[1] Kòm se ansanm avèk Bondye n ap travay, n ap egzòte NOU pou NOU pa resevwa gras Bondye a epi pou l rete initil.
[2] Paske, Bondye di: Nan tan mwen aksepte moun, mwen te koute w. E, jou mwen sove moun, mwen te pote w sekou. Gade! Tan Bondye ap aksepte moun nan, se kounye a. Gade! Jou l ap sove moun nan, se kounye a.
[3] Mwen menm ak lòt yo, nou pa fè anyen ki pou ta lakòz pèsonn bite, dekwa pou moun pa kritike ministè a.
[4] Okontrè! Nou demontre nou se sèvitè Bondye nan tout bagay, nan andire anpil bagay, anba tribilasyon, nan nesesite, nan tèt chaje,
[5] anba baton, nan prizon, nan mitan dechoukay, nan travay di, nan pase nuit blanch, nan jèn.
[6] Nou demontre l nan jan lavi nou pwòp, nan konesans nou, nan pasyans nou, nan bonte nou, nan Lespri Sen an, nan lamou nou ki san ipokrizi,
[7] nan mesaj verite a, nan pisans Bondye. Nou demontre l avèk zam jistis yo ki la ni pou atak, ni pou defans.
[8] Nou demontre l nan glwa ak nan dezonè, avèk ni bon non, ni move non. Nou demontre l lè yo trete nou tankou moun ki sou blòf, alòske nou nan laverite;
[9] tankou moun yo pa rekonèt, alòske yo byen rekonèt nou; tankou moun mouri, alòske gade! Nou vivan; tankou moun yo bat, alòske yo pa tiye nou.
[10] Nou demontre l, lè yo trete nou tankou moun nan lapenn, alòske nou toujou nan lajwa; tankou moun pòv, alòske nou fè anpil moun rich; tankou moun ki san byen, alòske nou posede tout bagay.
[11] Moun Korent, mwen menm ak lòt yo, nou louvri bouch nou pou nou pale ak NOU. Kè nou louvri byen laj.
[12] Li pa fèmen pou NOU, Korentyen. Se NOU menm ki fèmen kè NOU pou mwen menm ak lòt yo.
[13] Kite m pale avèk NOU tankou pitit mwen: Fè menm jès la avèk mwen. Louvri kè NOU byen laj pou mwen tou.
[14] Pa mete tèt NOU nan menm jouk ak moun ki pa konvèti. Vrèmanvre, èske jistis ka nan asosye ak rebelyon? Èske limyè ka gen inyon ak fènwa?
[15] Èske Kris ka nan kòkòday ak Belyal? Oubyen, èske yon moun ki konvèti ka fè akò ak yon moun ki pa konvèti?
[16] Èske tanp Bondye a ka kolabore ak zidòl? Epoutan, menm jan Bondye te di l la, nou menm, se tanp Bondye vivan an, nou ye. Bondye te di: Mwen va abite, mwen va mache nan mitan yo. Mwen va Bondye yo. E, yo menm, yo va pèp mwen.
[17] Poutèt sa, Senyè a di: «Soti nan mitan yo! Separe tèt nou! Pa manyen bagay ki pa pwòp. Epi, mwen menm, m a resevwa nou.
[18] Mwen va yon Papa pou nou. Epi, nou menm, nou va pitit gason mwen ak pitit fi mwen. Se Senyè Toupisan an ki di sa!»