[1] Хwәде готә Аqуб: «Р'абә һьлк'ьшә һәр'ә Бет'-Еле, ль wьр бьминә у горигәһәке чекә бона Хwәдейе кӧ тәва хӧйа бу, гава тӧ жь бәр бьрайе хwә Әсаw р'әвийи».
[2] Аqуб готә нәфәред хwә у һ'әмуйед т'әви хwә: «Хwәдейед хәрибә нава хwәда бьгьрьн бавежьн, паqьж бьн у к'ьнще хwә бьгӧһезьн.
[3] У әм р'абьн бәрбь жор һәр'ьнә Бет'-Еле, ль wьр горигәһәке wи Хwәдейир'а чекьм, йе кӧ р'ожа тәнгасийа мьнда дәнге мьн бьһист у wе р'ийа кӧ әз теда чум т'әви мьн бу».
[4] Һьнге wан һ'әму хwәдейед хәриб, чь дәстед wанда һәбун у гӧһаред гӧһед хwәда данә Аqуб. Аqуб әw ль бьн дара мә'зейә незики Шьхәме ч'ә'л кьр.
[5] У әw р'ек'әтьн, саwа Хwәде к'әтә ль сәр бажаред дәр-доред wан у пәй кӧр'ед Аqуб нәк'әтьн.
[6] Аqуб хwәха у һ'әму щьмә'та пер'а һатә Лузе, аwа готи Бет'-Еле, ә'рде Кәнане.
[7] Ль wьр горигәһәк чекьр у наве wе дани Ел-Бет'-Ел . Чьмки ль wьр Хwәде wива хӧйа бьбу, гава әw жь бәр бьрайе хwә р'әви бу.
[8] Хwәйкьрийа Р'евекайе, Дьвора мьр, әw бьнийа Бет'-Еле, бьн мә'зеда һатә дәфьнкьрьне у наве wьр һатә данин Алон-Баqут .
[9] Гава Аqуб жь Паддан-Араме дьһат, Хwәде диса wива хӧйа бу у дӧа ль wи кьр.
[10] У Хwәде готе: «Наве тә Аqуб ә! Ле иро шунда тәр'а Аqуб нәбежьн, ле наве тә Исраел бә». У наве wи дани Исраел.
[11] У Хwәде готә wи: «Әз Хwәдейе Һәри Зор ьм, шин бә у ль һәв зедә бә. Wе жь тә мьләтәк у мьхӧлqәтед мьләта дәрен. У жь бәдәна тә п'адшайе дәрен.
[12] Әw wәлате кӧ мьн дабу Бьраһим у Исһаq, әзе бьдьмә тә, пәй тәр'а жи wи wәлати әзе бьдьмә зӧр'әта тә».
[13] У Хwәде жь wи щийе кӧ пер'а хәбәр дьда, жорва һатә һьлатьне.
[14] Аqуб ль wи щийе кӧ Хwәде пер'а хәбәрда һ'әйкәләк да сәкьнандьне, һ'әйкәләки кәвьри. Сәр келькеда дийарийа сәрдакьрьне у р'ун р'етә сәр.
[15] Аqуб наве wи щийе кӧ Хwәде пер'а хәбәр дабу дани Бет'-Ел.
[16] Жь Бет'-Еле к'оч' кьрьн, һьндьк мабу кӧ бьгьһиштана Әфрат'е, Р'аһел к'әтә ль бәр зар'е у гәләки щәфа к'ьшанд.
[17] Гава гәләки щәфа дьк'ьшанд, пирәдәргуше готә wе: «Нәтьрсә әва жи тәр'а кӧр' ә».
[18] Гава әwе р'ӧһ'е хwә дьда, ль бәр мьрьне наве wи дани «Бән-Они ». Ле баве наве wи дани Бьнйамин .
[19] У Р'аһел мьр, әw ль сәр р'ийа Әфрат'е, аwа готи Бәйтләһ'ме һатә дәфьнкьрьне.
[20] Аqуб ль сәр т'ьрба wе кәвьрәк да сәкьнандьне, кӧ һ'әта иро жи кәвьре т'ьрба Р'аһеле йә.
[21] Исраел к'оч' кьр чу, коне хwә ль пьшта Мигдал-Ә'дәр вәгьрт.
[22] Гава Исраел ль wи wәлати дьма, Р'убен чу дәст авитә щарийа баве хwә Билһайе. Исраел әв йәк бьһист . Донздәһ кӧр'ед Аqуб һәбун.
[23] Кӧр'ед Леайе: Ньхӧрийе Аqуб Р'убен, Шьмһ'ун, Леwи, Щьһуда, Исахар у Зәбулон бун.
[24] Кӧр'ед Р'аһеле: Усьв у Бьнйамин бун.
[25] Кӧр'ед щарийа Р'аһеле, Билһайе: Дан у Нәфтәли бун.
[26] Кӧр'ед щарийа Леайе, Зилпайе: Гад у Ашер бун. Әвана бун кӧр'ед Аqубә кӧ Паддан-Арамда жер'а бьбун.
[27] Аqуб һатә Мамре, Qирйат-Арбайе, аwа готи Һеброне ль щәм баве хwә Исһаq, wи щийе кӧ Бьраһим у Исһаq хәриби дәрбаз кьрьбун.
[28] Р'ожед ә'мьре Исһаq сәд һ'әйште сал бун.
[29] Исһаq кал бьбу, жь ә'мьре хwә т'ербуйи, р'ӧһ'е хwә да у мьр. Әw т'әви щьмә'та хwә бу, кӧр'ед wи Әсаw у Аqуб әw дәфьн кьрьн.