[1] Liá-têu sṳ-chhìn yî-heu, ngài khon-tó nang-ngoi yit-ke thiên-sṳ́ tui thiên-táng hâ-lòi. Kì yû chhin-thai ke khièn-piang; kì ke yùng-yeu phû-cheu thai-thi.
[2] Kì thai-sâng hêm kóng: Vang-thet lé! Thai Pâ-pí-lùn vang-thet lé, sàng-cho kúi he̍t ke só-chhai, pin kok-yong sià-lìn lâu kok-chúng ô-chô yu khó-vu ke tiâu-é ke teu.
[3] Yîn-vi lie̍t-koet chhiòn-phu lîm-ko liá thai yìm-fu yìm-lon ke lie̍t-chiú, thi-song ke-têu vòng sṳt thùng kì hàng kiên-yìm, sṳ-kiên ke sên-lî-ngìn sṳt thûng-ko kì ke chhâ-fà yen-lo̍k chhon thai-chhièn.
[4] Thèn-tén, ngài yu thâng-tó nang-ngoi yit-ke sâng-yîm tui thiên-táng hâ-lòi, kóng: Ngài ke chṳ́-mìn â, chhut-lòi! Tui ke-chho sàng chhut-lòi! Ngì-têu chang m̀-voi chhe-tó kì ke chhui, ya m̀-sṳ́ thùng kì khiung-ha su châi-nan.
[5] Yîn-vi kì ke chhui-ok tù-thiên, Song-ti ki-tet kì ke put-ngi.
[6] Cheu kì tui ngì-têu só-cho ke tui-fu kì; cheu kì ke hàng-vì kâ-phi lòi po-yin kì. Kì ngióng-pân thiàu chiú kâu-pûn ngì-têu, chhiu yung kâ-phi ngiàm ke chiú chṳ̂m-mân kì ke pî!
[7] Kì ngióng-pân yùng-kông chhṳ-kâ, yu chhâ-fà yen-lo̍k, chhiu ngióng-pân khú-thu̍k kì, pûn kì su-chhin thung-khú. Yîn-vi kì yit-chhṳ̍t tui chhṳ-kâ kóng: ‘Ngài he chhô chhai pó-chho-song ke ńg-vòng, ngài m̀-he koá-fu, chhie̍t-tui m̀-voi yû pî-sông.’
[8] Chhiu-he yîn-vi án-ngiòng, pî-sông, kî-fông, lâu sí ke châi-fo, voi chhai yit-ngit chṳ̂-chûng lìm-to kì! Kì voi pûn fó sêu-me̍t, yîn-vi sṳ́m-phan kì ke Chú Song-ti thai-yû nèn-li̍t!
[9] Thi-mien-song ke-têu thùng kì chhâ-fà yen-lo̍k hàng kiên-yìm ke vòng yit khon-tó ke sêu kì ke fó-yên chhiu vi kì chhùi sîm-kôn thai-kieu.
[10] Kì-têu yîn-vi chhin-kiâng kì só-su ke thung-khú, chhiu yén-yén khî-tén, kóng: Chhám lé! Liá-chho thai-sàng chhám lé! Yúng-chong ke Pâ-pí-lùn-sàng â, hàn mò yit-tiám-chûng kiú, ngì chhiu tù-tó chit-fa̍t lé!
[11] Sṳ-kiên ke sên-lî-ngìn ya vi kì sông-sîm thai-kieu, yîn-vi mò-ngìn chai lòi mâi kì-têu ke fo lé.
[12] Mò-ngìn mâi kì-têu ke kîm, ngiùn, pó-sa̍k, chṳ̂n-chû; ya mò-ngìn mâi kì-têu ke mà-sâ, chhù-pu, kô-kui ke chṳ́-set lâu thai-fùng-set ke pu-liau, kok-chúng hiông-muk, kok-yong siong-ngà ke chṳ-phín, kui-chhung ke muk-hi, thùng-hi, thiet-hi, lâu thai-lî-sa̍k ke chṳ-phín;
[13] ya mò-ngìn mâi ngiuk-kui, hiông-liau, hiông, hiông-súi, nen-hiông, chiú, yù, mien-fún, ma̍k-é, ngiù, yòng, mâ, mâ-chhâ, nù-li, lâu ngìn-khiéu tén.
