[1] Chiap-tén, ngài tet-tó nang-ngoi yit-ke yi-siong, khon-tó thiên-táng yû yit-san khôi-tén ke mùn. Ngài siên-chhièn só thâng-tó, chhiong ho-thùng ke sâng, yu tui ngài kóng: “Ngì sông liá-vi lòi, ngài oi chṳ́-sṳ ngì yî-heu pit-thin oi fat-sên ke sṳ.”
[2] Chit-sṳ̀, Sṳn-Lìn chhiu kám-thung ngài. Ngài khon-tó thiên-táng yû yit-ke pó-chho; yû yit-vi chhô chhai pó-chho-song.
[3] Kì ke mien-mau chhiong pit-ngiu̍k lâu fùng-pó-sa̍k án-ngiòng hâu-kông. Pó-chho ke chû-vì yû kiûng vì-tén, set chhiong liu̍k-pó-sa̍k.
[4] Pó-chho chû-vì yû ngi-sṳ̍p-si-ke chho-vi, táng-kô chhô-tén ngi-sṳ̍p-si-ke chóng-ló, chok-tén pha̍k-set ke chhòng-phàu, thèu-nà tai-tén kîm ke miên-liù.
[5] Yû ngiap-lang, lung-lung-kún ke sâng, lâu hióng-lùi-kûng ke sâng tui pó-chho fat-chhut. Pó-chho chhièn chho̍k-tén chhit-kî fó-pá; ke chhiu-he Song-ti ke chhit-ke Lìn.
[6] Pó-chho chhièn hàn-yû chhiong súi-chîn án-ngiòng ke pô-lì-hói. Pó-chho ke si-mien yû si-ke sâng-vu̍t, chhièn-heu chhiòn-phu yû muk-chû.
[7] Thi-yit-ke sâng-vu̍t chhiong-he sṳ̂-é; thi-ngi-ke chhiong-he ngiù-kú; thi-sâm-ke yû ngìn ke mien; thi-si-ke chhiong-he pî-tén ke ên-tiâu.
[8] Ke si-ke sâng-vu̍t, tak-ke yû liuk-chak yi̍t-kap, mò-lun nui-ngoi chhiòn-phu yû muk-chû. Kì-têu ngit-ya kín chhong: Sṳn-châi! Sṳn-châi! Sṳn-châi! Chú — Chhiòn-nèn ke Song-ti, kú-chó chhùn-chhai, liá-ha chhùn-chhai, chiông-lòi ya yún-yén chhùn-chhai ke!
[9] Tak-pái, si-ke sâng-vu̍t chhong yùng-kông, chûn-kui, kám-chhia ke sṳ̂-kô, hien-pûn ke chhô chhai pó-chho-song, yún-yén sâng-sâng ke,
[10] ke-sṳ̀, ngi-sṳ̍p-si-ke chóng-ló chhiu phu̍k lo̍k-hi kin-pai ke yún-yén sâng-sâng, chhô chhai pó-chho-song ke. Kì-têu chiông chhṳ-kâ ke miên-liù piong chhai pó-chho chhièn, kóng:
[11] Ngài-têu ke Chú, ngài-têu ke Song-ti! Ngì khâm-tet chiap-su yùng-kông, chûn-kui, lâu khièn-nèn. Yîn-vi Ngì chhóng-chho-liáu van-yû; van-yû ke su-chho lâu sên-chhùn, vàn-chhiòn he cheu Ngì ke chṳ́-yi.