[1] Heu-lòi, ngài khon-tó si-ke thiên-sṳ́ khî chhai thi ke si-chak kok-thèu, tóng-tén thi-song si-mien ke fûng, m̀ pûn fûng chhôi chhai thi-song, hói-song, ya-he su-é ke táng-kô.
[2] Ngài yu khon-tó nang-ngoi yit-ke thiên-sṳ́, púng-tén yún-sên Song-ti ke yin-é, tui tûng-fông sông-lòi. Kì thai-sâng tui ke liâng-su Song-ti só-su ke khièn-piang, nèn pho-fai thi lâu hói ke si-ke thiên-sṳ́ hêm-kóng:
[3] “M̀-hó sông-hoi thi, hói, ya-he su-é, tén ngài-têu chhai Song-ti ke chung phu̍k-ngìn ngiak-thèu-táng chém yin-é.”
[4] Ngài thâng-kóng, chhai Yî-set-lie̍t ke kok kî-chhu̍k chûng su chém yin-é ke, chúng-su yû sṳ̍p-si-van si-chhiên ngìn:
[5] Yù-thai kî-chhu̍k chûng chiap-su chém yin-é ke, yû yit-van lióng-chhiên ngìn; Lî-phien kî-chhu̍k, yit-van lióng-chhiên ngìn; Kâ-tet kî-chhu̍k, yit-van lióng-chhiên ngìn;
[6] Â-sat kî-chhu̍k, yit-van lióng-chhiên ngìn; Nâ-fut-thâ-li kî-chhu̍k, yit-van lióng-chhiên ngìn; Mâ-nâ-sî kî-chhu̍k, yit-van lióng-chhiên ngìn;
[7] Sî-mién kî-chhu̍k, yit-van lióng-chhiên ngìn; Li-vi kî-chhu̍k, yit-van lióng-chhiên ngìn; Yî-sat-kâ kî-chhu̍k, yit-van lióng-chhiên ngìn;
[8] Sî-pu-lùn kî-chhu̍k, yit-van lióng-chhiên ngìn; Yok-sit kî-chhu̍k, yit-van lióng-chhiên ngìn; Phien-ngâ-mén kî-chhu̍k, yit-van lióng-chhiên ngìn.
[9] Heu-lòi, ngài yit khon, yu khon-tó yit thai-khiùn ke ngìn, su-muk chhin-nàn kie-son. Kì-têu he tui sṳ-kie kok koet-kâ, kok mìn-chhu̍k, kok-chúng ngìn, lâu kok-chúng ngî-ngièn lòi ke, chhiòn-phu khî chhai pó-chho lâu Kâu-yòng ke mien-chhièn, chok-tén pha̍k-set ke chhòng-phàu, sú nâ-tén chûng-su-kî.
[10] Kì-têu thai-sâng hêm-kóng: Kiu-ên he tui chhô chhai pó-chho-song ngài-têu ke Song-ti, lâu Kâu-yòng lòi ke!
[11] Só-yû ke thiên-sṳ́ lûng-chúng khî chhai pó-chho, chóng-ló, lâu si-ke sâng-vu̍t ke chû-vì. Kì-têu chhai pó-chho ke mien-chhièn phu̍k hâ-lòi kin-pai Song-ti,
[12] kóng: Â-mén! Ngien siung-chan, yùng-kông, chṳ-fi, kám-chhia, chûn-kui, khièn-nèn, li̍t-liong, chhiòn-phu kûi-pûn ngài-têu ke Song-ti, chhṳ̍t-to yún-yún yén-yén! Â-mén.
[13] Yû yit-ke chóng-ló mun ngài, kóng: “Liá-têu chok pha̍k chhòng-phàu ke he má-ngìn? Kì-têu he tui nai-vi lòi ke?”
[14] Ngài en-kóng: “Sîn-sâng, ngì chang tî.” Kì lâu ngài kóng: “Liá-têu ngìn he kîn-li̍t-ko thai pet-hoi ke. Kì-têu sṳt yung Kâu-yòng ke hiet chiông chhṳ-kâ ke chhòng-phàu sé-to pha̍k-pha̍k.
[15] Yîn-vi án-ngiòng, kì-têu chhai Song-ti ke pó-chho chhièn, ngit-ya chhai Kì ke sṳn-thien-chûng sṳ-fung Kì. Ke chhô chhai pó-chho-song ke Song-ti oi chhîn-chhṳ pí-yu kì-têu.
[16] Kì-têu m̀-voi chai tú-kî, ya m̀-voi chai choi-châu; ngit-thèu ya-he ngim-hò ngie̍t-hi lûng-chúng nat kì-têu m̀-tó.
[17] Yîn-vi pó-chho chûng ke Kâu-yòng oi mu̍k-yông kì-têu, tai kì-têu to sâng-miang-súi ke ngièn-thèu; Song-ti ya oi chhu̍t-thet kì-têu yit-chhiet ke muk-chṳp.”