[1] Ngài yu khon-tó chhai thiên-táng yû nang-ngoi yit-ke sṳ̀n-pi ke khì-sṳ, yu thai yu khì. Yû chhit-ke thiên-sṳ́ chóng-kón chui-heu chhit-chúng châi-nan, yîn-vi Song-ti ke thai nu-hi oi chhai liá-têu châi-nan chûng fat-chhin.
[2] Ngài yu khon-tó yit-ke chhiong pô-lì ke hói, chhâm-tén fó. Ngài ya khon-tó yit-têu ngìn; kì-têu yí-kîn yàng-ko ke-chak ok-chhu, kì ke siong, lâu ke thoi-péu kì ke miàng ke su-muk. Kì-têu khî chhai pô-lì-hói ke sùn-thèu, nâ-tén Song-ti pûn kì-têu ke hièn-khìm,
[3] chhong-tén Song-ti ke phu̍k-ngìn Mô-sî ke sṳ̂-kô lâu Kâu-yòng ke sṳ̂-kô, kóng: Chú — chhiòn-nèn ke Song-ti â, Ngì ke só-cho ví-thai yu khì-meu! Van-koet ke Vòng â, Ngì ke tho-lu kûng-ngi yu chṳ̂n-sṳ̍t!
[4] Chú â, má-ngìn kám m̀ kin-vi Ngì nè? Má-ngìn kám m̀ yùng-kông Ngì ke miàng nè? Yîn-vi vì-yû Ngì he sṳ̀n-sṳn ke! Van-koet chhiòn-phu oi lòi, chhai Ngì mien-chhièn kin-pai, yîn-vi Ngì kûng-ngi ke só-cho yí-kîn chông-hién chhut-lòi lé.
[5] Liá-têu sṳ-chhìn yî-heu, ngài khon-tó thiên-táng ke sṳn-thien tá khôi-lòi, tî-poi yû Song-ti lìm-chhai ke sṳn-chong-phùng.
[6] Ke chóng-kón chhit-chúng châi-nan ke chhit-ke thiên-sṳ́ tui sṳn-thien chhut-lòi, chok-tén mà-sâ ke sâm, pha̍k-chhiang hâu-kông, hiûng-chhièn kiê-tén kîm-tai.
[7] Si-ke sâng-vu̍t khì-chûng ke yit-ke chiông chhit-chak kîm-vón kâu-pûn ke chhit-ke thiên-sṳ́; kîm-vón tî-poi chông-mân yún-sên Song-ti ke nu-hi.
[8] Yîn-vi Song-ti ke yùng-yeu lâu khièn-nèn, sṳn-thien tî-poi mân-mân he yên; ke chhit-ke thiên-sṳ́ kong chhit-chúng châi-nan vàn-sṳ̀n yî-chhièn, mò-ngìn nèn ngi̍p-hi sṳn-thien.