[14] Liá-têu sên-lî-ngìn tui kì kóng: Ngì só thâm-oi ke kok-chúng kó-chṳ́ yí-kîn lì-khôi ngì lé; yit-chhiet ke yùng-fà fu-kui ya mò-thet hi, mò khó-nèn chhìm to-chón-lòi lé!
[15] Mai liá-têu fo, chhai ke-chho sàng-tú fat thai-chhòi ke sên-lî-ngìn, yîn-vi chhin-kiâng kì só su ke thung-khú, chhiu yén-yén khî-tén. Kì-têu sông-sîm thai-kieu,
[16] kóng: Chhám lé! Liá-chho thai-sàng chhám lé! Kì yit-chhṳ̍t chok-tén mà-sâ, chṳ́-set lâu thai-fùng-set ke sâm, kûi-sṳ̂n koa-tén kîm-é, pó-sa̍k, lâu chṳ̂n-chû.
[17] Hàn mò yit-tiám-chûng kiú, liá yit-chhiet ke chhòi-sán chhiu sṳt-thet lé! Só-yû ke sòn-chóng, lî-hak, sòn-yèn, lâu só-yû kho hói mèu-sên ke ngìn chhiòn-phu yén-yén khî-tén.
[18] Kì-têu khon-tó ke sêu kì ke fó-yên, chhiu hêm-kóng: “Nai-chho sàng nèn thùng liá-chho thai-sàng pí nè!”
[19] Kì-têu nâ nài-fún ve chhai chhṳ-kâ ke thèu-nà-táng, sông-sîm thai-kieu, kóng: “Chhám lé! Liá-chho thai-sàng chhám lé! Hói-mien só-yû ke sòn, kì-têu ke sòn-chú chhiòn-phu he kho kì fat-chhòi ke! Hàn mò yit-tiám-chûng kiú, kì chhiu fông-fi-thet lé!”
[20] Thiên â, oi fôn-hí hí-lòi! Yîn-vi kì fí-me̍t lé! Chung sṳn-thù, kok-vi sṳ́-thù, lâu chung siên-tî â, oi fôn-hí hí-lòi! Yîn-vi Song-ti yí-kîn thoi ngì-têu sṳ̂n-yên, chit-fa̍t kì lé!
[21] Chiap-tén, yû yit-ke chhin yû-li̍t ke thiên-sṳ́ khià-hí yit-chak chhiong thai mo-sa̍k án thai ke sa̍k-thèu, fit-lo̍k hói-tú hi, kóng: Pâ-pí-lùn thai-sàng ya oi chhiong án-ngiòng chhûng-chhûng phiâng-thet, yún-yén m̀-voi chai yû-ngìn khon-tó kì lé!
[22] Chhai ngì sàng-tú, m̀-voi chai yû-ngìn thâng-tó yû khìm-sṳ̂ lâu ngo̍k-sṳ̂ ke yîm-ngo̍k, ya-he phùn tha̍k-é lâu ho-thùng ke sâng. Kok-chúng sú-ngi ke sṳ̂-fu chai chhìm m̀-tó; mo-pán ke sâng chai thâng m̀-tó lé!
[23] Yù-tên ke fó m̀-voi chai pûn-ngìn tiám-chho̍k hí-lòi; ya m̀-voi chai yû-ngìn thâng-tó sîn-lòng lâu sîn-ngiòng ke sâng lé. Ngì ke sên-lî-ngìn yit-chhṳ̍t he sṳ-kiên chui yû sṳ-li̍t ke ngìn; van-koet ya lûng-chúng pûn ngì ke sià-su̍t mì-fe̍t-hi.
[24] Chhai liá sàng-tú yû fat-hien chung siên-tî lâu sṳn-thù, pin só-yû chhai sṳ-kiên pûn-ngìn chhṳ̀-sí ke ngìn ke hiet.