<Дәстпебун 7

[1] Хӧдан готә Нӧһ: «Р'абә т'әви нәфәред хwә бьк'әвә гәмийе, чьмки нава мәрьвед ви зәманида мьн тӧ ль бәр хwә р'аст дити.

[2] Жь һәр һ'әйwанед һ'әлал һ'әфт щота нер у ме т'әви хwә һьлди, ле жь һ'әйwанед һ'әрам щот-щот һьлди нер у ме,

[3] жь тәйрәдед ә'змен жи һ'әфт щот нер у ме, wәки т'ур'а wан ль сәр р'уйе ә'рде бе хwәйкьрьне.

[4] Чьмки һ'әфт р'ожа шунда, әзе чьл р'ожи у чьл шәви баране бьбариньм у һәр һәйинед кӧ мьн чекьрьнә жь р'уйе ә'рде бьдьмә һьлдане».

[5] У Нӧһ һәр тьшт кьр, Хӧдан чаwа т'әми дабу wи.

[6] Һьнге Нӧһ шәсьд сали бу, гава ава тофане ль сәр ә'рде р'абу.

[7] У жь бәр ава тофане Нӧһ т'әви кӧр'ед хwә у т'әви жьна хwә у букед хwә к'әтә гәмийе.

[8] Ӧса жи жь һ'әйwанед һ'әлал у нә һ'әлал, жь тәйрәда у жь һәр шулькийед ль сәр ә'рде,

[9] щот-щот нер у ме һатьнә щәм Нӧһ к'әтьнә гәмийе, чаwа кӧ Хwәде т'әми Нӧһ кьрьбу.

[10] У һ'әфт р'ожа шунда ава тофане ль ә'рде р'абу.

[11] Шәсьд салийа ә'мьре Нӧһда, р'ожа һ'ьвдәһе мәһа дӧда, һәма wе р'ожеда һ'әму канийед тәвәкед бебьнийе дәр бун у к'ӧләкед ә'змана вәбун,

[12] чьл р'ожи у чьл шәви ль сәр ә'рде баран бари.

[13] Хут wе р'ожеда Нӧһ кӧр'ед хwәва Сам, Һам, Йәфәт у жьна Нӧһ һәр се букава т'әви wан к'әтьнә гәмийе.

[14] Әwана у һәр тәрәwьлед щур'ед хwәда, һәр һ'әйwанед к'әдийә щур'ед хwәда, һәр шулькийед ль сәр ә'рдейә щур'ед хwәда, һәр тәйрәдед щур'ед хwәда у һәр тәйрәдед хwәйибаск,

[15] жь һ'әму һ'әйwанед бинбәр щот-щот к'әтьнә гәмийе ль щәм Нӧһ.

[16] Әwед кӧ к'әтьнә гәмийе, йе нер у ме к'әтьне жь һәр бинбәри, чаwа кӧ Хwәде т'әми wи кьрьбу. У пәй wир'а Хӧдан дәри гьрт.

[17] Тофане ль сәр ә'рде чьл р'ожи к'ьшанд, ав qайим бу гәми бьльнд кьр у әw жь ә'рде qәтийа.

[18] Чьqас дьчу ав qайим дьбу, ль сәр ә'рде бьльнд бу у гәми ль сәр р'уйе аве к'әт.

[19] Ав ль сәр ә'рде ӧса гәләки бьльнд бу, wәки һ'әму ч'ийайед бьльндә бьн п'әр'е ә'зменда ньхамтьн.

[20] Ав жь панздәһ зәнда жортьр сәр wан к'әт у ч'ийа-бани һатьнә ньхамтьне.

[21] У һ'әмуйед хwәйибәдәнә кӧ ль сәр ә'рде дьльвийан, тәйрәдә бун, һ'әйwанед к'әди бун, тәрәwьл бун, һ'әму шулькийед ль сәр ә'рде кӧ дьшулькин, мәрьв жи пер'а qьр' бун чун.

[22] Йед ль сәр бәжейә кӧ бина жийине ль бәр һәбун, һ'әму жи хәньqин.

[23] У һәр һәйине ль р'убари ә'рде һатә һьлдане, жь мерьв һ'әта һ'әйwанед к'әди, жь шулькийа һ'әта тәйрәдед ә'змана, әвана жь ә'рде һатьнә һьлдане, т'әне Нӧһ ма у йед т'әви wи гәмийеда.

[24] Сәд пенщи р'ожи ль сәр ә'рде ав wе бьльндайийе ма.