинә: т'әви жьна бьре хwә р'азе, wе бьстинә у зӧр'әте пәй бьре хwә хә».
[9] Онан фә'м кьр, кӧ әw зӧр'әта wи найе һ'әсабе, гава т'әви жьнбьра хwә р'адьза, әwи мәйа хwә дьр'етә ә'рде, кӧ зӧр'әте ль пәй бьре хwә нәхә.
[10] Әв кьрьна wи ль бәр ч'ә'ве Хӧдан хьраб к'ьфш кьр, әw жи кӧшт.
[11] Щьһуда готә бука хwә Т'амарайе: «Жьнәби мала баве хwәда р'уни, һ'әта кӧр'е мьн Шелаһ мәзьн бә». Чьмки дьгот: «Бәлки әw жи мина бьрайед хwә бьмьрә». Т'амара чу ль мала баве хwә р'уньшт.
[12] Гәләк wәхт дәрбаз бу, qиза Шуайе жьна Щьһуда мьр. Щьһуда барьстан бьбу, р'абу хwәха бь т'әви досте хwә Һ'ирайе ә'дуллами һәвраз чу Т'имнаһе, щәм пәзбьр'ед кәре пәзед хwә.
[13] Һьнге щаб данә Т'амарайе готьн: «Ва йә хәзуре тә һәвраз те Т'имнаһе пәзе хwә бьбьр'ә».
[14] Әве к'ьнща жьнәбитийа хwә жь хwә ехьст, хwә хели кьр у хwә п'еч'а у бәр дәргәһе Әйнайиме, ль сәр р'ийа Т'имнаһе р'уньшт. Чьмки әwе дит кӧ Шелаһ мәзьн буйә у әw нәданә wи.
[15] Гава Щьһуда ч'ә'в wе к'әт, wи т'ьре әw qавәк ә, чьмки әwе р'уйе хwә ньхамтьбу.
[16] Жь р'е дагәр'ийа бәрбь wе чу у готе: «Те qайл би кӧ сәре хwә мьнр'а дайни?» Чьмки wи ньзаньбу кӧ әw бука wи йә. Әwе гот: «Те чь бьди мьн кӧ тӧ сәре хwә мьнр'а дайни?»
[17] Әwи гот: «Әзе жь нава кери карәке тәр'а бьшиньм». Әwе гот: «Те чь к'әфил бьһели һ'әта кӧ тӧ бьшини?»
[18] Әwи гот: «Әз чь к'әфил бьһельм?» Әwе гот: «К'а мора хwә, бәнпьшта хwә у даре дәсте хwә». Әwи жи әw тьшт данә wе у сәре хwә пер'а дани. У әw жь wи һ'әмлә дәрк'әт.
[19] Т'амара р'абу чу, хелийа ль сәр хwә һьлда у к'ьнща жьнәбитийа хwә ль хwә кьр.
[20] Щьһуда бь дәсте досте хwә ә'дуллами кар шанд, wәки к'әфил жь дәсте wе к'ӧлфәте бьстинә, ле әwи әw нәдит.
[21] Жь мәрьвед wьр пьрси у гот: «Әwа хwәфрошә ль сәре р'ийа Әйнайиме к'ӧ йә?» Ле wана гот: «Ль вьр хwәфрош т'ӧнә буйә».
[22] Әw вәгәр'ийа щәм Щьһуда у готе: «Мьн әw нәдит, мәрьвед ль wьр жи готьн: ‹Ль вьр хwәфрош т'ӧнә буйә›».
[23] Щьһуда гот: «Бьра һәма жер'а бә, т'әне әм нәбьнә р'обәт. Ва йә мьн әв кара шанд, ле тә әw нәдит».
[24] Пәй се мәһар'а, готьнә Щьһуда: «Бука тә Т'амара qави кьрийә у ньһа жь wе qавийе гьран ә». Щьһуда гот: «Wе дәрхьн у бьра әw бе шәwьтандьне».
[25] Гава әw дәрдьхьстьнә дәрва, әwе щаб сәр хәзуре хwәда шанд у гот: «Әз жь әwи хwәйе ван тьшта гьран ьм» у гот: «Һиви дькьм бьра бьзаньбә ве море, бәнпьште у дар нас дьки?»
[26] Һьнге Щьһуда наскьрьн у гот: «Әw жь мьн р'асттьр ә, чьмки мьн әw нәда кӧр'е хwә Шелаһ». У иди нәчу щәм wе.
[27] У гава к'әтә ль бәр р'азане, хӧйа бу кӧ ва йә зькада щеwи нә.
[28] Чахе зар' дьбун, дәстәк хӧйа бу, пирәдәргуше бәнәки сор ль дәсте wива гьреда у гот: «Әва йе ә'wльн ә».
[29] Әwе кӧ дәсте хwә чаwа пашда к'ьшанд, бьрайе wийи дьн бу. Һьнге әwе гот: «Тә чь qәльшток бона хwә вәкьр!» Һьнге наве wи Перес һатә данине.
[30] Пәйр'а бьре wийи кӧ бәне сор ль дәсте wива гьредайи бу. Һьнге наве wи Зәраһ һатә данине.