[1] Liá-têu sṳ-chhìn yî-heu, ngài thâng-tó yû thai sâng-yîm, chhiong-he thiên-táng yû yit thai-khiùn ngìn, hêm-kóng: Hâ-li-lu-yá, chan-mî Song-chú! Kiu-ên, yùng-yeu, khièn-nèn chhiòn-phu su̍k ngài-têu ke Song-ti!
[2] Kì ke sṳ́m-phan he chṳ̂n-sṳ̍t yu kûng-ngi ke! Yîn-vi Kì sṳ́m-phan ke yung yìm-lon phai-fai sṳ-kie ke thai yìm-fu, hìn-fa̍t kì sat-hoi Song-ti phu̍k-ngìn ke chhui.
[3] Kì-têu thi-ngi-pái yu hêm-kóng: Hâ-li-lu-yá, chan-mî Song-chú! Sêu ke-chho thai-sàng ke fó-yên yit-chhṳ̍t chhung-tén sông, yún-yén mò thìn!
[4] Ngi-sṳ̍p-si-ke chóng-ló lâu si-ke sâng-vu̍t chhiu phu̍k hâ-hi kin-pai ke chhô chhai pó-chho-song ke Song-ti, kóng: Â-mén! Hâ-li-lu-yá!
[5] Chiap-tén, yû sâng-yîm tui pó-chho fat-chhut, kóng: Só-yû Song-ti ke phu̍k-ngìn, fàm he kin-vi Kì ke, mò-lun chûn-kui ya-he pî-mì ke, lûng-chúng oi chan-mî ngài-têu ke Song-ti!
[6] Ngài yu thâng-tó chhiong yû yit thai-khiùn ngìn ke sâng, chhiong-he thai-súi lâu hióng-lùi-kûng ke thai-sâng, kóng: Hâ-li-lu-yá, chan-mî Song-chú! Yîn-vi ngài-têu ke Chú — chhiòn-nèn ke Song-ti cho vòng lé!
[7] Ngài-têu oi fôn-hí khoai-lo̍k, chiông yùng-kông kûi-pûn Kì! Yîn-vi Kâu-yòng kiet-fûn ke sṳ̀-kiên to lé; kì ke sîn-ngiòng chún-phi hó-se lé.
[8] Song-ti yí-kîn su sîn-ngiòng hâu-kông pha̍k-chhiang ke mà-sâ ke sâm. (Mà-sâ ke sâm chhiu-he thoi-péu chung sṳn-thù só hàng ke ngi.)
[9] Yèn-heu, thiên-sṳ́ tui ngài kóng: “Ngì oi siá hâ-lòi: Su yêu-chhiáng chhâm-kâ Kâu-yòng fûn-yîn yèn-si̍t ke ngìn yû fuk-hi lé!” Kì yu tui ngài kóng: “Liá-têu he Song-ti chṳ̂n-sṳ̍t ke fa.”
[10] Ngài phu̍k chhai kì kiok-chhièn, oi pai kì, chúng-he kì tui ngài kóng: “Chhiên-van cho-m̀-tet! Ngài lâu ngì, pin ngì ke chung hiûng-thi chí-moi, chhiu-he só-yû chhṳ̀-sú Yâ-sû só khí-sṳ ke chṳ̂n-lî ke, chhiòn-phu khiung-yong he phu̍k-ngìn. Ngì yin-tông kin-pai Song-ti!” Yîn-vi, Yâ-sû só khí-sṳ ke chṳ̂n-lî chhiu-he yi-ngièn ke chîn-ngi.
[11] Heu-lòi, ngài khon-tó thiên khôi lé. Yû yit-phit pha̍k-mâ, ke khì-mâ ke chhṳ̂n-cho “Sṳ̀n-sin” lâu “Chṳ̂n-sṳ̍t”; kì phìn kûng-ngi lòi sṳ́m-phan lâu kâu-chan.
[12] Kì ke muk-chû chhiong fó-yam, thèu-nà tai-tén chhin-tô miên-liù. Kì sṳ̂n-song siá-tén yit-ke miàng, chhù-liáu kì chhṳ-kâ, mò-ngìn tî he má-ke yi-sṳ.
[13] Kì só chok ke chhòng-phàu kûi-liâng ngiam-tó hiet. Kì ke miàng chhṳ̂n-cho “Song-ti ke Tho”.
[14] Thiên-táng ke kiûn-chhui thèn-tén kì; kì-têu khì-tén pha̍k-mâ, chok-tén pha̍k-chhiang ke mà-sâ ke sâm.
[15] Yû yit-kî tông li ke kiam tui kì ke choi phùn chhut-lòi; kì oi yung liá-kî kiam lòi tá-yàng lie̍t-koet. Kì oi yung thiet-chhóng chhṳ-lî kì-têu; kì ya oi chhai chhiòn-nèn ke Song-ti thai nu-hi ke cha-chiú-chhṳ̀ tî-poi cha-chhut chiú lòi.
[16] Kì ke chhòng-phàu lâu kiok-pí táng-kô siá-tén yit-ke miàng-ho, chhiu-he: “Van-vòng ke Vòng, van-chú ke Chú.”
[17] Ngài yu khon-tó yû yit-ke thiên-sṳ́ khî chhai ngit-thèu tûng-ông. Kì thai-sâng tui khûng-chûng só-yû ke fî-niâu hêm-kóng: “Lòi â, siông-khiung lòi chhâm-kâ Song-ti ke thai yèn-si̍t!
[18] Lòi sṳ̍t kiûn-vòng, chiông-kiûn, lâu sṳ-pîn ke ngiuk; lòi sṳ̍t mâ lâu khì-sṳ ke ngiuk; lòi sṳ̍t nù-li, chhṳ-yù-ngìn, chûn-kui ke, pî-mì ke, kok-chúng ngìn ke ngiuk!”
[19] Ngài yu khon-tó ke-chak ok-chhu lâu thi-song ke lie̍t-vòng, pin kì-têu ke kiûn-chhui chhi-si̍p khiung-ha, lòi thùng ke pha̍k-mâ khì-sṳ lâu kì ke kiûn-chhui siông-chhṳ̀.
[20] Ke-chak ok-chhu pûn thiên-kiûn chok-hi; sṳt chhai kì mien-chhièn hàng khì-sṳ ke ká siên-tî ya khiung-ha pûn thiên-kiûn chok-hi. (Liá-ke ká siên-tî sṳt thûng-ko khì-sṳ mì-fe̍t ke-têu yû ke-chak ok-chhu ke yin-ki lâu pai chhu-siong ke ngìn.) Ke-chak ok-chhu lâu ká siên-tî pûn ke pha̍k-mâ khì-sṳ sâng-sâng fit-lo̍k ke sêu-tén liù-vòng ke fó-fù tî-poi.
[21] Kì-têu ke kiûn-chhui chhiòn-phu pûn ke pha̍k-mâ khì-sṳ khiéu-chûng phùn-chhut ke kiam chhṳ̀-sí; só-yû ke tiâu-é chhiòn-phu pî-lòi sṳ̍t kì-têu ke ngiuk, sṳ̍t-to páu-pi̍t-pi̍t.