[1] Хӧдан сәрик ль Сәрайе хьст, чаwа кӧ готьбу у созе бона Сәрайе дабу ани сери.
[2] Сәрайи һ'әмлә дәрк'әт, Бьраһимр'а wе мәзьнайа wида кӧр'әк ани, wи wә'дәйида кӧ Хwәде жер'а готьбу.
[3] Бьраһим наве wи кӧр'е хwәйи кӧ Сәрайе жер'а ани, Исһаq дани.
[4] У Бьраһим чаwа кӧ Хwәде т'әми wи кьрьбу, кӧр'е хwә Исһаq р'ожа һ'әйшта сьнәт кьр.
[5] Бьраһим сәд сали бу, гава кӧр'е wи Исһаq жер'а бу.
[6] Һьнге Сәрайе гот: «Хwәде әз дамә к'әнандьне, к'ижанед кӧ бона мьн бьбьһен, әwе жи т'әви мьн бьк'әньн».
[7] Ӧса жи гот: «Qәт к'е wе бьгота Бьраһим: ‹Сәрайи wе дәргушед кӧр'ин бьмежинә?› Чьмки мьн мәзьнайа wида wир'а кӧр' ани».
[8] Кӧр'ьк мәзьн бу, жь шир һатә бьр'ине, Бьраһим wе р'ожа кӧ Исһаq жь шир һатә бьр'ине, мәсрәфәкә мәзьн дани.
[9] Сәрайе дина хwә дайе, wәки әw кӧр'е Һащәра мьсьри, йе кӧ wе Бьраһимр'а анибу, qәрфе хwә Исһаq дькә,
[10] готә Бьраһим: «Бәри ве щарийе у кӧр'е wе дә, чьмки кӧр'е ве щарийе гәрәке т'әви кӧр'е мьн Исһаq wар нәстинә».
[11] Әв готьна һьндава кӧр'е wи Исмайилда, гәләки гьран ль сәр Бьраһим р'уньшт.
[12] Ле Хwәде готә Бьраһим: «Бьра әw готьна бона кӧр'ьке тә у щарийа тә ль сәр тә гьран р'унәни, чь кӧ Сәрайе тәр'а готийә гӧһдарийа готьна wе бькә, чьмки зӧр'әта тәйе Исһаqда бе навкьрьне.
[13] Әзе кӧр'е щарийе жи бькьмә мьләтәки, чьмки әw жи зӧр'әта тә йә».
[14] Бьраһим сьбәһе зу р'абу, нан у мәшкә ав һьлда да Һащәре, да ль сәр мьле wе, кӧр'ьк жи пер'а дәрхьст. Һащәр чу гьһиштә чол-бәста Бир-Шева, р'е-дьрб ӧнда кьрьн.
[15] Ава мәшкда хьлаз бу, әwе кӧр'ьк бьне чалукеда һьшт
[16] у чу wәкә дурайа тиравитьнәке, пешбәри wи дур р'уньшт у гот: «Әз мьрьна кӧр'ьк нәбиньм». У әwа пешбәри wи р'уньшт, зарин кьр у гьрийа.
[17] Һьнге Хwәде дәнге кӧр'ьк бьһист, мьлйак'әте Хwәде жь ә'змен дәнг да Һащәре у гот: «Чь буйә Һащәр? Нәтьрсә! Хwәде дәнге кӧр'ьк жь wи щийи бьһист.
[18] Ньһа р'абә, дәсте кӧр'ьк бьгьрә р'акә, чьмки әзе wи бькьмә мьләтәки мәзьн».
[19] Һьнге Хwәде ч'ә'ве Һащәре вәкьрьн, әwе бирәкә аве дит у чу мәшк ав дагьрт, кӧр'ьк да вәхwарьне.
[20] Хwәде т'әви кӧр'ьк бу, әw мәзьн бу, чол-бәстада ма у бу тиркәван.
[21] Бәр'ийа Паранеда ма у дийа wи qизәкә жь Мьсьре жер'а хwәст.
[22] У wе һьнге Абимәләх у сәрәкәскәред wи Пихол, Бьраһимр'а готьн: «Хwәде һәр тьштида т'әви тә йә, чь кӧ тӧ дьки.
[23] Ньһа ль ве дәре дәсте мьнда пе Хwәде сонд бьхwә, wәки те бебәхтийе ль мьн, кӧр'е мьн у зӧр'әта мьн нәки, ле бьди хатьре wе амьнийа мьнә һьндава хwәда, тӧ мьн у ви wәлатир'а бьки, к'ижанида кӧ тӧ хәриби дьмини».
[24] Бьраһим гот: «Әз сонд дьхwьм».
[25] Ле Бьраһим бона бирәке да р'уйе Абимәләх, йа кӧ хӧламед wи бь зорбәтийе зәфт кьрьбун.
[26] Абимәләх гот: «Әз һаш пе т'ӧнәбуне к'е әw йәк кьрийә, тә жи т'ӧ тьшт мьнр'а нәготийә у һ'әта р'ожа иро жи мьн нәбьһистьбу».
[27] Бьраһим пәз у дәwар анин данә Абимәләх у һәр дӧйа жи һәвр'а пәйман гьредан.
[28] Бьраһим жь кәре пез һ'әфт бәрхед ме вәqәтанд башqә кьрьн.
[29] Абимәләх жь Бьраһим пьрси: «Әв һәр һ'әфт бәрхед мейә кӧ тә вәqәтанд башqә кьрьн, чь те һ'әсабе?»
[30] Бьраһим готе: «Гәрәке тӧ ван һәр һ'әфт бәрхед ме жь дәсте мьн бьгьри, wәки бьбьнә шә'дед мьн, кӧ мьн әв бир к'ола йә».
[31] Ләма жи наве wи щийи дани Бир-Шева , чьмки һәр дӧйа жи ль wьр сонд хwарьн.
[32] Wана Бир-Шевайеда ад-qьрар кьрьн. Абимәләх у сәрәкәскәред wи Пихол р'абун вәгәр'ийан wәлате Фьльстине.
[33] Бьраһим ль бәр бира Бир-Шевайе дарәкә кәнаре дач'ьканд у ль wе дәре гази наве Хӧдан, Хwәдейе Һ'әта-һ'әтайе кьр.
[34] Бьраһим wәхтәки дьреж ль wәлате фьльстинийеда хәрибийеда ма.