[1] Pún-sû he ki-chai Yâ-sû Kî-tuk ke khí-sṳ. Song-ti kâu-pûn kì liá-ke khí-sṳ, oi kì chiông tón-khì-nui yit-thin voi fat-sên ke sṳ chṳ́-sṳ Song-ti ke chung phu̍k-ngìn. Kî-tuk chhâi-phai thiên-sṳ́ tui kì ke phu̍k-ngìn Yok-hon hién-mìn liá-têu sṳ,
[2] Yok-hon chhiu chiông só khon-tó ke lâu thai-kâ kóng, vi Song-ti ke chṳ̂n-tho lâu Yâ-sû Kî-tuk só khí-sṳ ke chṳ̂n-lî cho kien-chṳn.
[3] Siên-thu̍k liá-pún sû ke ngìn ngióng-pân yû fuk-hi! Ke-têu thâng liá-ke yi-ngièn yu cheu khì-chûng ke ki-chai hi-hàng ke ngìn sṳ̍t-chhai yû fuk-hi ô! Yîn-vi liá yit-chhiet sṳ-chhìn sṳ̍t-hien ke sṳ̀-kî voi to lé.
[4] Ngài — Yok-hon siá sin-é pûn Â-se-â-sén ke chhit-kiên kau-fi: Ngien kú-chó chhùn-chhai, liá-ha chhùn-chhai, chiông-lòi ya yún-yén chhùn-chhai ke Song-ti, pin Kì pó-chho chhièn chhit-ke Lìn, lâu ke chûng-sîm ke kien-chṳn-chá, chhiu-he chui-siên tui sí fu̍k-fa̍t, thúng-chhṳ thi-song van-vòng ke Yâ-sû Kî-tuk, su ên-tién, phìn-ôn pûn ngì-têu! Kì siak ngài-têu, yu thûng-ko liù-hiet to sí lòi sṳt-fong ngài-têu thot-lì ngài-têu ke chhui,
[6] pûn ngài-têu sàng-cho yit-ke koet, cho chi-sṳ̂ lòi fu̍k-sṳ kì ke Â-pâ Song-ti. Ngien yùng-kông lâu khièn-nèn kûi pûn Yâ-sû Kî-tuk, sṳ-sṳ vù-khiùng! Â-mén.
[7] Khon â! Kì chhô-yùn lòi lô; mî-yit-ke ngìn voi khon-tó kì, lièn ke-têu yung chhiông chhiuk kì ke ngìn ya voi khon-tó kì. Kì lòi ke sṳ̀, thi-song ke van-mìn lûng-chúng voi yîn-vi kì chhùi sîm-kôn thai-kieu. Liá-ke sṳ yit-thin voi fat-sên! Â-mén.
[8] Kú-chó chhùn-chhai, liá-ha chhùn-chhai, chiông-lòi ya yún-yén chhùn-chhai ke Chú — Chhiòn-nèn ke Song-ti kóng: “Ngài he Â-ngì-fap — chhiu-he khôi-sṳ́, he Â-mí-kâ — chhiu-he kiet-suk!”
[9] Ngài — Yok-hon chhiu-he ngì-têu ke hiûng-thi. Ngài thùng ngì-têu khiung-ha yû-fun Yâ-sû ke fam-nan, kì ke koet, lâu ngiûn-nai. Vi-tó chhòn-yòng Song-ti ke chṳ̂n-tho lâu Yâ-sû só khí-sṳ ke chṳ̂n-lî, ngài sṳt pûn-ngìn koân chhai ke miàng ôn-to Pha̍t-mô ke hói-tó.
[10] Yû yit-ke Chú-ngit, ngài su Sṳn-Lìn ke kám-thung, thâng-tó yû thai sâng-yîm, chhiong-he ho-thùng ke sâng, chhai ngài heu-poi tui ngài kóng:
[11] “Oi chiông ngì só khon-tó ke siá hâ-lòi, yèn-heu chiông liá sû-kién ki pûn Yî-fut-só, Sṳ-mî-nâ, Phe̍t-kâ-mô, Thûi-ngâ-thûi-lâ, Sat-thi̍t, Fî-lâ-thiet-fî, lâu Ló-tí-kâ chhit-ke kau-fi.”
[12] Ngài chón-sṳ̂n oi khon he má-ngìn tui ngài kóng-fa, ngài chhiu khon-tó chhit-chán kîm tên-thòi.
[13] Tên-thòi chûng-kiên yû yit-ke chhiong Ngìn-chṳ́ ke, khî chhai ke-vi, chok-tén chhui-to kiok-phàn ke chhòng-phàu, hiûng-chhièn kiê-tén kîm-tai.
[14] Kì ke thèu-nà-mô chhiong yòng-mô ya chhiong siet án pha̍k; kì ke muk-chû chhiong fó-yam án kîm;
[15] kì ke kiok chhiong fó-lù chûng lien-ko yu chhu̍t kîm-kîm ke thùng; kì ke sâng chhiong-he thai-súi ke sâng.
[16] Kì yu-sú nâ-tén chhit-lia̍p sên-é, choi phi-chhut yit-kî lióng-piên li ke kiam. Kì ke mien chhiong tông-chu ke ngit-thèu.
[17] Ngài yit khon-tó kì, chhiu phuk chhai kì ke kiok-chhièn, chhiong sí-thet yit-yong. Kì yung yu-sú hon-tén ngài, kóng: “M̀-sṳ́ kiâng! Ngài he khôi-sṳ́, ya he kiet-suk.
[18] Ngài he ke yún-yén chhùn-chhai ke! Ngài sṳt sí-ko, liá-ha sâng-sâng, ya oi sâng-to yún-yén. Ngài chóng-kón sí lâu yîm-kiên ke só-sṳ̀.
[19] Ngì oi chiông só khon-tó ke, mò-lun he liá-ha ya-he chiông-lòi oi fat-sên ke, chhiòn-phu siá hâ-lòi.
[20] Ngì só khon-tó, chhai ngài yu-sú ke chhit-lia̍p sên-é lâu chhit-chán kîm tên-thòi ke o-pi he án-ngiòng: Chhit-lia̍p sên-é he chhit-ke kau-fi ke sṳ́-chá; chhit-chán tên-thòi chhiu-he chhit-ke kau-fi.”